புதிய அரசாங்கத்தின் 100 நாள் வேலைத்திட்டத்தை ஸ்ரீ லங்கா சுதந்திர கட்சியின் ஒத்துழைப்பு இல்லாமல் ஒருபோதும் வெற்றிகரமாக முன்னெடுக்க முடியாது எனவும் அதனாலேயே தான் கட்சியின் தலைமைப் பொறுப்பை ஏற்றுக் கொண்டதாகவும் ஜனாதிபதி மைத்திரிபால சிறிசேன தெரிவித்தார்.
ஜனாதிபதியாக தெரிவு செய்யப்பட்டதன் பின்னர் அவர் கலந்துகொண்ட முதலாவது மக்கள் சந்திப்பு நேற்று பொலன்னறுவை தோபாவெவ மகா வித்தியாலய மைதானத்தில் இடம்பெற்ற நிலையில் அங்கு கலந்துகொண்டு உரையாற்றும் போதே அவர் இதனை தெரிவித்தார்.
முன்னதாக நேற்று காலை அனுராதபுரம் ஜய ஸ்ரீ மகாபோதிக்கு சென்ற ஜனாதிபதி மைத்திரிபால சிறிசேன அங்கு ஆசீர்வாதம் பெற்றுக்கொண்டார்.
மக்களின் துயரங்களை அறிந்த ரஜரட்டயை சேர்ந்த மைந்தன் நாட்டின் ஜனாதிபதியாக தெரிவு செய்யப்பட்டமையானது நாட்டுக்கு கிடைத்த பெருமை என இதன் போது ஸ்ரீ லங்கா ராமஞ்ஞ நிகாயவின் மக நாயக்க தேரர் ஆனந்த அனுனானந்த தேரர் தெரிவித்ததாக ஜனாதிபதியின் ஊடகப் பேச்சாளர் அலுவலகம் குறிப்பிட்டது.
இதனை அடுத்து அனுராதபுரத்திலிருந்து நேற்று பிற்பகல் ஜனாதிபதி மைத்திரிபால சிறிசேன பொலன்னறுவைக்கு சென்று ஜனாதிபதியாக பதவிப் பிரமாணம் செய்துகொண்டதன் பின்னரான முதலாவது மக்கள் சந்திப்பில் கலந்துகொண்டார்.
பிரதமர் ரணில் விகரமசிங்கவுடன் ஒரே வாகனத்தில் இதன் போது பயணித்திருந்த மைத்திரிபால சிறிசேன ஜனாதிபதி அங்கிருந்த பொலன்னறுவை மக்களுக்கு நன்றிகளை தெரிவித்த வண்ணம் உரையாற்றினார்.
இதன் போது அவர் மேலும் தெரிவித்ததாவது,
உயிரை பணயம் வைத்தே நாங்கள் தேர்தலில் போட்டியிடுவது தொடர்பில் தீர்மானம் ஒன்றுக்கு வந்தோம். ஏனெனில் அந்த தேர்தலில் நான் தோற்றிருந்தால் நான் இப்போது மண்ணுக்கடியிலேயே இருந்திருப்பேன் என்பதை அப்போது மிகத் தெளிவாக அறிந்திருந்தேன்.
தேர்தல் முடிந்ததும் எனது பிள்ளைகளை கைது செய்ய மஹிந்த ராஜபக் ஷ அரசாங்கம் அனைத்து தயார்படுத்தல்களையும் செய்திருந்தது. அதனூடாகவே என்னை கொடுமைப் படுத்த திட்டம் தயார் செய்யப்பட்டிருந்தது.
இன்று மஹிந்த ராஜபக் ஷ தனக்கு இருப்பதற்கு வீடில்லை என கூறுகின்றார். நான் தோல்வியடைந்திருந்தால் இருப்பதற்கு அவர் வீடு தந்திருப்பாரா என நான் அவரிடம் கேட்கிறேன்.
இன்று பலருக்கும் ஒரு கேள்வி எழலாம். நான் ஸ்ரீ லங்கா சுதந்திரக் கட்சியின் தலைவர் பதவியை ஏற்றமை தொடர்பிலான கேள்வியே அது.
