இரத்தினபுரி மாவட்டத்தில் கஹவத்தை பொலிஸ் பிரிவில் உள்ள இயற்கை அழகு மிக்க ஒரு ஊரே கொட்டகெத்தன. பெண்களின் தொடர் படுகொலைகளால் திகில் நிறைந்த ஒரு பிரதேசமாக பலராலும் நோக்கப்பட்ட ஒரு இடமும் கூட.
கடந்த ஒருவாரத்துக்கு முன்னர் வரை நீடித்த திகில் நிறைந்த மர்மம் தற்போது விலக ஆரம்பித்துள்ளது.
கடந்த 8 வருடங்களில் 18 பெண்கள் கொடூரமான முறையில் பல்வேறு விதமாக கொலை செய்யப்பட்டிருந்த நிலையில் சந்தேக நபர்களே சிக்காத சில கொலைகள் தொடர்பில் தற்போது சந்தேக நபர் ஒருவர் சிக்கியுள்ளதே அதற்குக் காரணமாகும்.
நாதன் பாப்பு. இவர்தான் இறுதியாக கொட்டகெத்தன மர்மத்துக்கு பலியானவர். 48 வயதுடைய இரு பிள்ளைகளின் தாய். இரத்தினபுரி கஹவத்தை பொலிஸ் பிரிவுக்கு ட்பட்ட கொட்டகெத்தன ஓப்பாத்த தோட்டத்தின் மேற்பிரிவில் வசித்தவர்.
அதே தோட்டத்தில் தபால் விநியோகஸ்தராக இவரது கணவர் வேலை பார்க்க பாப்புவோ தேயிலை தோட்டத்தில் கொழுந்து பறித்து குடும்ப வண்டியை ஓட்ட உதவினார்.
பாப்புவின் இரு மகன்மாரும் திருமணமாகி ஒவ்வொரு பிள்ளைகளுக்கு தந்தையாகியிருந்த நிலையில் பாப்புவின் வாழ்வும் சாதாரணமாகவே கழிந்து வந்தது.
இந்நிலையில்தான் கடந்த செப்டெம்பர் மாதம் 28 ஆம் திகதி பிற்பகல் 1.40 மணியளவில் பாப்பு சரமாரியாக வெட்டப்பட்ட நிலையில் அவர் கொழுந்து பறிக்கும் தேயிலை தோட்டத்தின் ஒரு பகுதியில் சடலமாக மீட்கப்பட்டார்.
வெட்டுக் காயங்களுடன் இரத்த வெள்ளத்தில் சடலமாக பாப்பு இருந்த போது அது தொடர்பில் தோட்ட மக்கள் 119 அவசர தொலைபேசி இலக்கம் ஊடாக உடனடியாகவே பொலிஸாருக்கு அறிவித்துள்ளனர்.
இந்நிலையிலேயே ஸ்தலத்துக்கு கஹவத்த பொலிஸார் உடனடியாக சென்று விசாரணைகளை ஆரம்பித்துள்ளனர்.
குறித்த தேயிலை தோட்டத்தில் 100 மீற்றர்களுக்கும் மேல் நீண்டு செல்லும் இரத்தக் கறைகள் காணப்படும் நிலையில் பாப்பு விரட்டி விரட்டி வெட்டப்பட்டிருக்கலாம் அல்லது வேறு இடத்தில் வெட்டிக் கொலை செய்து விட்டு சடலம் காணப்பட்ட இடத்துக்கு தூக்கி கொண்டு வந்து போட்டிருக்கலாம் என பொலிஸார் சந்தேகித்தனர்.
குறிப்பாக பாப்புவின் சடலத்தில் 5 ஆழமான வெட்டுக் காயங்கள் சட்டவைத்திய அதிகாரிகளால் அவதானிக்கப்பட்டுள்ளதுடன் அந்தகாயங்கள் ஊடாக அதிகளவு இரத்தம் வெளியேறியமையே பாப்பு உயிரிழக்க காரணமாக அமைந்ததாக பிரேத பரிசோதனை அறிக்கையில் குறிப்பிடப்படுகிறது.
உண்மையில் பாப்புவின் சடலத்தை பொலிஸார் ஸ்தலத்தில் அவதானித்த போது பல்வேறு ஊகங்களுக்கு அது தகவலளித்தது.
