தனது காதலனைத் தந்திரமாக வீட்டிற்கு வரவழைத்து, அவரை நாற்காலியில் கட்டி வைத்து உயிருடன் எரித்துக் கொன்ற புகாரில் பிரேமா என்ற 27 வயது இளம் பெண் காவல்துறையினரால் கைது செய்யப்பட்டுள்ளார்.
ஒரு திரைப்பட பாணியில் அரங்கேறியுள்ள இந்தச் சம்பவம், மனித உறவுகளுக்குள் மறைந்து கிடக்கும் வன்மத்தை வெளிச்சம் போட்டுக் காட்டியுள்ளது.
பெங்களூருவின் பியாடரஹள்ளி பொலிஸ் நிலைய எல்லைக்குட்பட்ட பகுதியில் அரங்கேறியுள்ள சம்பவத்தின் விவரங்களின்படி, பிரேமாவும் உயிரிழந்த கிரணும் ஒரு தனியார் தொலைத்தொடர்பு நிறுவனத்தில் ஒன்றாகப் பணியாற்றி வந்துள்ளனர்.
கடந்த இரண்டு ஆண்டுகளாக இவர்கள் காதலித்து வந்த நிலையில், சம்பவத்தன்று பிரேமா தனது குடும்பத்தினர் வீட்டில் இல்லாத நேரத்தைப் பயன்படுத்தி கிரணைத் தனது வீட்டிற்கு வரவழைத்துள்ளார்.
அங்கு அவருக்கு ஒரு ‘மேற்கத்திய பாணி’ திருமண முன்மொழிவை (Propose) சர்ப்ரைஸாக வழங்கப் போவதாகக் கூறி நம்ப வைத்துள்ளார். அந்தச் சர்ப்ரைஸ் திட்டத்தின் ஒரு பகுதியாக, கிரணின் கண்களைக் கட்டி, அவரது கை மற்றும் கால்களை ஒரு நாற்காலியில் கட்டிப் போட்டுள்ளார்.
கிரண் இதனை ஒரு விளையாட்டு என நம்பி ஒத்துழைத்த நிலையில், அவர் முழுமையாகக் கட்டப்பட்டவுடன் பிரேமா தனது விஸ்வரூபத்தைக் காட்டியுள்ளார்.
தான் ஏற்கெனவே வாங்கி வைத்திருந்த பெட்ரோலை கிரணின் மீது ஊற்றித் தீ வைத்துள்ளார்.
நாற்காலியில் கட்டப்பட்டிருந்ததால் கிரணால் தப்பிக்க முடியாமல் போனது. அலறித் துடித்த அவர் சம்பவ இடத்திலேயே இரத்த வெள்ளத்தில் உயிரிழந்துள்ளார்.
இந்தச் சம்பவத்தின் மிகக் கொடூரமான அம்சம் என்னவென்றால், கிரண் உயிருக்குப் போராடிய இறுதிக் காட்சிகளைப் பிரேமா தனது செல்போனில் வீடியோ எடுத்ததாக பொலிஸார் சந்தேகிக்கின்றனர்.
ஆரம்பத்தில், தான் குளியலறையில் இருந்தபோது கிரண் தற்கொலை செய்துகொண்டதாகப் பிரேமா நாடகமாடினார்.
ஆனால், காவல்துறையினரின் கிடுக்கிப்பிடி விசாரணை மற்றும் வீட்டில் கண்டெடுக்கப்பட்ட எரிபொருள் ஆதாரங்கள் அவரைச் சிக்க வைத்தன. காதலில் ஏற்பட்ட விரிசல், கிரண் தன்னைத் தவிர்ப்பதாகக் கருதியது அல்லது திருமணப் பேச்சை அவர் நிராகரித்தது போன்ற காரணங்களே இந்த வன்முறைக்குத் தூண்டுதலாக இருந்திருக்கலாம் எனத் தெரிகிறது.
தற்போது பிரேமா மீது கொலை வழக்குப் பதிவு செய்யப்பட்டுத் தீவிர விசாரணை நடைபெற்று வருகிறது. இந்தச் சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.