அமெரிக்கா மற்றும் இஸ்ரேல் இணைந்து ஈரானின் முக்கிய கட்டமைப்புகள் மீது மேற்கொண்ட தாக்குதல்களுக்கு பதிலடி நடவடிக்கையாக, வளைகுடா மற்றும் மத்திய கிழக்கு நாடுகளில் உள்ள முக்கிய பாலங்களை குறிவைக்கும் பட்டியலை ஈரான் வெளியிட்டுள்ளது.
இந்த நடவடிக்கை, பிராந்தியத்தில் பதற்றம் மேலும் தீவிரமடைந்துள்ளதை சுட்டிக்காட்டுகிறது.
ஈரானின் அரைஅதிகாரப்பூர்வ செய்தி நிறுவனம் வெளியிட்ட தகவலின்படி, எட்டு முக்கிய பாலங்கள் இந்த ‘ஹிட்-லிஸ்ட்’-இல் இடம்பெற்றுள்ளன.
அவை குவைத்தில் உள்ள ஷேக் ஜாபர் அல்-அஹ்மத் அல்-சபா கடல் பாலம், ஐக்கிய அரபு அமீரகத்தில் உள்ள ஷேக் சயீத் பாலம், அல் மக்தா பாலம், ஷேக் கலீஃபா பாலம், சவுதி அரேபியா மற்றும் பஹ்ரைனை இணைக்கும் கிங் ஃபஹத் causeway, ஜோர்டானில் உள்ள கிங் ஹுசைன் பாலம், டாமியா பாலம் மற்றும் அப்டூன் பாலம் ஆகியவை.
இந்த அறிவிப்பு, வியாழக்கிழமை ஈரானின் மிக உயரமான பாலமான B1 பாலம் மீது நடைபெற்ற தாக்குதலைத் தொடர்ந்து வெளியிடப்பட்டது.
டெஹ்ரானையும் மேற்குப் பகுதியில் உள்ள கராஜ் நகரத்தையும் இணைக்கும் இந்த பாலம் இன்னும் கட்டுமானத்தில் இருந்தது.
தாக்குதலின் விளைவாக பாலம் பகுதியளவில் சேதமடைந்ததுடன், பலர் உயிரிழந்ததும், பலர் காயமடைந்ததும் அதிகாரப்பூர்வ தகவல்களில் தெரிவிக்கப்பட்டுள்ளது.
இந்த தாக்குதலுக்குப் பிறகு, அமெரிக்க அதிபர் டொனால்டு டிரம்ப் கடுமையான எச்சரிக்கையை வெளியிட்டார். ஈரான் உடனடியாக ஒப்பந்தத்திற்கு வராவிட்டால், மேலும் பெரிய அளவில் தாக்குதல்கள் நடைபெறும் என்று அவர் கூறினார்.
இதற்கு பதிலளித்த ஈரான் வெளிவிவகார அமைச்சர், பொதுமக்கள் பயன்படுத்தும் கட்டமைப்புகளை தாக்குவது ஈரானை தளரச் செய்யாது என்றும், இது எதிரியின் நெறிமுறை வீழ்ச்சியை காட்டுகிறது என்றும் தெரிவித்தார்.
பிப்ரவரி 28 முதல் தொடங்கிய அமெரிக்கா-இஸ்ரேல் தாக்குதல்களில் ஆயிரக்கணக்கானோர் உயிரிழந்துள்ளதாக கூறப்படுகிறது. இதற்குப் பதிலாக, ஈரான் ட்ரோன் மற்றும் ஏவுகணை தாக்குதல்களை மேற்கொண்டு வருகிறது.
மொத்தத்தில், மத்திய கிழக்கு பகுதியில் நிலவும் பதற்றம் நாளுக்கு நாள் அதிகரித்து வருவது கவலைக்குரிய விடயமாகும்.