இதுவரை பொருளாதாரத் தடையால் மேற்காசியப் பிரதேசத்தில் சற்று அடக்கி வாசித்துக் கொண்டிருந்த ஈரான், இனிமேல் ஸ்தாயில் வாசிக்குமா என்ற கேள்வி உலக அரங்கில் ஒலித்துக் கொண்டிருக்கின்றது.
ஈரானின் உச்சத் தலைவர் அயத்துல்லா அலி கொமெய்னி அமெரிக்காவுடன் யூரேனியப் பதப்படுத்தல் தொடர்பான உடன்படிக்கையின் பின்னர் அமெரிக்கா தொடர்பான ஈரானின் நிலைப்பாட்டில் மாற்றமில்லை என்றார்.
ஈராக்கில் சதாம் ஹுசெய்னின் ஆட்சியை ஒழித்ததன் மூலம் அமெரிக்கா ஈரானை வலுவடையச் செய்து விட்டது என்பது ஸுன்னி முஸ்லிம்களின் குற்றச்சாட்டாக இருக்கின்றது.
வரலாற்றில் ஒரு வல்லரசு
ஈரானுக்கு என்று உயரிய வரலாற்றுப் பெருமை இருக்கின்றது. பாரசீகம் (Persia) என அதை ரோமர்கள் அழைத்தனர்.
எகிப்து முதல் துருக்கி, மெசப்பட்டோமியா ஆகியவை உள்ளிட்ட அதனது பேரரசு சிந்து நதிவரை வியாபித்திருந்தது.
பின்பு அவர்கள் கிரேக்கர், ரோமர், அரபுக்கள், துருக்கியர், மங்கோலியர் ஆகியோரால் ஆக்கிரமிக்கப்பட்டனர். மீண்டும் எகிப்து, அல்ஜீரியா, லிபியா, ஈராக், சவூதி அரேபியாவின் ஒரு பகுதி ஆகியவற்றைக் கொண்ட ஒரு வல்லரசாக தாம் உருவாக வேண்டும் என தற்போதைய ஈரானின் மதவாத ஆட்சியாளர்கள் கருதுகின்றனர்.
இப்பிர தேசங்களைத் தமது ஆட்சிக்குள் கொண்டு வந்து அங்கு ஷியா முறைமையிலான இஸ்லாமைப் பரப்ப வேண்டும் என்பது அவர்களது கனவு.
ஹோம்ஸ் நீரிணை
ஈரானின் பூகோள இருப்பு முக்கியத்துவம் வாய்ந்தது. கடல் மூலமான உலக எரிபொருள் வழங்கலில் 40% ஈரானின் ஹோம்ஸ் நீரிணையூடாக நடக்கிறது.
Strait-of-Hormuz ஹோம்ஸ் நீரிணை
உலக மொத்த எண்ணெய் வழங்கலில் இது 20% ஆகும். ஹோம்ஸ் நீரிணை, ஓமான் வளைகுடாவையும் பாரசீக வளைகுடாவையும் இணைக்கும் 35 மைல்கள் அகலமுள்ள நீரிணையாகும்.
நாளொன்றிற்கு 15 எண்ணெய் தாங்கிக் கப்பல்கள் இதனூடாக பயணம் செய்கின்றன. சவூதி அரேபியா, ஈராக், குவைத், பஹ்ரெய்ன், கட்டார், துபாய் போன்ற நாடுகளில் இருந்து ஏற்றுமதியாகும் எரிபொருள் ஹோம்ஸ் நீரிணையூடாகவே நடக்கின்றது.
இந்த நீரிணையை மூடிவிடுவேன் என்று ஈரான் அடிக்கடி மிரட்டுவதுண்டு. அமெரிக்கா இந்த நீரிணையை தனது கடற்படையின் கண்காணிப்பின் கீழ் வைத்திருக்கின்றது. அமெரிக்காவின் மேற்காசிய நகர்வுகளுக்கு என்றும் பிரச்சினையாகவும் சவாலாகவும் இருப்பது ஈரானே.