அவரது உடல் காணப்பட்ட நிலைமையானது பாப்பு துஷ்பிரயோகத்துக்கு உட்படுத்தப்பட்டாரா என்ற கேள்வியை எழுப்பியது.
எனினும் பிரேத பரிசோதனையில் பாப்பு துஷ்பிரயோகம் செய்யப்பட்டதாக தெரியவராத நிலையில் சடலத்தின் பாகங்கள் மேலதிக ஆய்வுகளுக்காக அரச இரசாயன பகுப்பாய்வாளர் மற்றும் பொரளை ஜீன்டெக் நிறுவன விஞ்ஞானிகளுக்கு அனுப்பப்பட்டன.
இரத்தினபுரி மற்றும் கேகாலை ஆகிய மாவட்டங்களுக்கு பொறுப்பான பிரதிப் பொலிஸ் மா அதிபர் ரொஹான் டயஸ், இரத்தினபுரி சிரேஷ்ட பொலிஸ் அத்தியட்சகர் பாலித்த சிறிவர்தன ஆகியோரின் நேரடி கட்டுப்பாட்டில் கஹவத்தை பொலிஸ் நிலையத்தின் முன்னாள் பொறுப்பதிகாரி லலித் ராஜமந்திரியின் கீழ் விசேட பொலிஸ் குழுக்கள் 20 விசாரணைகளை முதலில் ஆரம்பித்தன.
இதனிடையே தான் இது தொடர்பில் விசாரணை செய்யும் பொறுப்பு பொலிஸ் மா அதிபர் என்.கே.இலங்ககோனினால் குற்றப் புலனாய்வுப் பிரிவுக்கு பாரப்படுத்தப்பட்டது.
இந்த பொலிஸ் குழுவானது இரத்தினபுரி மாவட்டத்தின் பல்வேறு பொலிஸ் நிலையங்களில் கடமையாற்றும் மேலும் பல உத்தியோகத்தர்களின் உதவியுடன் கொட்டகெத்தனவில் தங்கியிருந்து மிக சூட்சுமமாக விசாரணைகளை ஆரம்பித்தது.
இந்த விசாரணைகளை குற்றப் புலனாய்வுப் பிரிவின் விசாரணைக் குழு 3 கட்டங்களாக முன்னெடுத்தது. அதில் ஒரு கட்டமாக குற்றப் புலனாய்வுப் பிரிவு பிரதேசத்தில் இருந்து பலரிடம் வாக்கு மூலங்களை சேகரித்தது.
அந்த வாக்கு மூலங்களை ஆராய்ந்த போது, மிக முக்கிய தடயமொன்று புலனாய்வுப் பிரிவுக்கு கிடைத்தது. அதாவது சேகர் (பெயர் மற்றப்பட்டுள்ளது) என்ற சாட்சியாளரின் சாட்சியத்தின் படி நாதன் பாப்பு என்ற பெண் கொலை செய்யப்பட்டிருக்கலாம் என சந்தேகிக்கப்பட்ட நேரத்தில் சந்தேகத்துக்கு இடமான நபர் ஒருவரின் நடமாட்டம் தொடர்பில் அந்த தகவல் கிடைத்திருந்தது.
அந்த தகவலில் இருந்து அடுத்த இரு கட்ட விசாரணைகளை செய்யும் பொறுப்புக்கள் பொலிஸ் பரிசோதகர்களான விஜேதுங்க மற்றும் எம்.பைஸர் ஆகியோரின் கீழ் உதவிப் பொலிஸ் அத்தியட்சகர் சாமந்த விஜேசிங்கவின் ஆலோசனைக்கு அமைய இடம்பெற்றது.
பல்வேறு கோணங்களில் அவதானிப்புக்கள் மற்றும் விசாரணையின் இறுதியில் தாம் சந்தேகத்தில் பின் தொடர்ந்து வந்த நபர் ஒருவரை கைது செய்வது என புலனாய்வுப் பிரிவு தீர்மானித்தது.
ஆம், அதன்படி தான் கடந்த 11 ஆம் திகதி வெள்ளியன்று குற்றப் புலனாய்வுப் பிரிவினர் கொட்டகெத்தன பகுதியைச் சேர்ந்த 35 வயதுடைய மூன்று பிள்ளைகளின் தந்தையான நீல் லக் ஷ்மனை கைது செய்தனர்.
