தற்காலத்தில் வயது வேறுபாடுகள் இன்றி, உலகளவில் அதிக உயிரிழப்புகளுக்கு உயர் இரத்த அழுத்தம் (High Blood Pressure) முக்கிய காரணமாக அறியப்படுகின்றது. நீண்ட நேரம் ஒரே இடத்தில் அமர்ந்து வேலை செய்வது, துரித உணவுகளின் அதிகரித்த நுகர்வு, போதியளவு தூக்கமின்மை, மனஅழுத்தம், முறையற்ற வாழ்க்கைமுறை மற்றும் அதிகரித்த உடல் பருமன் போன்ற பல காரணிகள் உயர் இரத்த அழுத்தத்தை ஏற்படுத்துகின்றன.
உயர் இரத்த அழுத்தத்தின் அறிகுறிகள் பெரும்பாலும் நாம் அன்றாடம் சந்திக்கும் சாதாரண ஆரோக்கிய பிரச்சினைகள் போலவே இருப்பதால், பலரும் அதனை பெரிதாக கவனிப்பதில்லை. ஆனால் உரிய நேரத்தில் கண்டறிந்து சிகிச்சை பெறாவிட்டால், இது மாரடைப்பு உள்ளிட்ட உயிருக்கு ஆபத்தான நிலைகளுக்கு வழிவகுக்கும் என மருத்துவர்கள் எச்சரிக்கின்றனர்.
1. காலை நேர தலைவலி
காலையில் தூக்கத்தில் இருந்து எழும் போதே அடிக்கடி தலைவலி ஏற்படுவது உயர் இரத்த அழுத்தத்தின் முக்கிய எச்சரிக்கை அறிகுறியாகக் கருதப்படுகிறது. குறிப்பாக தலையின் பின்புறத்தில் ஏற்படும் இந்த தலைவலி, தூக்கத்தின் போது அல்லது அதிகாலையில் இரத்த அழுத்தம் அதிகரிப்பதன் காரணமாக மண்டை ஓட்டில் அழுத்தம் அதிகரிப்பதால் ஏற்படுகிறது. இதனை புறக்கணிப்பது உயிராபத்தை ஏற்படுத்தக்கூடும் என்பதால், தொடர்ந்து இந்த அறிகுறி இருந்தால் உடனடியாக மருத்துவ ஆலோசனை பெற வேண்டும்.
2. பார்வையில் மாற்றம்
பார்வை மங்கலாக தெரிவது, தெளிவின்றி இரண்டாக தெரிவது போன்ற பிரச்சினைகளும் உயர் இரத்த அழுத்தத்தின் முக்கிய அறிகுறிகளாகும். இரத்த அழுத்தம் அதிகரிக்கும் போது கண்களில் உள்ள சிறிய இரத்தக் குழாய்கள் பாதிக்கப்படுவதால், உயர் இரத்த அழுத்த ரெட்டினோபதி ஏற்படலாம். கணினி திரையை நீண்ட நேரம் பார்ப்பதால் ஏற்படுவதாக நினைத்து பலர் இதனை சாதாரணமாக எடுத்துக் கொள்கின்றனர். ஆனால் இந்த பிரச்சினை தொடர்ந்தால் தவறாமல் மருத்துவ சிகிச்சை பெற வேண்டும்.
3. அதிக உடல் சோர்வு
நன்றாக தூங்கிய பின்னரும் அதிகமான உடல் சோர்வை உணர்வது, உயர் இரத்த அழுத்தம் காரணமாக மூளை மற்றும் இதயத்திற்கு போதுமான ஆக்ஸிஜன் நிறைந்த இரத்தம் கிடைக்காததன் விளைவாக இருக்கலாம். இந்த அறிகுறியை அலட்சியம் செய்வதால் மாரடைப்பு ஏற்படும் அபாயம் அதிகரிக்கும் என மருத்துவர்கள் தெரிவிக்கின்றனர்.
மருத்துவர்கள் அறிவுறுத்தல்
மேற்கண்ட அறிகுறிகளில் ஏதேனும் ஒன்றை தொடர்ந்து அனுபவித்தால், அதனை சாதாரணமாக எடுத்துக் கொள்ளாமல் உடனடியாக மருத்துவரை அணுகி இரத்த அழுத்தத்தை பரிசோதனை செய்து கொள்ள வேண்டும். உரிய நேரத்தில் சிகிச்சை பெற்றால், உயிருக்கு ஆபத்தான விளைவுகளை தவிர்க்க முடியும் என மருத்துவர்கள் வலியுறுத்துகின்றனர்.