ஈரானின் பிராந்திய ஆதிக்கக் கனவு
2015 மார்ச் மாதம் ஈரானின் அதிபர் ஹஸன் ரௌஹானியின் ஆலோசகர் அலி யூனிசி, ஈரான் ஒரு பேரரசு, ஈராக் அந்தப் பேரரசின் ஒரு பகுதி என்றார்.
அதற்கு ஒரு மாதத்திற்கு முன்னர் ஈரானிய புரட்சிப் படையான கட்ஸ் படையின் வெளிநாட்டுப் பிரிவின் தளபதி காசிம் சுலைமான், இன்று ஈரான் தனது மதப் புரட்சியை பஹ்ரேன் முதல் ஈராக் வரைக்கும், சிரியா முதல் யேமன் உள்ளிட்ட வட ஆபிரிக்காவரைக்கும் ஏற்றுமதி செய்யக் கூடிய நிலை உருவாகியுள்ளது என்றார்.
அலி கொமெய்னி
இவை மட்டுமல்ல, 2014 ஆம் ஆண்டு செப்டெம்பர் மாதம் ஈரானிய உச்சத் தலைவர் அலி கொமெய்னிக்கு நெருக்கமான பாராளுமன்ற உறுப்பினர் அல் ரெஜா ஜக்கானி, தற்போது பக்தாத், பெய்ரூட், டமஸ்கஸ், சனா ஆகிய நான்கு அரபுத் தலைநகரங்கள் ஈரானின் கட்டுப்பாட்டில் உள்ளன என்றார்.
இன்னும் சற்றுப் பின் சென்றால், 2013 ஆம் ஆண்டு அஸர்பைஜானை ஈரானுடன் மீளிணைக்க வேண்டும் என்ற தீர்மானம் ஈரானியப் பாராளுமன்றத்தில் நிறைவேற்றப்பட்டது. அஸர்பைஜானை சோவியத் ஒன்றியம் ஓர் உடன்படிக்கை மூலம் ஈரானிடமிருந்து 1828 ஆம் ஆண்டு பிரித்து தன்னுடன் இணைத்துக் கொண்டது.
அரபுக்கள் வேறு ஈரானியர்கள் வேறு
ஈரானியர்களும் அரபுக்களும் மதத்தால் ஒன்றுபட்டிருந்தாலும் இனத்தால், மொழியால் வேறுபட்டவர்கள். மதத்தால் ஒன்றுபட்டவர்கள் என்று அழுத்திச் சொல்ல முடியாத அளவிற்கு ஷியா முஸ்லிம்களான ஈரானியர்களுக்கும் ஸுன்னி முஸ்லிம்களைப் பெரும்பான்மையாகக் கொண்ட பல அரபு நாடுகளும் முரண்பட்டுக் கொள்கின்றன.
ஸுன்னி முஸ்லிம்களைக் கொண்ட துருக்கி, ஈரானுடன் நெருக்கமான உறவுகளைப் பேணி வந்தாலும் சிரியா விவகாரத்தில் இரண்டும் முரண்படுகின்றன. குர்திஷ் மக்களை ஒழிப்பதில் இரு நாடுகளும் ஒத்துழைக்கின்றன.
ஈராக்
ஈராக்கில் ஸுன்னி இஸ்லாமிய அமைப்பான ஐ.எஸ்.ஐ.எஸ். என்றும் ஐ.எஸ். ஐ.எல். என்றும் ஐ.எஸ். என்றும் அழைக்கப்படும் இஸ்லாமிய அரசுக்கு எதிராக ஈரானே முன்னணியில் நின்று செயற்படுகின்றது.
ஷியா முஸ்லிம்களைப் பெரும்பான்மையாகக் கொண்ட ஈராக்கில் ஸுன்னி முஸ்லிமான சதாம் ஹுசெய்ன் நீண்டகாலம் ஆட்சியில் இருந்தார். அவர் ஈரானுக்கு எதிராக நீண்ட போரையும் 1980 முதல் 1988 வரை நடத்தினார்.
