காக்க… காக்க… கல்லீரல் காக்க! பிரச்னைகள், அறிகுறிகள், தீர்வுகள்

கல்லீரல் – ஓர் அறிமுகம்

நம் உடலினுள் இருக்கும் இதயம், கணையம், சிறுநீரகம் போன்ற திட உறுப்புகளிலேயே மிகப்பெரிய உறுப்பு கல்லீரல்தான். மிக அதிகமான பணிகளைச் செய்வதும் கல்லீரல்தான்.

கிட்டத்தட்ட 500-க்கும் அதிகமான வேலைகள் கல்லீரலால் நடக்கின்றன. குறிப்பாக நம் ரத்தத்தில் இருக்கும் அசுத்தங்களை அகற்றி (Detoxification) சுத்திகரிக்கும் பணியை கல்லீரலே செய்கிறது.

அல்புமின் போன்ற சில முக்கியமான புரதங்களின் உற்பத்தியும், செரிமான சக்திக்கான பித்தநீரின் உற்பத்தியும், எதிர்ப்பு சக்தியைத் தரும் இம்யூனோகுளோபுலின் போன்ற புரத உற்பத்தியும் கல்லீரலிலேயே நடக்கிறது.

மேலும், ரத்தம் உறைவதற்குத் தேவையான சில மூலப்பொருள்களும் கல்லீரலாலேயே உற்பத்தியாகின்றன. இதுபோன்ற முக்கியமான பணிகளுடன் சர்க்கரை அளவைப் பராமரிப்பது போன்ற சிறு உதவிகளையும் கல்லீரல் செய்கிறது.

அத்தகைய கல்லீரலின் ஆரோக்கியம் காக்க வேண்டியதன் அவசியத்தையும் அதற்கான வழிகளையும் பகிர்கிறார், சென்னை, காவேரி மருத்துவமனையைச் சேர்ந்த கல்லீரல் மாற்று சிகிச்சை சிறப்பு மருத்துவர் சுவாதி ராஜு.

கல்லீரலில் ஏற்படும் பிரச்னைகள்:

கல்லீரலில் அழற்சி ஏற்படுவது, வீக்கம் உண்டாவது, தொற்று பரவுவது போன்ற பிரச்னைகளை கல்லீரல் சந்திக்கும். இந்த ஒவ்வொரு நோய்க்கும் ஒவ்வொரு விதமான மூல காரணம் இருக்கிறது.

கல்லீரலில் வீக்கம் ஏற்படும்போதே அதனைக் கண்டறிந்து உரிய சிகிச்சை எடுக்க வேண்டும். இல்லாவிட்டால் வீக்கம் அதிகரித்து நாளடைவில் சுருக்கம் உண்டாகிவிடும். இதை ‘லிவர் சிரோசிஸ்’ (Liver cirrhosis) என்று சொல்கிறோம்.

கல்லீரலில் ஏற்படும் இந்த சிரோசிஸ் நிலை என்பது ஆபத்தானது. சிகிச்சை அளிக்க முடியாதது. இதனால் கல்லீரல் மாற்று சிகிச்சை செய்ய வேண்டிய நிலைக்கு ஆளாக வேண்டியிருக்கும்.

கல்லீரல் பாதிக்கப்படுவதன் காரணங்கள்

கல்லீரலின் நலம் கெடுவதற்கான, நம் எல்லோருக்கும் தெரிந்த ஒரு காரணம் ஆல்கஹால். மது அருந்தினால் கல்லீரல் பாதிக்கப்படும் என்ற விழிப்புணர்வு ஓரளவு பரவலாக உண்டாகியுள்ளது.

ஆனால், ‘நான் ஆல்கஹாலிக்’ (Non alcoholic liver disease) பற்றி இன்னும் பலருக்கும் விழிப்புணர்வு ஏற்படுத்த வேண்டியது அவசியமாக உள்ளது. உடல் பருமன், நீரிழிவு, தைராய்டு, கொலஸ்ட்ரால், மரபியல் காரணங்கள் போன்ற Non alcoholic பிரச்னைகள் இன்று கல்லீரலை அதிகம் பாதிக்கும் காரணிகளாக உள்ளன.

