பொதுவாக எல்லா காலங்களிலும் மலிவு விலையில் கிடைக்கக்கூடிய காய்கறிகளில் வாழைப்பூ முக்கிய இடம் வகிக்கிறது. ஆனால், அதனை சுத்தம் செய்து நறுக்க நேரம் அதிகம் தேவைப்படுவதால் பலர் சமையலில் பயன்படுத்தாமல் தவிர்த்து விடுகின்றனர்.
உண்மையில், வாழைப்பூவில் இரும்புச்சத்து, நார்ச்சத்து, வைட்டமின் A, C, E, K, பொட்டாசியம், மெக்னீசியம் போன்ற பல அத்தியாவசிய சத்துக்கள் நிறைந்துள்ளன. குறிப்பாக இரும்புச்சத்து குறைபாடு, ரத்தச்சோகை போன்ற பிரச்சனைகளுக்கு வாழைப்பூ மிகவும் சிறந்த உணவாக கருதப்படுகிறது.
வாரம் ஒருமுறை வாழைப்பூ உணவில் சேர்த்தாலே உடலுக்குத் தேவையான முக்கிய சத்துக்கள் கிடைக்கும். அந்த வகையில், சுவையாகவும் ஆரோக்கியமாகவும் தயாரிக்கக்கூடிய வாழைப்பூ வடை செய்முறையை இங்கே பார்க்கலாம்.
தேவையான பொருட்கள்
-
வாழைப்பூ – 50 கிராம்
-
பெரிய வெங்காயம் – 2 (பொடியாக நறுக்கியது)
-
துவரம் பருப்பு – 100 கிராம்
-
மிளகாய் தூள் – 1 தேக்கரண்டி
-
தனியாத்தூள் – 1 தேக்கரண்டி
-
இஞ்சி – பூண்டு பேஸ்ட் – 1 தேக்கரண்டி
-
கொத்தமல்லி – சிறிதளவு
-
உப்பு – தேவையான அளவு
-
எண்ணெய் – பொரிப்பதற்கு தேவையான அளவு
செய்முறை
-
முதலில் துவரம் பருப்பை ஒரு பாத்திரத்தில் போட்டு தண்ணீர் சேர்த்து 2–3 மணி நேரம் ஊறவைக்கவும்.
-
வாழைப்பூவை நன்கு சுத்தம் செய்து பொடியாக நறுக்கி வைத்துக் கொள்ளவும்.
-
ஒரு பாத்திரத்தில் நறுக்கிய பெரிய வெங்காயம், கொத்தமல்லி, இஞ்சி–பூண்டு பேஸ்ட் ஆகியவற்றை சேர்த்து நன்றாக கலக்கவும்.
-
அதனுடன் உப்பு, மிளகாய் தூள், தனியாத்தூள் சேர்த்து மீண்டும் கலந்து கொள்ளவும்.
-
சுத்தம் செய்த வாழைப்பூவை மிக்ஸியில் ஒரு தடவை மட்டும் அரைத்து (மெலிதாக இல்லாமல்) கலவையில் சேர்க்கவும்.
-
ஊற வைத்த துவரம் பருப்பையும் கொரகொரப்பாக அரைத்து அதனுடன் சேர்த்து நன்றாக கலக்கவும்.
-
கலவையை 5 நிமிடங்கள் ஓய்வில் வைக்கவும்.
-
பின்னர் வடை போல் தட்டி எடுத்து, எண்ணெய் சூடானதும் பொன்னிறமாக பொரித்து எடுக்கவும்.
ஆரோக்கிய நன்மைகள்
-
இரும்புச்சத்து குறைபாட்டை சரிசெய்ய உதவும்
-
ரத்த ஓட்டத்தை மேம்படுத்தும்
-
ஜீரண சக்தியை அதிகரிக்கும்
-
பெண்களுக்கு மாதவிடாய் கால சோர்வை குறைக்கும்
-
உடலுக்கு தேவையான நார்ச்சத்தையும் வழங்கும்
மொறு மொறுப்பான சுவையில், ஆரோக்கியம் நிறைந்த வாழைப்பூ வடை தயார்!
காலை அல்லது மாலை சிற்றுண்டியாக குடும்பத்தினருக்கு செய்து கொடுத்தால் அனைவரும் விரும்பி சாப்பிடுவார்கள்