அவரது பிராந்திய ஆதிக்கக் கனவால் அவர் அமெரிக்க ஆக்கிரமிப்பால் ஆட்சியில் இருந்து விரட்டப்பட்டுக் கொல்லப்பட்டார்.
பின்னர் அமெரிக்க ஆதரவுடன் தேர்தல் மூலம் ஈராக்கில் ஷியா முஸ்லிம்கள் ஆட்சியைக் கைப்பற்றினர். இதைத் தொடர்ந்து ஈராக்கிலுள்ள ஸுன்னி முஸ்லிம்களின் அமைப்பான ஈராக்கிற்கான அல்கைதா ஐ.எஸ். என்னும் போராளி அமைப்பாக மாறியது.
ஸுன்னிப் போராளிகளும், சதாமின் படையில் இருந்த பாத் கட்சி வீரர்களும் ஐ.எஸ்.ஸுடன் இணைந்து கொண்டனர்.
ஐ.எஸ். அமைப்பு ஸுன்னி முஸ்லிம்களைப் பெரும்பான்மையாகக் கொண்ட சிரியாவில் ஷியா முஸ்லிம்களின் ஒரு பிரிவினரான அலவியா இனக்குழுமத்தினரின் ஆட்சிக்கு எதிராகப் போராடுவதாகச் சொல்லி சவூதி அரேபியா, கட்டார் ஆகிய நாட்டுச் செல்வந்தர்களிடமிருந்து பெரும் நிதியைப் பெற்றுக் கொண்டு ஈராக்கிலும் சிரியாவிலும் பெரு நிலப்பரப்பைக் கைப்பற்றிக் கொண்டது.
அமெரிக்காவின் முதலாம் எதிரியாக ஐ.எஸ். அமைப்பு வளர்ந்து வருகின்றது. இந்த ஐ.எஸ். அமைப்பை ஒழித்துக்கட்ட அமெரிக்காவும் விரும்புகின்றது; ஈரானும் விரும்புகின்றது. இதனால் அமெரிக்காவும் ஈரானும் ஈராக்கில் இணைந்து செயற்படுகின்றன.
சவூதி அரேபியா
ஈரானின் பிராந்திய ஆதிக்கத்திற்கு பெரும் சவால் விடும் நாடாக சவூதி அரேபியா இருக்கின்றது. சவூதியில் ஷியா முஸ்லிம்கள் வாழும் பிரதேசங்களை தன்னுடன் இணைக்க வேண்டும் எனவும் ஈரான் கருதுகின்றது.
ஈரானின் நிகராளிகளில் ஒன்றான ஹமாஸ் அமைப்பை சவூதி அரேபியா தனது பக்கம் இழுத்துக் கொண்டிருக்கின்றது. ஹமாஸ் அரசியற் துறைப் பொறுப்பாளர் கலீட் மெஷாலும் மற்றும் பல உயர் மட்டத்தினரும் 2015 ஜூலை மாதம் சவூதி அரேபியாவிற்குப் பயணம் மேற்கொண்டமை ஈரானை உலுப்பியதுடன் அதிர்ச்சியடைய வைத்துள்ளது.
இதுவரை காலமும் ஹமாஸ் அமைப்பிற்குத் தேவையான படைக்கலன்களும் நிதியும் ஈரானிடமிருந்தே கிடைத்தன.
சவூதி அரேபியாவுடன் உறவை வளர்த்தால் அதன் மூலம் எகிப்திய அரசு மூடி வைத்திருக்கும் ரஃபாக் கடவையைத் திறக்க வைக்கலாம் என ஹமாஸ் அமைப்பு நம்புகின்றது.
ஈரான் அணுகுண்டு தயாரித்தால் பாகிஸ்தானிடமிருந்து அணுகுண்டை வாங்கும் திட்டத்துடன் சவூதி அரேபியா இருக்கின்றது.
லெபனான்
முதலாம் உலகப் போரின் பின்னர் மேற்காசியாவில் ஒரு கிறிஸ்தவ நாடு தேவை என லெபனான் உருவாக்கப்பட்டது. ஆனால், காலப்போக்கில் அங்கு இஸ்லாமியரே பெரும்பான்மையாகிவிட்டனர்.
