மாரடைப்பு என்றால் திடீரென கடுமையான மார்பு வலி ஏற்பட்டு, உடனடியாக உயிருக்கு ஆபத்து ஏற்படும் என்ற பொதுவான எண்ணம் பலரிடமும் உள்ளது. ஆனால் அது எல்லா நேரமும் உண்மை அல்ல. சில நேரங்களில் மாரடைப்பு மிகவும் அமைதியாக, வெளிப்படையான அறிகுறிகள் இல்லாமலேயே நிகழ்கிறது. இதையே மருத்துவ உலகில் “அமைதியான மாரடைப்பு” என்று அழைக்கப்படுகிறது.
பிரபல மருத்துவ நிபுணர்கள் தெரிவிப்பதாவது, மாரடைப்பு ஒருபோதும் திடீரென ஏற்படுவதில்லை. மாறாக, அது படிப்படியாக உடலில் சில எச்சரிக்கை அறிகுறிகளை காட்டுகிறது. ஆனால் அவை மிக லேசானவையாக இருப்பதால், பலர் அதை சாதாரண சோர்வு அல்லது சிறிய உடல்நலக் குறைவு என நினைத்து புறக்கணித்து விடுகின்றனர். இதனால் சரியான நேரத்தில் சிகிச்சை பெற முடியாமல், உயிருக்கு ஆபத்து அதிகரிக்கிறது.
அமைதியான மாரடைப்பு ஏற்படும் போது மார்பில் லேசான எரிச்சல் அல்லது பாரம் போன்ற உணர்வு, காரணமில்லாத அதிக சோர்வு, மூச்சு விடுவதில் சிரமம், கழுத்து, தாடை, தோள் அல்லது முதுகு பகுதிகளில் வலி, குமட்டல் அல்லது வாந்தி உணர்வு, தலைசுற்றல் போன்ற அறிகுறிகள் தோன்றலாம். இவை அனைத்தும் மிகத் தீவிரமாக இல்லாமல் மென்மையாகவே வெளிப்படும் என்பதே இதன் ஆபத்தான தன்மை.
மருத்துவர்கள் கூறுவதாவது, உடல் தொடர்ந்து சோர்வு, அமைதியின்மை அல்லது வழக்கத்திற்கு மாறான வலிகளை காட்டினால், அதை அலட்சியப்படுத்தக் கூடாது. அவை இதயம் தரும் முன்எச்சரிக்கை அறிகுறிகளாக இருக்கலாம். உடனடியாக மருத்துவரை அணுகுவது அவசியம்.
அமைதியான மாரடைப்பைத் தடுப்பதற்கு வாழ்க்கை முறையில் மாற்றங்கள் மிகவும் முக்கியம். எண்ணெய் நிறைந்த உணவுகள், குப்பை உணவுகள் மற்றும் அதிக உப்பை தவிர்த்து, பழங்கள், காய்கறிகள் மற்றும் சத்தான உணவுகளை உணவில் சேர்த்துக் கொள்ள வேண்டும். தினமும் குறைந்தது 30 நிமிடங்கள் நடைப்பயிற்சி, யோகா அல்லது லேசான உடற்பயிற்சி இதய ஆரோக்கியத்திற்கு உதவும். அதேபோல் மன அழுத்தத்தை குறைப்பதும் அவசியம். தியானம் மற்றும் பிராணயாமம் இதயத்தை பாதுகாக்க உதவுகின்றன.
அமைதியாக வரும் மாரடைப்பு, அறிகுறிகள் இல்லாமல் வருவது போல தோன்றினாலும், உடல் எப்போதும் சில சைகைகளை காட்டுகிறது. அவற்றை நேரத்தில் உணர்ந்து செயல்பட்டால், உயிரை காப்பாற்ற முடியும்