நான் ஸ்ரீ லங்கா சுதந்திர கட்சியின் தலைமை பதவியை ஏற்றிராவிடில் அல்லது நிராகரித்திருப்பின் எமக்கு இன்று எமது 100 நாள் வேலைத் திட்டத்தை வெற்றிகரமாக முன்னெடுத்து செல்ல முடியாமல் போயிருக்கும்.
அப்படியானால் பாராளுமன்றத்தை கலைத்து தேர்தல் ஒன்றுக்கு செல்ல வேண்டியது தானே என ஒருவர் கேட்கலாம். அப்படி செய்தால் 100 திட்டம் அவ்வளவுதான். அதோடு முடிந்துவிடும்.
அதனால் எமக்குள்ள சிறந்த தீர்வு, ஸ்ரீ லங்கா சுதந்திர கட்சி உள்ளிட்ட தேர்தலில் எமக்கு ஆதரவு வழங்காதவர்களையும் இணைத்துக்கொண்டு தேவையான திருத்தங்களை செய்து நாம் வாக்களித்தவைகளை நிறைவேற்றுவதாகும். என குறிப்பிட்டார்.
ஊழல்,மோசடிகளுக்கு எதிராக புதிய சட்டங்கள்: விரைவில் நிறைவேற்றப்படும் என்கிறார் நீதி அமைச்சர் விஜேதாச ராஜபக்ஷ
ஊழல், மோசடிகளில் ஈடுபட்டவர்களுக்கு எதிராக கடுமையான நடவடிக்கைகளை எடுப்பதற்கான புதிய சட்டங்களை விரைவில் பாராளுமன்றத்தில் முன் வைத்து
நிறைவேற்றவுள்ளதாக நீதியமைச்சர் விஜேதாச ராஜபக் ஷ தெரிவித்தார்.
தமிழ் அரசியல் கைதிகள் விரைவில் விடுதலை செய்யப்படுவார்களென்றும் அதற்காக விசேட குழு அமைக்கப்பட்டுள்ளதாகவும் அமைச்சர் கூறினார்.
கடந்த ஆட்சியில் 2100 கோடி ரூபா ஊழல் மோசடிகள் இடம்பெற்றுள்ளதாக குற்றம் சாட்டப்படுவதுடன் பல்வேறு உயர் பதவிகளை வகித்தவர்களுக்கு எதிராகவும் ஊழல், மோசடிகள் தொடர்பாக குற்றச்சாட்டுக்கள் முன்வைக்கப்பட்டுள்ளதோடு லஞ்ச ஊழல் ஆணைக்குழுவிலும் பல்வேறு முறைப்பாடுகள் செய்யப்பட்டுள்ளன.
இவை தொடர்பாக நீதியமைச்சின் வகிபாகம் எவ்வாறு இருக்கும் என கேட்ட போதே நீதியமைச்சர் விஜேதாச ராஜபக்ஷ மேற்கண்டவாறு தெரிவித்தார்.
அமைச்சர் இது தொடர்பாக மேலும் தெரிவிக்கையில்;
கடந்த கால ஆட்சியில் பாரிய ஊழல் மோசடிகள் இடம்பெற்றுள்ளன. இவை தொடர்பாக முறைப்பாடுகள் தினம் தினம் கிடைத்து வருகின்றன. நாட்டு மக்களின் பணத்தை சூறையாடியவர்களை சும்மா விட முடியாது.
நாட்டில் ஊழல் மோசடிகள் இல்லாத சட்டம் ஒழுங்குடனான நல்லாட்சியை ஏற்படுத்துவதற்காகவே ஜனாதிபதி மைத்திரிபால சிறிசேன தலைமையிலான ஆட்சி மாற்றத்தை ஐ.தே. க. தலைமையில் ஏற்படுத்தப்பட்டது.
எனவே மக்களுக்கு நாம் வழங்கிய உறுதி மொழிகளை நிச்சயமாக நிறைவேற்றுவோம். கடந்த கால ஆட்சியில் இடம்பெற்ற ஊழல் மோசடிகளை விசாரிப்போம்.
இதன் போது உயர்மட்டம், கீழ்மட்டம் என தராதரம் பார்க்க மாட்டோம். சட்டத்தின் முன் அனைவரும் சமமானவர்களே ஆகும். குற்றம் செய்தோர் நிச்சயம் தண்டிக்கப்படுவார்கள்.
