இலங்கையின் முன்னணி அழகுக்கலை நிபுணரும் சமூக ஊடகப் பிரபலமுமான சந்திமால் ஜெயசிங்க, அண்மையில் நடைபெற்ற சிங்களப் புத்தாண்டு விழாவின் போது முன்னெடுத்த சில செயல்பாடுகள் நாடு முழுவதும் கடும் கண்டனத்திற்குள்ளாகியுள்ளன. பியூமி ஹன்சமாலி உள்ளிட்ட தனது நெருக்கமான வடிவழகர்களைக் கொண்டு அவர் நடத்திய இந்த விழாவில், பெண்களின் தொப்புளின் மீது வைக்கப்பட்ட ரொட்டிகளைச் சாப்பிடுவது, பால் புட்டிகள் மூலம் மது அருந்துவது போன்ற மிகவும் இழிவான மற்றும் நாகரிகமற்ற விளையாட்டுக்கள் அறிமுகப்படுத்தப்பட்டதே இந்த சர்ச்சைக்குக் காரணமாகும்.
இந்தக் கலாச்சார அழிவிற்கு எதிராகத் திரையுலகின் மூத்த நடிகை தில்ஹானி ஏகநாயக்க (அசோகமாலா) முதன்முதலில் குரல் கொடுத்துள்ளார். உன்னதமான ஒரு தேசியத் திருவிழா, தற்போது மன வக்கிரங்களின் வெளிப்பாடாக மாறிவிட்டது என அவர் வேதனை தெரிவித்துள்ளார். எனினும், மற்றொரு நடிகையான அனோமா ஜனாதரி, தில்ஹானியின் கருத்தைத் தாக்கிப் பேசியுள்ளதுடன், சந்திமால் செய்ததை விட தில்ஹானியின் நடிப்புத் துறையிலுள்ள குறைகளே பெரியவை எனக் கூறி புதிய சர்ச்சையைக் கிளப்பியுள்ளார். இந்த விவகாரம் தற்போது இலங்கைச் சமூக வலைதளங்களில் கலாச்சாரம் மற்றும் ஒழுக்கம் குறித்த பாரிய விவாதத்தைத் தூண்டியுள்ளது.