‘நான் ஆல்கஹாலிக்’ என்று சொல்கிற உடல்பருமன், தைராய்டு, டயாபட்டீஸ், கொலஸ்ட்ரால் போன்றவற்றிலும் கவனம் செலுத்த வேண்டும். இப்போது 30 வயதுகளில் உள்ளவர்களே Non Alcoholic பிரச்னைகளால் பாதிக்கப்படுகின்றனர்.

உடற்பயிற்சி இல்லாமல், சரியான உணவுமுறையைக் கடைப்பிடிக்காமல் இருக்கும்பட்சத்தில் அது இன்னும் கூடுதலாக உடல்நலனைக் கெடுக்கும். கல்லீரலில் கொழுப்பு சேரும். இதுபற்றி விழிப்புணர்வு வேண்டும்.

இந்தக் காரணங்கள் தவிர சில மருந்துகள், ஆன்டிபயாட்டிக்குகள், வலி நிவாரணிகள் போன்றவற்றாலும் கல்லீரலில் சேதம் உண்டாகலாம். சில வைரஸ்கள் கல்லீரலை மட்டுமே தாக்கும். ஹெபடைட்டிஸ் ஏ, பி, சி, ஈ போன்ற வைரஸ்களால் கல்லீரல் பாதிக்கப்படலாம். ஆட்டோ இம்யூன் பாதிப்பின் காரணமாகவும் கல்லீரல் பாதிக்கப்படலாம்.

மது என்பது மதுதான்…

ஆல்கஹால் ஒவ்வொரு மனிதருக்கும் ஒவ்வொரு விதமாக உடலில் வினையாற்றுகிறது. இது தனிநபரின் உடல் மெட்டபாலிச நடவடிக்கைக்கேற்ப மாறும். அதனால் அதிகம் குடித்தால்தான் பிரச்னை, கம்மியாக குடித்தால் பிரச்னை இல்லை, எப்போதாவது மது அருந்தினால் ஒன்றும் ஆகாது என்றெல்லாம் சொல்லிவிட முடியாது. எவ்வளவு என்றாலும் மது என்பது கெடுதிதான்.

ஏற்கெனவே நம் வாழ்க்கை முறையும் தவறாக இருக்கும் சூழ்நிலையில், மதுவும் அதனுடன் ஒன்று சேரும்போது விளைவுகள் மோசமாக மாறும். உடல்பருமன், கொலஸ்ட்ரால், ரத்த அழுத்தம், நீரிழிவு என வேறு பிரச்னைகள் இருக்கும்பட்சத்திலும் Second risk factor என்கிற கூடுதல் விளைவாக ஆல்கஹால் செயல்படும். இதில் இவருக்கு பிரச்னை வரலாம், இவருக்கு வராது என்றும் சொல்ல முடியாது.

பெண்களுக்கு கூடுதல் ஆபத்து

மதுவால் வரும் கல்லீரல் நோய் பெண்களுக்கு கூடுதல் ஆபத்து. மது அருந்தும் ஆண்களுக்கு உண்டாகும் பாதிப்பைக் காட்டிலும், பெண்களுக்கு ஏற்படும் பாதிப்பின் தீவிரம் அதிகம். ஏனெனில், பெண்களின் உடல் அமைப்பு வேறுவிதமாக உள்ளது.

அறிகுறிகள் இல்லாத கல்லீரல் நோய்

கல்லீரலின் ஆரோக்கியம் கெடுகிறது என்பதை முன்கூட்டியே உணர்வது கடினம். சுமார் 70 சதவிகித நோயாளிகளுக்கு எந்த அறிகுறிகளும் காட்டுவதில்லை.

குறிப்பாக, ‘ஃபேட்டி லிவர்’ (Fatty liver) பிரச்னையில் அறிகுறியைத் தெரிந்துகொள்ளவே முடியாது. ஆனால், கல்லீரலில் வீக்கம் ஆரம்பிக்கும்போது சில அறிகுறிகளைத் தெளிவில்லாமல் உணர முடியும். வயிற்றில் அசௌகர்ய உணர்வு ஏற்படும், வாந்தி உணர்வு இருக்கும்.

மாஸ்டர் ஹெல்த் செக்கப் செய்யும்போது அதில் Liver function test செய்வார்கள். அப்போது கல்லீரலில் அசாதாரண நிலையைத் தெரிந்துகொள்ளலாம்.