ஊழல் மோசடிகளை விசாரணை செய்வதற்காக பிரதமர் ரணில் விக்கிரமசிங்க தலைமையில் பிரதான குழு அமைக்கப்பட்டுள்ளது.
அத்தோடு எனது தலைமையிலும் உப குழுவொன்று அமைக்கப்பட்டுள்ளது. இரு குழுக்களிலும் தலா 8 உறுப்பினர்கள் உள்ளடக்கப்பட்டுள்ளனர்.
இதற்கு மேலதிகமாக இக்குற்றச்சாட்டுக்களை விசாரிப்பதற்கான பொறுப்பு லஞ்ச ஊழல் திணைக்களத்திடமும் இரகசிய பொலிஸாரிடமும் கையளிக்கப்பட்டுள்ளது.
இதனூடாகவும் விசாரணைகள் நடாத்தப்படும். எனவே மோசடிகளில் ஈடுபட்டோர் எவராயினும் தப்பிக்க முடியாது போகும். அனைவரும் சட்டத்தின் முன் நிறுத்தப்பட்டு தண்டிக்கப்படுவார்கள்.
அது மட்டுமல்லாது இம் மோசடிகளில் ஈடுபட்டவர்களுக்கு கடுமையான தண்டனைகள் வழங்குவதற்காக புதிய சட்டங்கள் பாராளுமன்றத்தில் முன் வைக்கப்பட்டு அவசரமாக நிறைவேற்றப்படவுள்ளன.
வெளிநாடுகளில் பதுக்கி வைக்கப்பட்டுள்ள கறுப்பு பணம் மற்றும் சொத்துக்கள் தொடர்பாகவும் விசாரணைகள் மேற்கொள்ளப்படவுள்ளதோடு அதற்காக அந்தந்த நாடுகளின் ஒத்துழைப்பையும் பெறவுள்ளோம்.
விசேடமாக இந்தியாவின் மத்திய வங்கியின் உதவி நாடப்படும். தற்போது சீசெல்ஸ் நாடும் இதற்கான ஒத்துழைப்பு வழங்க முன்வந்துள்ளது.
போதைப்பொருள்
போதைப்பொருட்கள் கடத்தல், விற்பனை போன்றவற்றை தடுப்பதற்கு தற்போது நாட்டிலுள்ள சட்டங்கள் போதுமானவை. ஆனால் அச்சட்டங்கள் இது வரையில் சரியான முறையில் அமுல்படுத்தப்படவில்லை.
இனிமேல் சட்டங்கள் சரியான வழியில் நடைமுறைப்படுத்தப்படும். போதைப்பொருட்கள் கடத்தலை தடுப்பதற்காக எமது அமைச்சின் கீழ் விசேட வேலைத்திட்டமொன்றும் நடைமுறைப்படுத்தப்படவுள்ளது.
அரசியல் கைதிகள்
தமிழ் அரசியல் கைதிகளின் விடுதலை தொடர்பாக ஜனாதிபதி மைத்திரிபால சிறிசேன விசேட கவனம் செலுத்தியுள்ளார். தமிழ் தேசிய கூட்டமைப்பினருடனான சந்திப்பிலும் இது தொடர்பாக கலந்துரையாடப்பட்டது.
இது தொடர்பில் ஜனாதிபதி பணிப்புரையில் விசேட குழு அமைக்கப்பட்டுள்ளது.
எனவே தமிழ் அரசியல் கைதிகளின் விடுதலை துரிதப்படுத்தப்படும்.
தமிழ் அரசியல் கைதிகள் தொடர்பாக விசாரணைகளும் துரிதப்படுத்தப்படும். குற்றமற்றவர்கள் உடனடியாக விடுதலை செய்யப்படுவார்கள்.
ஊழல் மோசடிகளை விசாரணை செய்வதற்காக நியமிக்கப்பட்டுள்ள விசேட குழுக்களில் மட்டுமல்லாது பொதுமக்கள் தமது முறைப்பாடுகளை அரசிற்கு நேரடியாகவும் சமர்ப்பிக்க முடியுமென்றும் அமைச்சர் விஜேதாச ராஜபக்ஷ தெரிவித்தார்.