முள்ளிவாய்க்கால் மண்ணில் நினைவேந்தல் கதறி அழுத உறவுகள் (வீடியோ, படங்கள் இணைப்பு)

முள்ளிவாய்க்கால் நினைவேந்தல் இன்று காலை 9.00 மணியளவில் வடக்கு மாகாணசபை ஏற்பாட்டில் முள்ளிவாய்க்காலில் நடைபெறுகின்றது.

இதன்போது யுத்தத்தில் படுகொலை செய்யப்பட்டவர்களுக்கான ஆத்ம சாந்திப் பிரார்த்தனை, மலரஞ்சலி செலுத்துதல், தீபமேற்றுதல் போன்ற நிகழ்வுகள் நடைபெறுள்ளது.

வடமாகண முதலமைச்சர் தலைமையில் ஆரம்பமாகியுள்ளது.

இந்நினைவு தினத்தில், பாராளுமன்ற உறுப்பினர்கள், மாகாணசபை அமைச்சர்கள், மாகாண சபை உறுப்பினர்கள், பொது அமைப்புக்களின் பிரதிநிதிகள், மதப் பெரியார்கள், பொதுமக்கள் ஆகியோர் கலந்து கொண்டுள்ளனர்.

இதேவேளை வடக்கு மாகாணத்தின் அனைத்து மாவட்டங்களிலும் உள்ள மத வழிபாட்டுத் தலங்களிலும் இன்று காலை 6.00 மணிமுதல் 9.00 மணி வரை யுத்தத்தின் போது படுகொலை செய்யப்பட்டவர்களின் ஆத்ம சாந்திக்கான பிரார்த்தனைகளில் மக்கள் ஈடுபட்டனர்.

2009ம் ஆண்டு இதே நாள் சர்வதேச யுத்த விதிகளை மீறி கொத்துக் கொத்தாக தமிழ் மக்கள் கொன்றொழிக்கப்பட்டுள்ளனர்.

தமிழ்மக்களின் வரலாற்றில் மறக்க முடியாத நாள் இன்றைய நாளாகும்.

தொடர்ந்து மாலை 5.00 மணி வரை மேற்படி நிகழ்வுகள் நடைபெறுவதற்கான ஒழுங்குகள் செய்யப்பட்டுள்ளமை குறிப்பிடத்தக்கது.

முள்ளிவாய்க்கால் தமிழின படுகொலையின் ஏழாம் ஆண்டு நினைவுதினம் இன்று நாட்டின் வடக்கு கிழக்கு மற்றும் புலம்பெயர் தமிழர்கள் வாழும் பெரும்பாலான நாடுகளில் உணர்வு பூர்வமாக அனுஷ்டிக்கப்படுகின்றது.

வட மாகாண சபையின் ஏற்பாட்டில் முதலமைச்சர் சீ.வி.விக்னேஸ்வரன் தலைமையில் முள்ளிவாய்க்காலில் பிரதான நினைவேந்தல் நிகழ்வு இடம்பெறவுள்ளதாக தெரிவிக்கப்பட்டுள்ளது.

முள்ளிவாய்க்கால் படுகொலையை நினைவுகூரும் வகையில் கடந்த 12ஆம் திகதி முதல் தமிழினப் படுகொலை வாரம் அனுஷ்டிக்கப்பட்டு வரும் நிலையில் இன்று இறுதி நாள் நினைவேந்தல் நிகழ்வாகவும் இது அமையவுள்ளது.

இதேவேளை, இறுதி யுத்தத்தின்போது 70 ஆயிரத்திற்கும் மேற்பட்ட தமிழ் மக்கள் படுகொலை செய்யப்பட்டதை நினைவுகூறும் முகமாக இன்றைய தினம் வடக்கு கிழக்கில் பூரண ஹர்த்தாலுக்கு அழைப்பு விடுக்கப்பட்டுள்ளது.

வட மாகாணத்தின் முல்லைத்தீவு மற்றும் கிளிநொச்சி மாவட்டங்களில் முழுமையான ஹர்த்தால் கடைப்பிடிக்கப்படுமென வர்த்தக சங்கங்கள் அறிவித்துள்ளன.

மேலும், வடக்கு கிழக்கின் ஏனைய மாவட்டங்களிலும் பூரண ஹர்த்தால் கடைப்பிடிக்குமாறு பொது அமைப்புக்கள் கோரிக்கை விடுத்துள்ளன.

2006ஆம் ஆண்டில் மாவிலாற்றில் ஆரம்பித்த நீர்ப் பிரச்சினை 2009ஆம் ஆண்டு முள்ளிவாய்க்கால் படுகொலைகளுடன் தமிழீழ விடுலைப் புலிகளின் ஆயுதப்போராட்டம் முடிவுக்கு வந்தது.

புலிகளை முழுமையாக அழித்துவிடவேண்டும் எனவும், தாக்குதல் திட்டத்தினை திசைமாற்றிவிடக்கூடாது என்பதற்காகவும் ஸ்ரீலங்கா இராணுவத்தினர் பொதுமக்கள் மீது திட்டமிட்டு தாக்குதல்களை நடத்தியதாக குற்றச்சாட்டுகள் முன்வைக்கப்பட்டுள்ளன.

புதுமாத்தளன் முதல் அம்பலவன்பொக்கணை, வலைஞர்மடம், கரையாமுள்ளிவாய்க்கால், வெள்ளாமுள்ளிவாய்க்கால் ஆகிய பகுதிகளை பாதுகாப்பு வலையமாக அப்போதைய அரசாங்கம் அறிவித்ததோடு, அந்த பிரதேசங்களிலேயே பொதுமக்கள் படுகொலை செய்யப்பட்டதாக சர்வதேசம் குற்றஞ்சாட்டியுள்ளது.

இந்நிலையில், 2009 மே 18ஆம் திகதி இறுதி யுத்தம் முடிவுக்கு கொண்டுவரப்பட்டதோடு, 45 ஆயிரத்திற்கும் அதிகமான பொதுமக்கள் படுகொலை செய்யப்பட்டதாக ஐக்கிய நாடுகள் சபையின் அறிக்கையில் தெரிவிக்கப்பட்டுள்ளமை குறிப்பிடத்தக்கது.