சிரோசிஸ் என்ற கல்லீரல் சுருக்கம் உண்டானால் கால்களில் வீக்கம், வயிற்று உப்புசம், எளிதாக தொற்று ஏற்படுவது, ரத்தம் உறையும் தன்மை குறைவதால் எளிதாக ரத்தக்கசிவு போன்றவை உண்டாகும்.

ஓர் இடத்தில் அடிபட்டுவிட்டால் நீண்ட நேரம் ரத்தக்கசிவு இருக்கும். வாந்தி உண்டாகும். மேலும், சிரோசிஸ் தீவிரமாகும்போது மந்தமாக இருப்பது, குழப்பமான மனநிலை உண்டாகும். ஆரம்ப நிலையில் அறிகுறி தெரியாது.

வைரஸ் தொடர்பான பிரச்னை, ஆல்கஹால், தொடர்பான பிரச்னைகளிலும் கல்லீரலில் ஏற்படும்போது அறிகுறிகள் தெரியும். ஆனால், Fatty liver பிரச்னைக்கான அறிகுறிகள் தெரியாது. வருடம் ஒருமுறை மாஸ்டர் ஹெல்த் செக்கப் செய்தால் கண்டுபிடிக்கலாம்.

பரிசோதனை முறைகள்

ரத்தப் பரிசோதனை, அல்ட்ரா சவுண்ட் ஸ்கேன் போன்ற பரிசோதனைகளில் கல்லீரலின் நிலையைக் கண்டுபிடிக்கலாம். சிரோசிஸ் நிலையென்றால் எண்டாஸ்கோப்பியும் சேர்த்துச் செய்யலாம்.

கல்லீரல் ஆரோக்கியத்துக்கு…

கல்லீரல் ஆரோக்கியத்துக்கு சமச்சீரான உணவுமுறை, கார்போஹைட்ரேட் குறைவாக எடுத்துக் கொள்வது, கொழுப்புள்ள உணவுகளைத் தவிர்ப்பது முக்கியம். துரித உணவுகளைத் தவிர்க்க வேண்டும். புரத உணவுகளைச் சேர்த்துக் கொள்ள வேண்டும். ஃப்ரெஷ்ஷான பழங்கள், காய்கறிகள், சாலட் போன்றவற்றை சேர்த்துக் கொள்ளலாம்.

பிளாக் காபி கல்லீரலுக்கு நல்லது

பால் மற்றும் சர்க்கரை சேர்க்காத பிளாக் காபி ஒரு நாளைக்கு இரண்டு கப் பருகுவது கல்லீரல் ஆரோக்கியத்துக்கு மிகவும் நல்லது என்று சமீபத்தில் ஓர் ஆய்வில் கண்டறிந்திருக்கிறார்கள். எனவே பிளாக் காபி பருகலாம்.

உடற்பயிற்சி உதவும்

ஏதேனும் ஓர் உடற்பயிற்சியினை தினமும் 30 முதல் 40 நிமிடங்கள் மேற்கொள்ள வேண்டும். நீச்சல், சைக்கிளிங், வாக்கிங், ரன்னிங் என எதுவாகவும் இருக்கலாம். விளையாட்டுகளிலும் ஈடுபடலாம்.

வாரத்தில் 6 நாள்கள் இதுபோல் உடல்சார்ந்த இயக்கம் தேவை. இதனால் நம் உடலின் பி.எம்.ஐ அளவை சரி செய்ய முடியும். பி.எம்.ஐ 25-க்கும் கீழ் இருப்பது போல் பராமரிக்க வேண்டும். உயரத்துக்கேற்ற எடையைப் பராமரிக்க வேண்டும்.

பிரச்னைக்கேற்ற சிகிச்சைகள்..

எதனால் கல்லீரல் பாதிக்கப்பட்டிருக்கிறது என்ற காரணத்தைக் கண்டறிய வேண்டும். அதற்கேற்பவே சிகிச்சை முடிவு செய்யப்படும். ஆல்கஹால் காரணமாக கல்லீரல் பாதிக்கப்பட்டிருந்தால் ஆல்கஹாலை நிறுத்த வேண்டும்.

கல்லீரல் கொழுப்பு இருக்கிறது, நீரிழிவு இருக்கிறது, உடல் பருமன் இருக்கிறது, தைராய்டு கட்டுப்பாட்டில் இல்லை என்றால் அதற்கேற்ற சிகிச்சையை வழங்க வேண்டும்.