பலஸ்தீனத்திலிருந்து இடம்பெயர்ந்தோராலும் அவர்கள் மீது தாக்குதல் நடத்தும் இஸ்ரேலாலும் லெபனான் குழப்பம் மிக்க நாடாக இருக்கின்றது.
லெபனானிலிருந்து யஸீர் அரபாத் தலைமையிலான பலஸ்தீன விடுதலை இயக்கத்தை சிரியா படையெடுத்து விரட்டியதன் பின்னர் அங்குள்ள எஞ்சிய பலஸ்தீனியர்களால் இஸ்ரேலின் அட்டூழியத்திற்கு எதிராக உருவாக்கப்பட்ட ஹிஸ்புல்லா அமைப்பு, மத்திய தரைக் கடலில் உள்ள ஈரானின் விமானம் தாங்கிக் கப்பல் என விமர்சிக்கப்படுகின்றது.
ஹிஸ்புல்லா அமைப்பிற்கு படைக்கலன்களும் நிதியும் வழங்கும் ஈரான் தனது பிராந்திய ஆதிக்கத்தை லெபனானில் உள்ள ஹிஸ்புல்லா மூலம் முன்னெடுத்து வருகின்றது.
சிரியா
சிரியாவில் ஸுன்னி ஐ.எஸ். அமைப்பும் சிரிய அதிபர் அல் பஷார் அசாத்திற்கு எதிரான சுனிக் கிளர்ச்சிக்காரர்களும் ஒரு தரப்பினருடன் மற்றத் தரப்பினர் போராடி அழிந்து கொள்வது ஈரானிற்கு மகிழ்ச்சியூட்டும் ஒன்று.
லெபனானில் செயற்படும் ஷியா முஸ்லிம் தீவிரவாத அமைப்பான ஹிஸ்புல்லாவிற்கான விநியோகம் ஈரானிலிருந்து சிரிய விமான நிலையங்களூடாக நடைபெறுகின்றது.
இதனால் சிரியா ஈரானைப் பொறுத்தவரை முக்கியமான ஒரு நாடாகும். அதிபர் அஸாத்தைப் பாதுகாக்க ஈரான் பணம், படைக்கலன் ஆகியவற்றை வழங்குவதுடன் லெபனானில் உள்ள ஹிஸ்புல்லாப் போராளிகளை அஸாத்தின் படைகளுடன் இணைந்து கிளர்ச்சிக்காரர்களுக்கு எதிராகப் போராட வைக்கின்றது.
ஈராக்கும் சிரியாவும் ஈரானின் ஆதிக்கத்திற்குள் வந்தால் அடுத்ததாக லெபனான் இலகுவாக ஈரானின் கட்டுப்பாட்டிற்குள் வந்துவிடும். ஈரானும் சிரியாவும் லெபனானுடனான எல்லையை தமது கட்டுப்பாட்டிற்குள் வைத்திருப்பதில் அதிக அக்கறை காட்டுகின்றன.
ஐக்கிய அமீரகம்
ஈரானுக்கும் ஐக்கிய அமீரகத்திற்கும் இடையில் ஹோம்ஸ் நீரிணையில் உள்ள Greater Tunb, Lesser Tunb, Abu Musa ஆகிய மூன்று தீவுகளும் யாருக்குச் சொந்தம் என்பது தொடர்பாக முறுகல் நிலை உண்டு. அரபு லீக் நாடுகள் ஐக்கிய அமீரகம் தமக்கு கேந்திர முக்கியத்துவம் வாய்ந்த நாடு எனக் கருதுகின்றனர்.
ஈரானின் நிகராளிப் போர்கள்
(Proxy Wars)
ஈரான் தற்போது சிரிய அரசினூடாகவும் ஹிஸ்புல்லாவின் உதவியுடனும் சிரிய அரசுக்கு எதிரான ஒரு நிகராளிப் போரையும், ஈராக்கில் அதன் அரசினூடாக ஐ.எஸ். அமைப்பிற்கு எதிரான ஒரு நிகராளிப் போரையும், யேமனில் சவூதி அரேபியாவிற்கு ஆதரவான அரசுக்கு எதிராக ஹெளதி இனக்குழுமப் போராளிகளூடாக ஒரு நிகராளிப் போரையும் நடாத்தி வருகின்றது.