கைது செய்யப்பட்ட நீல் லக்ஷ்மனை உடனடியாக நான்காம் மாடிக்கு கொண்டுவந்த குற்றப் புலனாய்வுப் பிரிவின் விசேட விசாரணையாளர்கள் விசாரணைக்கு உட்படுத்தினர். இதன்போது வெளிப்படுத்திக்கொள்ளப்பட்ட தகவல்கள் புலனாய்வுப் பிரிவினருக்கு அதிர்ச்சியை ஏற்படுத்தியது.
இந் நிலையில் மறு நாள் 12 ஆம் திகதி சனியன்று கொழும்பு பிரதான நீதிவான் முன்னிலையில் சந்தேக நபரை ஆஜர்படுத்தி 24 மணி நேர தடுப்புக் காவல் உத்தரவொன்றை புலனாய்வுப் பிரிவினர் பெற்றுக்கொண்டனர்.
அதன்படி விசாரணை செய்கையில் நாதன் பாப்புவின் கொலையை விட கொட்டகெத்தனவை புரட்டி எடுத்த மேலும் பல கொலைகளுடன் சந்தேக நபருக்கு தொடர்பிருப்பது உறுதியானது.
இந் நிலையில் மறு நாள் ஞாயிற்றுக் கிழமை கொட்டகெத்தனவில் கொலைகள் இடம்பெற்ற இடங்களுக்கு சந்தேக நபர் அழைத்துச் செல்லப்பட்டார்.
அத்துடன் சந்தேக நபரின் வீட்டில் மறைத்து வைக்கப்பட்டிருந்த நாதன் பாப்புவை கொலை செய்ய பயன்படுத்தியதாக சந்தேகிக்கப்படும் கத்தி, அரிவாள் ஆகியவற்றுடன் பல்வேறு கொலைகளின்போதும் சந்தேக நபர் அணிந்திருந்ததாக கூறப்படும் இரத்தம் தோய்ந்த ஆடைகள் ஆகியன கைப்பற்றப்பட்டு டீ.என்.ஏ.பரிசோதனைக்காக ஜீன் டெக் நிறுவனத்துக்கு அனுப்பப்பட்டன.
இதனிடையே குற்றப் புலனாய்வுப் பிரிவுக்கு வாக்கு மூலம் அளித்த சந்தேக நபர் நாதன் பாப்பு உள்ளிட்ட பல கொலைகளை தானே செய்ததாக ஒப்புக்கொண்டுள்ளார்.
அந்த கொலைகளை பணத்துக்காகவும் பாலியல் இச்சைக்காகவுமே செய்ததாகவும் அவர் சுட்டிக்காட்டியுள்ளார். தனியாக இருக்கும் பெண்களை தான் இலக்காக கொண்டதாகவும் அவர்களின் தங்க ஆபரணங்களை கொலையின் பின் கொள்ளையிட்டு பணமாக்கியதாகவும் அவர் புலனாய்வுப் பிரிவுக்கு தெரிவித்துள்ளார்.
இந் நிலையில் தான் நாதன் பாப்புவின் கொலையின் போது அவரது கழுத்தில் இருந்த ஒன்றரை பவுண் நிறை கொண்ட தங்க தாலிக் கொடியை சந்தேக நபர் இலக்கு வைத்து கொள்ளையிட்டுள்ளமையை பொலிஸார் தெரிந்துகொண்டனர்.
அதன்படி உறவினர் ஒருவர் ஊடாக தாலிக் கொடியை அடகு வைத்திருந்த நிலையில் அதனை புலனாய்வுப் பிரிவினர் மீட்டுள்ளனர். அதில் தாலிக் கயிறு மட்டுமே இருந்ததாகவும் தாலியை தொடர்ந்து தேடி வருவதாகவும் புலனாய்வுப் பிரிவின் தகவல்கள் தெரிவித்தன.
உண்மையில் கொட்டகெத்தனவின் முதலாவது பெண் கொலையானது 2008 ஆம் ஆண்டு பதிவானது. 2008 ஜூலை 21 ஆம் திகதி செல்லம்மா மரியாள் என்ற 56 வயது மாது வெட்டிப்படுகொலை செய்யப்பட்டிருந்த நிலையில் அப்போது சடலமாக மீட்கப்பட்டார்.
