தற்போது தென்மேற்கு வங்கக் கடல் பகுதியில் நிலை கொண்டிருக்கும் காற்றழுத்தத் தாழ்வு மண்டலம் புயலாக வலுப்பெற்று டிசம்பர் 2ஆம் தேதி மாலையோ, இரவோ இலங்கையைக் கடந்து குமரிக் கடல் பகுதியை வந்தடையும் என வானிலை ஆய்வு மையம் தெரிவித்துள்ளது.
இது புயலாக வலுப்பெற்றால், அதற்கான பெயர் “புரேவி” என்று அதிகாரப்பூர்வமாக வைக்கப்படும் என்றும் வானிலை மைய இயக்குநர் புவியரசன் கூறியுள்ளனர்.
இலங்கையில் என்ன நிலவரம்?
வங்காள விரிகுடாவில் ஏற்பட்டுள்ள தாழ்வு மண்டலத்தை அடுத்து, கிழக்கு மாகாணத்தில் உள்ள அனைத்து பாடசாலைகளும் முன்னெச்சரிக்கை நடவடிக்கையாக மூடப்படும் என அறிவிக்கப்பட்டுள்ளது.
முந்தைய ஆறு மணி நேரத்தில் மணிக்கு 13 கி.மீ வேகத்தில் மேற்கு நோக்கி ஆழமான காற்றழுத்தம் நகர்ந்து வருகிறது. திரிகோணமலையில் இருந்து தென்கிழக்கே 460 கி.மீ தூரத்திலும் கன்னியாகுமரியில் இருந்து 860 கி.மீ தூரத்திலும் இந்த காற்றழுத்த தாழ்வு இருப்பதால், அடுத்த 12 மணி நேரத்தில் இது புயலாக தீவிரமாகக் கூடும் என்று வானிலை ஆய்வு மையம் தெரிவித்துள்ளது.
இந்த புயல் மேற்கு, வடமேற்கு திசை நோக்கி திரிகோணமலைக்கு வெகு அருகே டிசம்பர் 2ஆம் தேதி மணிக்கு 75 கி.மீ முதல் 95 கி.மீ வேகத்தில் காற்று வீசக்கூடும். அது மன்னார் வளைகுடா பகுதியில் டிசம்பர் 3ஆம் தேதி காலையில் வந்தடைந்து அங்கிருந்து கன்னியாகுமரி பாம்பன் இடையே டிசம்பர் 4ஆம் தேதி அதிகாலையில் கடக்க வாய்ப்புள்ளதாக இந்திய வானிலை ஆய்வு மையம் தெரிவித்துள்ளது.
இதன் காரணமாக இன்று தஞ்சாவூர், திருவாரூர், நாகப்பட்டினம், புதுக்கோட்டை, சிவகங்கை, ராமநாதபுரம், திருநெல்வேலி, தூத்துக்குடி, கன்னியாகுமரி மாவட்டங்களில் ஓரிரு இடங்களில் கன மழையும் ஏனைய மாவட்டங்கள், புதுவை, காரைக்கால் பகுதிகளில் பெரும்பாலான இடங்களில் லேசானது முதல் மிதமான மழையும் பெய்யக்கூடும் என்றும் தெரிவிக்கப்பட்டுள்ளது.
காற்றழுத்த தாழ்வுநிலை காரணமாக, டிசம்பர் 2ஆம் தேதியன்று தென்காசி, ராமநாதபுரம், திருநெல்வேலி, தூத்துக்குடி, கன்னியாகுமரி, மாவட்டங்களில் ஓரிரு இடங்களில் இடி மின்னலுடன் கூடிய அதி கன மழையும், புதுக்கோட்டை, சிவகங்கை, விருதுநகர், மதுரை தஞ்சாவூர், திருவாரூர், நாகப்பட்டினம், காரைக்கால், மயிலாடுதுறை, கடலூர், அரியலூர், பெரம்பலூர், மாவட்டங்களில் ஓரிரு இடங்களில் இடி மின்னலுடன் கூடிய கன முதல் மிக கன மழையும், திருவள்ளூர், காஞ்சிபுரம், நாமக்கல், கரூர், திண்டுக்கல் மாவட்டங்களில் ஓரிரு இடங்களில் இடி மின்னலுடன் கூடிய கன மழையும், ஏனைய மாவட்டங்களில் அநேக இடங்களில் மிதமான மழையும் பெய்யக்கூடும் என்றும் வானிலைய ஆய்வு மையம் தெரிவித்துள்ளது.
ராமநாதபுரம், திருநெல்வேலி, தூத்துக்குடி, கன்னியாகுமரி, புதுக்கோட்டை, சிவகங்கை, மாவட்டங்களில் சூறாவளி காற்று மணிக்கு மணிக்கு 40 முதல் 50 கிலோமீட்டர் வேகத்திலும் இடையிடையே 60 கிலோமீட்டர் வேகத்திலும் வீசக்கூடும்.
டிசம்பர் 3ஆம் தேதியன்று தென்காசி, திருநெல்வேலி, தூத்துக்குடி, கன்னியாகுமரி, மாவட்டங்களில் ஓரிரு இடங்களில் இடி மின்னலுடன் கூடிய அதி கன மழையும், சிவகங்கை, விருதுநகர், ராமநாதபுரம், மாவட்டங்களில் ஓரிரு இடங்களில் இடி மின்னலுடன் கூடிய கன முதல் மிக கன மழையும், கடலோர மாவட்டங்கள் மற்றும் புதுவை, காரைக்கால் பகுதிகளில் மிதமான மழையும், உள் மாவட்டங்களில் அநேக இடங்களில் லேசானது முதல் மிதமான மழையும் பெய்யக்கூடும்.
ராமநாதபுரம், திருநெல்வேலி, தென்காசி, தூத்துக்குடி, கன்னியாகுமரி புதுக்கோட்டை, சிவகங்கை, விருதுநகர் மாவட்டங்களில் சூறாவளி காற்று மணிக்கு மணிக்கு 50 முதல் 60 கிலோமீட்டர் வேகத்திலும் இடையிடையே 70 கிலோமீட்டர் வேகத்திலும் வீசக்கூடும்.
சென்னை மற்றும் புறநகர் பகுதிகளைப் பொறுத்தவரை அடுத்த 48 மணி நேரத்திற்கு வானம் ஓரளவு மேக மூட்டத்துடன் காணப்படும். நகரின் சில பகுதிகளில் லேசானது முதல் மிதமான மழை பெய்யக்கூடும்.
தூத்துக்குடி துறைமுகத்தில் 3ஆம் எண் புயல் எச்சரிக்கைக் கூண்டு ஏற்றப்பட்டுள்ளது. அப்பகுதியைச் சேர்ந்த மீனவர்கள் கடலுக்கு மீன்பிடிக்கச் செல்லவில்லை.
கடந்த 24 மணி நேரத்தில் அதிகபட்சமாக நாகப்பட்டினம் மாவட்டம் திருப்பூண்டி, வேதாரண்யம் ஆகிய இடங்களில் தலா நான்கு சென்டிமீட்டர் மழை பதிவாகியுள்ளது. மயிலாடுதுறையில் 3 செ.மீ. மழையும் நாகப்பட்டினம், குடவாசல் பகுதிகளில் தலா 2 செ.மீ. மழையும் பதிவாகியுள்ளது.