நிகராளிப் போர் நேரடிப் போரிலும் பார்க்கச் செலவுமிக்கது. அரபு ஸுன்னி முஸ்லிம்களைப் பெரும்பான்மையாகக் கொண்ட சிரியாவை ஈரானின் ஆதிக்க நாடாக மாற்றுவது இயலாத ஒன்று.
அப்பிராந்தியத்தில் ஆதிக்கம் செலுத்த விரும்பும் துருக்கியையும் சவூதி அரேபியாவையும் மிஞ்சி இதைச் சாதிக்க வேண்டும்.
அமெரிக்கா சிரியாவில் ஸுன்னி முஸ்லிம்களின் ஆட்சியை விரும்புகின்றது. ஈராக்கில் ஐ.எஸ். அமைப்பு ஈரான், ஈராக்கிய அரசு, ஐக்கிய அமெரிக்கா ஆகியவற்றின் தாக்குதலை எதிர்கொள்கின்றது.
ஐ.எஸ். அமைப்பை அங்கு ஒழித்துக் கட்டினாலும் மொழியாலும் இனத்தாலும் வேறுபட்ட ஈராக்கை ஈரான் தனது ஆதிக்கத்தின் கீழ் கொண்டு வருவதும் கடினம். யேமனைப் பொறுத்தவரை அது சவூதி அரேபியாவின் கொல்லைப் புறம். ஈரானுக்கு ஆதரவான ஹெளதி இனக்குழுமம் எண்ணிக்கை அளவின் குறைவானது.
ஈரானிற்கு “சூழ்”நிலை சரியில்லை
ஈரானைச் சுற்றிவர ஸுன்னி முஸ்லிம்களின் நாடுகளே இருக்கின்றன. தென் கிழக்கில் ஒரு நீண்ட எல்லையுடன் சவூதி அரேபியாவும் வடகிழக்கில் அமெரிக்காவின் நட்பு நாடான துருக்கியும் கிழக்கில் உறுதியற்ற ஆட்சியையும் பெரும்பான்மை ஸுன்னி முஸ்லிம்களையும் கொண்ட சவூதியின் நட்பு நாடான பாகிஸ்தானும் மேற்கில் ஈரானுடன் எட்டு ஆண்டுகள் போர் புரிந்த ஈராக்கும் ஈரானுக்கு நட்பு நாடுகள் என்பது குறைவு.
சீனாவும் ரஷ்யாவும் அவ்வப்போது அரசுறவியலில் (இராஜதந்திரத்தில்) ஈரானுக்குச் சார்பாக நடந்து கொண்டாலும் அவை ஈரானின் கேந்திரோபாய நட்பு நாடுகள் அல்ல. இந்த இரு வல்லரசுகளும் ஈரானுக்குத் தேவையான நேரங்களில் ஐக்கிய நாடுகள் பாதுகாப்பு சபையில் தமது இரத்து (வீட்டோ) அதிகாரங்களைப் பாவித்ததில்லை. உலக அரங்கில் ஈரான் ஒரு தனித்து நிற்கும் நாடாகும்.
ஈரானின் பாதுகாப்புச் செலவீன த்திலும் பார்க்க சவூதியின் பாதுகாப்புச் செலவீனம் நான்கு மடங்கானது. ஈரான் தனது படைக்க லன்களில் பெரும் பகுதியைத் தானே உற்பத்தி செய்கின்றது.
அவற்றை அவ்வப்போது லெபனானிலும் காஸா நிலப்பரப்பிலும் பரீட்சித்து வருகின்றது. சவூதி அரேபியா, ஐக்கிய அமீரகம், கட்டார் போன்ற செல்வம் மிகுந்த அரபு நாடுகள் அரபு நாடல்லாத ஈரான் அரபு நாட்டில் ஆதிக்கம் செலுத்த அனு மதிக்காது.