அதன்பின்னர் நான்கு மாதங்கள் கழித்து அதாவது அதே ஆண்டின் நவம்பர் 19 ஆம் திகதி ஆரியவதி என்ற 52 வயதுடைய மாது கொடூரமாக கொலைச் செய்யப்பட்டார்.
இதனைத் தொடர்ந்து அடுத்த கொலை 2010 ஆம் ஆண்டில் பதிவானது. 2010 ஜூன் மாதம் பேபி நோனா என்ற 48 வயதுடைய பெண்ணும் அதே ஆண்டின் டிசம்பர் மாதம் 21 ஆம் திகதி ஹீன் மெனிகே என்ற 80 வயது மூதாட்டியும் கொலை செய்யப்பட்டனர்.
இவ்வாறு கொலை செய்யப்பட்ட அனைத்து பெண்களும் வயதில் கூடியவர்கள் என்பதுடன் சில மூதாட்டிகள் பாலியல் ரீதியாகவும் கொடுமைப்படுத்தப்பட்டபின்பே கொலை செய்யப்பட்டிருந்தனர்.
கொட்டகெத்தன முதலாவது பெண் கொலை கடந்த 2008 ஆம் ஆண்டு ஜூலை 21 ஆம் திகதி முதல் 2011 ஆம் ஆண்டு டிசம்பர் 31 வரையிலான 4 வருட காலப்பகுதிக்குள் 8 பெண் கொலைகள் இடம்பெற்றன.
2008 ஆம் ஆண்டு இரு கொலைகளும் 2010 ஆம் ஆண்டு இரு கொலைகளும் 2011 ஆம் ஆண்டு 4 கொலைகளும் இவ்வாறு இடம்பெற்றிருந்தன. 2009 ஆம் ஆண்டு எவ்விதமான கொலைகளும் கொட்டகெத்தனவில் பதிவாகவில்லை.
இந் நிலையில் தான் 2012 ஆம் ஆண்டு முதல் இக் கொலைகள் புதியவடிவமெடுத்தன. அதாவது அது வரை தனித்தனியாக இடம்பெற்ற பெண் கொலைகள் 2012 ஆம் ஆண்டு ஜனவரி 31 ஆம் திகதி நயனா நில்மினி, காவித்யா சத்துரங்கனி ஆகிய தாயையும் மகளையும் கொன்றதனூடாக இரட்டைக் கொலைகளாக பதிவாகத் தொடங்கின.
அதன்பின்னர் அதே ஆண்டு மே 31 ஆம் திகதி எஸ்.தயாவதி (61 வயது), எஸ்.திலகாவதி (65 வயது) ஆகிய சகோதரிகள் கொலைசெய்யப்பட்டிருந்தனர்.
தொடர்ந்து ஜூலை 17 ஆம் திகதி பிரேமாவதி என்ற 65 வயதுடைய தாயும் புஷ்பகுமாரி என்ற 32 வயதுடைய மகளும் கொல்லப்பட்டதுடன் ஒக்டோபர் 31 ஆம் திகதி யூ.ஏ. நந்தாவதி என்ற 66 வயதுடைய வயோதிப மாது கொலை செய்யப்பட்டார்.
இப்படியான ஒரு காலப்பகுதியில் தான் அதாவது, 2013 ஆம் ஆண்டு ஜூலை மாதம் பொலிஸ் மா அதிபரின் விசேட ஆலோசனைக்கு அமைய கொட்டகெத்தன தொடர் கொலைகளை கட்டுப்படுத்தவும் குற்றவாளிகளைக் கண்டறியவும் முன்னாள் பிரதிப் பொலிஸ் மா அதிபர் வாஸ் குணவர்த்தன அந்த பிரதேசத்துக்கு அனுப்பப்பட்டார்.
இதனையடுத்து கொட்டகெத்தனவில் அமைதியான ஒரு சூழல் ஏற்படத் தொடங்கியது. எனினும் வாஸ் குணவர்த்தன இடமாற்றப்பட்டு வர்த்தகர் சியாம் கொலை வழக்கில் கைதான பின்னர் மீண்டும் கொட்டகெத்தன திகில் மர்மம் தொடர ஆரம்பித்தது.
ஆரம்பத்தில் போதைப் பொருள் கடத்தல் மற்றும் பாவனை கும்பலுடன் தொடர்புபடுத்தி இந்த விவகாரம் பேசப்பட்டது.எனினும் கொட்டகெத்தனவின் பல கொலைகள் தொடர்பில் சந்தேக நபர்கள் பலர் கைதான போதும் பெண் கொலைகள் மட்டும் நின்றபாடில்லை.
