தாய்லாந்தின் பேங்கொக் சுவர்ணபூமி சர்வதேச விமான நிலையத்தில் ஏற்பட்ட ஒரு தவறால் இலங்கை முதியவர் ஒருவர் கடும் சிரமத்தில் சிக்கியிருந்தார். அவர் இலங்கைக்கு திரும்புவதற்காக UL404 விமானத்தில் ஏற வேண்டியிருந்த நிலையில், தனது கடவுச்சீட்டு, விமான டிக்கெட் மற்றும் பணம் அடங்கிய பையை வாடகை வாகனத்தில் தவறவிட்டு இறங்கியதால் முழுமையாக ஆவணமின்றி விமான நிலையத்தில் நிலைதடுமாறினார்.
உடனடியாக அவர் விமான நிலைய பொலிஸாருக்கும் ஸ்ரீலங்கன் எயார்லைன்ஸ் ஊழியர்களுக்கும் தகவல் வழங்கியதை தொடர்ந்து, அவசர ஆலோசனைகள் மேற்கொள்ளப்பட்டன. ஸ்ரீலங்கன் எயார்லைன்ஸ் முகாமையாளரின் வழிகாட்டுதலின் பேரில் அவர் தாய்லாந்தில் உள்ள இலங்கை தூதரகத்தை அணுகி தற்காலிக கடவுச்சீட்டு பெற முயன்றார்.
ஆனால் அங்கு ஏற்பட்ட சூழ்நிலை மேலும் சிக்கலானதாக மாறியது. கடவுச்சீட்டு வழங்குவதற்காக 4,950 தாய் பாட் பணம் உடனடியாக ரொக்கமாக செலுத்த வேண்டும் என அதிகாரிகள் தெரிவித்ததாக கூறப்படுகிறது. வங்கி மூலம் செலுத்தும் கோரிக்கை நிராகரிக்கப்பட்ட நிலையில், அந்த முதியவரிடம் மிகக் குறைந்த பணமே இருந்ததால் அவர் முற்றிலும் உதவியற்ற நிலையில் இருந்தார்.
இந்த தருணத்தில், தாய்லாந்தில் வசிக்கும் மஹரகம பகுதியைச் சேர்ந்த இலங்கை பெண் மதுஷானி நவரத்ன அந்த முதியவரின் நிலையை கண்டு மனம் கலங்கி, தனது சொந்த செலவில் 6,000 தாய் பாட் வழங்கி உதவியுள்ளார். அவரது இந்த துரிதமான மனிதாபிமான செயல் அந்த முதியவரின் பயணத்தை மீண்டும் உயிர்ப்பித்தது.
தற்காலிக கடவுச்சீட்டு பெற்றுக்கொண்ட பின்னர், அவர் மீண்டும் விமான நிலையத்தை அடைந்தபோது UL405 விமானம் புறப்படுவதற்கு மிகக் குறைந்த நேரமே இருந்தது. ஆனால் ஸ்ரீலங்கன் எயார்லைன்ஸ் ஊழியர்கள் விரைவாக செயல்பட்டு, பாதுகாப்பு சோதனைகள் மற்றும் தேவையான நடைமுறைகளை விரைவுபடுத்தி, அந்த முதியவரை கடைசி நிமிடத்தில் விமானத்தில் ஏற்றியுள்ளனர்.
இவ்வாறு பலரின் ஒருங்கிணைந்த உதவி, விரைவான நிர்வாக நடவடிக்கை மற்றும் மனிதாபிமான ஆதரவு காரணமாக, அந்த முதியவர் எதிர்பாராத சிக்கல்களிலிருந்து மீண்டு பாதுகாப்பாக இலங்கைக்கு திரும்பியுள்ளார். இந்த சம்பவம் வெளிநாட்டில் சிக்கிய ஒருவருக்கு இலங்கையர்கள் காட்டிய மனிதாபிமானத்தின் ஒரு சிறந்த எடுத்துக்காட்டாக கருதப்படுகிறது.