மஸ்கெலியா மவுஸாக்கலை நீர்த்தேக்கத்தில் நீராடச் சென்ற இளைஞன் ஒருவர் நீரில் மூழ்கி உயிரிழந்துள்ளார்.
இவ்வாறு உயிரிழந்தவர் யாழ்ப்பாணம் கைதடி பகுதியைச் சேர்ந்த 19 வயதுடைய அருளானந்தன் டிலோஜன் என அடையாளம் காணப்பட்டுள்ளதாக மஸ்கெலியா பொலிஸார் தெரிவித்தனர்.
இச் சம்பவம் நேற்று வியாழக்கிழமை முற்பகல் இடம்பெற்றுள்ளது.
மஸ்கெலியா மொக்கா தோட்டத்தில் நண்பர் வீட்டிற்கு வந்த இவர் நேற்று காலை வேளையில் தனது நண்பரோடு நீராடச் சென்றுள்ளார்.
அதன் பின் தனது நண்பர் நீராடி கொண்டிருக்கும் வேளையில் திடீரென காணாமல் போயுள்ளதாக அவரின் நண்பர் மஸ்கெலியா பொலிஸாருக்கு தெரிவித்துள்ளார்.
அதன் பின் சம்பவ இடத்திற்கு சென்ற பொலிஸார், கடற்படையினர் நீர்தேக்கத்தில் காணாமல் போனவரை தேடும் பணியில் ஈடுபட்ட போது சுமார் 5 மணித்தியாலங்களின் பின் சடலத்தை மீட்டனர்.
குறித்த இளைஞன் கடந்த 12 ஆம் திகதி யாழ்ப்பாணத்திலிருந்து மஸ்கெலியா பகுதியில் நண்பரின் வீட்டிற்கு வருகை தந்துள்ளதாக தெரிவிக்கப்படுகின்றது. சம்பவம் தொடர்பான விசாரணைகளை மஸ்கெலியா பொலிஸார் மேற்கொண்டு வருகின்றனர்.