இதனால் இப்பெண் கொலைகள் பலவும் ஒரே நபரால் அல்லது குழுவால் மேற்கொள்ளப்படுகிறதா? அப்படியானால் அவர் அல்லது அவர்கள் இன்றும் சுதந்திரமாக திரிகிறார்களா? என்ற சந்தேகம் தவிர்க்க முடியாதது.
இதற்குரிய பதிலை தர எவரும் முன்வராத போதும் கொட்டகெத்தன தொடர்பான விசேட விசாரணையொன்றை முன்னெடுத்த முன்னாள் பிரதிப் பொலிஸ் மா அதிபர் வாஸ் குணவர்த்தன பிரதான சந்தேக நபர் தொடர்பான வெளிப்படுத்தல்களை செய்துள்ளார்.
இந்த விவகாரத்தை விசாரணை செய்த அதிகாரி என்ற ரீதியில் முன்னாள் பிரதிப் பொலிஸ் மா அதிபர் வாஸ் குணவர்த்தன சொல்வதை அப்படியே நிராகரித்துவிட முடியாது. வாஸ் குணவர்த்தனவின் விசாரணை தகவல்களின் படி கொட்டகெத்தனவில் இடம்பெற்ற 14 கொலைகளிலும் ஒரே குழுவே சம்பந்தப்பட்டுள்ளதாக தெரிகிறது.
இதில் வாஸ் குணவர்த்தன பிரதான சந்தேக நபராக ‘மாலு ராஜ ‘ என அறியப்படும் நபரை பெயரிட்டுள்ளார். எனினும் குறித்த நபர் இதுவரை பொலிஸாரால் கைது செய்யப்படவில்லை என்பதுடன் அவர் இப்போது எங்கு எப்படி உள்ளார் என்பதையே அறிய முடியாதுள்ளது.
வாஸ் குணவர்த்தன கொட்டகெத்தனவில் இருந்த போது நின்றிருந்த தொடர் கொலைகள் மீண்டும் இந்த ஆண்டு ஜனவரி மாதம் 15 ஆம் திகதி சரியாக தைப் பொங்கலன்று தமிழ் யுவதி ஒருவரின் படுகொலையோடு மீண்டும் அரங்கேற ஆரம்பித்தன.
அதன்பின்னர் ஏப்ரல் மதம் 4 ஆம் திகதி சந்திராணி சுவர்ணலதா என்ற தாயின் கொலை இடம்பெற்றது. இது அவரது மகனால் புரியப்பட்டதாக கூறப்படும் நிலையில் தற்போது அதன் மர்மமும் துலங்க ஆரம்பித்துள்ளதாக அறிய முடிகின்றது.
இறுதியாகவே நாதன் பாப்புவின் கொலை இடம்பெற்றிருந்தது. இந் நிலையில் நாதன் பாப்புவின் கொலை தொடர்பில் கைது செய்யப்பட்ட நீல் லக் ஷ்மன் என்ற சந்தேக நபர் கொட்டகெத்தனவில் இடம்பெற்ற பல்வேறு கொலைகளுடன் தொடர்பினை கொண்டுள்ளார் என டீ.என்.ஏ.சான்றுகள் ஊடாகவும் விசாரணைகள் ஊடாகவும் புலனாய்வுப் பிரிவினர் உறுதி செய்துள்ளனர்.
குறிப்பாக 2012 ஆம் ஆண்டு மே மாதம் 31 ஆம் திகதி கொட்டகெத்தன வராபிட்டிய எனும் இடத்தில் கொலை செய்யப்பட்ட தயாவதி மற்றும் திலகாவதி ஆகிய வயோதிப சகோதரிகளின் படுகொலை உள்ளிட்ட ஆறு கொலைகள் தொடர்பில் தற்போது கைதுசெய்யப்பட்டுள்ள சந்தேக நபரின் டீ.என்.ஏ. கூறுகள் ஒத்துப் போவதாக ஜீன் டெக் கூறுகின்றது.