வைரஸ் காரணமாக கல்லீரல் பாதிப்பு ஏற்பட்டால் Anti viral medications இருக்கின்றன ஆட்டோ இம்யூன் டிஸ் ஆர்டர் என்றால் அதற்கேற்ற சிகிச்சை கொஞ்சம் சிக்கலாக இருக்கும். குணமடைய வைக்க முடியாது.

ஆனால், ஸ்டீராய்டு போன்ற மருந்துகள் கொடுத்து கட்டுப்பாட்டில் வைக்க முடியும். கல்லீரலின் பாதிப்பு எந்த நிலையில் இருக்கிறது என்று கண்டறிய வேண்டும். வீக்க நிலையில் இருக்கிறதா அல்லது சுருங்கும் நிலைக்குச் சென்றுவிட்டதா என்பதைப் பார்க்க வேண்டும். சிரோசிஸ் நிலையென்றால் கல்லீரல் மாற்று சிகிச்சைதான் செய்ய வேண்டும்.

கல்லீரலின் ரத்தக்கசிவு…

கல்லீரலின் ரத்தக்கசிவு சாதாரண நிலையில் இருக்கும்போது அது வெளியில் தெரியாது. ரத்தக்கசிவு அதிகமானால் ரத்த வாந்தி, மலம் கறுப்பு நிறமாவது போன்ற அறிகுறிகள் தெரியும்.

சிரோசிஸ் நிலைக்கு கல்லீரல் வந்து, மஞ்சள் காமாலை குறையாதபட்சத்திலும், தூக்கம் வருவது போன்ற மயக்க நிலை, வயிறில் நீர் சேர்வது, மருந்துகள் கொடுத்தும் கட்டுப்படுத்த முடியவில்லை என்கிற பட்சத்திலும் கல்லீரல் மாற்று சிகிச்சையை விரைவாக செய்ய வேண்டும்.

ஏனெனில், சிகிச்சை அளித்து குணமாக்க முடியாத நிலைக்கு கல்லீரல் சென்றுவிட்டது என்பதற்கான அறிகுறிகள்தான் இவையெல்லாம். கல்லீரல், தான் செய்ய வேண்டிய அடிப்படை வேலைகளையே செய்ய முடியாத நிலைக்குப் போய்விட்டது என்றும் புரிந்துகொள்ளலாம். மருந்துகள் சிறிதளவுகூட பலனளிக்காது.

கல்லீரல் மாற்று சிகிச்சை…

கல்லீரல் மாற்று சிகிச்சை என்பது ஒருவரிடம் இருக்கும் கல்லீரலை அப்படியே மொத்தமாக எடுத்து பாதிக்கப்பட்டவருக்கு வைப்பதல்ல. கல்லீரலின் சிறிய பகுதியை அகற்றி, பாதிக்கப்பட்டவருக்கு வைக்கலாம். கல்லீரல் தானாகவே வளர்ந்துவிடும்.

எனவே, உயிருடன் இருக்கும் கொடையாளரிடம் இருந்தும் கல்லீரலை தானம் பெறலாம். இறந்தவரின் கல்லீரலை எடுத்தும் மாற்று சிகிச்சை செய்யலாம்.

ஹெபடைட்டிஸ் பாதிப்பு, ஆல்கஹால் அல்லாத கல்லீரல் கொழுப்பு கொண்டவர்களுக்கு கல்லீரலில் புற்றுநோய் வரும் வாய்ப்பு அதிகம். இதனால் கல்லீரலின் செயல்திறன் வேகமாகக் குறையும். சிடி ஸ்கேன் எடுத்தால் இந்த நிலை புரிந்துவிடும்.

ஆரம்ப நிலையிலேயே கண்டறிந்துவிட்டால் கல்லீரல் மாற்று சிகிச்சை செய்து குணப்படுத்திவிடலாம். உடலின் மற்ற பாகங்களுக்கு, ரத்தக்குழாய்களுக்கு, நெறிக்கட்டிகளுக்கு, நுரையீரலுக்குப் பரவினால் குணப்படுத்துவது சிரமமாகிவிடும்.

சென்னை, காவேரி மருத்துவமனையைச் சேர்ந்த கல்லீரல் மாற்று சிகிச்சை சிறப்பு மருத்துவர் சுவாதி ராஜு. Vikadan