அத்துடன் தனது மகனால் கொலைசெய்யப்பட்டதாக பொலிஸாரால் கூறப்பட்ட சந்திராணி சுவர்ணலதா கொலையும், கடந்த 2012 ஆம் ஆண்டு ஜூலை 7 ஆம் திகதி நடந்த தாய் மகள் கொலை தொடர்பிலும் கூட இந்த சந்தேக நபரே தொடர்பு பட்டுள்ளதாக குற்றப் புலனாய்வுப் பிரிவு தகவல் வெளிப்படுத்திக்கொண்டுள்ளதாக பொலிஸ் தலைமையகத்தின் உயர் அதிகாரி ஒருவர் கேசரிக்கு தெரிவித்தார்.
உண்மையில் 2012 ஆம் ஆண்டு மே மாதம் 31 ஆம் திகதி இடம்பெற்ற வயோதிப சகோதரிகளின் இரட்டைக் கொலையை அடுத்து குற்றம் இடம்பெற்ற இடத்தை பரிசோதனை செய்த இரத்தினபுரி தடயவியல் நிபுணர்கள் சந்தேக நபரினுடையது என அனுமானிக்கத் தக்க வெற்றிலை எச்சிலைக் கண்டுபிடித்து அதிலிருந்து டீ.என்.ஏ. கூறுகளை கண்டறிந்தனர்.
பின்னர் கொலை செய்யப்பட்ட வயோதிப சகோதரிகள் துஷ்பிரயோகத்துக்கும் உட்படுத்தப்பட்டிருந்த நிலையில் அவர்களது மர்ம உறுப்பு பகுதியில் இருந்து பெறப்பட்ட சந்தேக நபரினுடையது என சந்தேகிக்கத் தக்க விந்தணுவில் இருந்து டீ.என்.ஏ. பெறப்பட்டது.
வெற்றிலை எச்சில் மற்றும் விந்தணு டீ.என்.ஏ.கூறுகள் ஒத்துப் போன நிலையில் தற்போது கைதான நபரின் டீ.என்.ஏ. மூலக் கூறுகள் அவற்றுடன் ஒப்பீடு செய்து பார்க்கப்பட்டுள்ளது. அதில் அதனுடன் சந்தேக நபரின் டீ.என்.ஏ.ஒத்துப் போவது உறுதியாகியுள்ளது.
இதே போன்று 2011 ஆம் ஆண்டு டிசம்பர் 15 ஆம் திகதி கொலைசெய்யப்பட்ட டீ.எம்.பண்டார மெனிகே என்ற பெண்ணின் உடலில் இருந்து பெறப்பட்ட சந்தேக நபரின் டீ.என்.ஏ. உடனும் தற்போது கைதாகியுள்ள நீல் லக் ஷ்மனின் டீ.என். ஏ.ஒத்துப் போயுள்ளது.
அதே நேரம் சிறிவர்தன முதியன்சலாகே மெனிகே என்ற பெண்ணின் கொலையுடனும் தற்போதைய சந்தேக நபரின் டீ.என்.ஏ.ஒத்துப் போயுள்ளது.
இதனை விட பிரேமாவதி புஷ்பகுமாரி ஆகிய தாய் மகள் கொலை தொடர்பிலும் அவர்களது மர்ம உறுப்பு பகுதியில் இருந்து பெறப்பட்ட விந்தணுவில் இருந்து பெற்ற டீ.என்.ஏ. உடன் தற்போதைய சந்தேக நபரின் மரபணுக் கூறுகள் ஒத்துப் போயுள்ளன.
அதன்படி இரு இரட்டைக் கொலைகள் உள்ளிட்ட 6 கொலைகள் தொடர்பில் மரபணு சோதனைகள் நீல் லக் ஷ்மனை சந்தேக நபராக தெளிவாக அடையாளம் காட்டியுள்ளன.
எனினும் மரபணு பரிசோதனைகள் முன்னெடுக்கப்படாத மேலும் பல பெண்கள் கொலையுடன் நீல் லக் ஷ்மனுக்கு தொடர்பிருப்பது புலனய்வுப் பிரிவு விசாரணையில் உறுதியாகியுள்ளதாக பொலிஸ் தலைமையகம் சுட்டிக்காட்டுகின்றது.
இந் நிலையில் தான் இவ்வருடம் மே மாதம் 28 ஆம் திகதி கொட்டகெத்தன தாய் மகள் படுகொலை தொடர்பில் சட்ட மா அதிபர் மேல் நீதிமன்றில் தாக்கல் செய்த வழக்கில் இருந்து நான்கு சந்தேக நபர்கள் போதிய சாட்சியம் இன்மையால் விடுதலை செய்யப்பட்டமையும் அந்த சம்பவத்தை நீல் லக் ஷ்மனே செய்துள்ளமையும் உறுதியாகியுள்ள நிலையில் அது தொடர்பில் விசாரணைகளை முன்னெடுத்த பொலிஸார் மற்றும் வழக்குத் தொடர்ந்த சட்ட மா அதிபர் தொடர்பில் தற்போது பாரிய சந்தேகங்கள் ஏற்பட்டுள்ளன.
அதே போன்று தான் தனது காதலிக்கு புத்தாடை வாங்க பணம் தர மறுத்ததால் கடந்த ஏப்ரல் மாதம் 4 ஆம் திகதி தாயைக் கொலைசெய்ததாக அவரது 18 வயது மகன் கைதுசெய்யப்பட்ட சம்பவத்துடனும் நீல் லக் ஷ்மனே தொடர்பு பட்டுள்ளதாக விசாரணைகளில் தகவல் கசிந்துள்ளதாக பொலிஸ் தலைமையக உயர் அதிகாரி ஒருவர் சுட்டிக்கட்டினார்.
அப்படியானால் இதுவரை கொட்டகெத்தன கொலை தொடர்பில் பொலிஸார் சரியான விசாரணை ஒன்றினை முன்னெடுக்கவில்லை என்றே எண்ணத் தோன்றுவதுடன் இது விடயத்தில் சட்ட மா அதிபரின் செயற்பாடுகளும் சந்தேகத்தையே வளர்க்கின்றது.
வாஸ் குணவர்த்தன
குற்றப் புலனாய்வுப் பிரிவினர் இதுவரை முன்னெடுத்த விசாரணைகளின் படி, முன்னர் வாஸ் குணவர்த்தன கூறிய விடயங்கள் உண்மையாகவே பார்க்கப்படுகின்றன.
ஏனெனில் பல கொலைகளுடன் ஒரே நபரே சம்பந்தப்பட்டுள்ளமை தற்போதும் வெளிப்படுத்தப்பட்டுள்ள உண்மையாகும். உண்மையில் தற்போது கைதுச் செய்யப்பட்டுள்ள நீல் லக்ஷ்மனிடம் குற்றப் புலனாய்வுப் பிரிவு முன்னெடுத்த விசாரணைகளில் டீ.என்.ஏ.உறுதி செய்யப்பட்ட ஆறு கொலைகளுக்கு மேலதிகமாக மேலும் 8 கொலைகளுடன் சந்தேக நபர் தொடர்பு பட்டுள்ளமை தொடர்பில் தகவல்கள் வெளிப்படுத்தப் பட்டுளதாக அறிய முடிகின்றது.
எனவே தான் கொட்டகெத்தன தொடர் பெண் கொலை தொடர்பிலான திகில் தற்போது விலகி மர்மம் துலங்க ஆரம்பித்துள்ளது. குற்றம் ஒன்றினைச் செய்துவிட்டு தப்பிக்க முடியாது என்ற குற்றவியலின் சித்தாந்தத்தின் படி கொட்டகெத்தன விவகாரமும் தீர்வை நோக்கி தற்போது நகர்கின்றது.
இந்த வேளையில், ஏற்கனவே இந்த விவகாரம் தொடர்பில் விசாரணை செய்த பொலிஸார் அப்போதைய சூழலை சமாளிக்க அப்பாவிகளை சந்தேக நபர்களாக காட்டி, அவர்களுக்கு எதிராக நடவடிக்கை எடுத்தனரா என்பதே இப்போது எழும் புதிய பிரச்சினையாகும்.
ஏற்கனவே புலனாய்வுப் பிரிவு அது தொடர்பில் அவதானம் செலுத்தியுள்ள நிலையில், அது தொடர்பில் கூடிய கவனம் செலுத்தப்பட்டு குற்ற விசாரணை தொடர்பில் தமது பொறுப்பை மீறிய அதிகாரிகள் உடன் சட்டத்தின் முன் நிறுத்தப் பட வேண்டும். அவ்வாறு இடம்ப பெற்றாலே கொட்டகெத்தன விவகாரத்துக்கு உண்மையில் விடிவு கிடைக்கும்.
-எம்.எப்.எம்.பஸீர்-