கொழும்பு பண்டாரநாயக்க மாநாட்டு மண்டப வளாகத்தில் நடைபெற்று வந்த இந்திய திரைப்பட படப்பிடிப்பின் போது 52 வயதுடைய நடிகர் ஒருவர் திடீரென மயங்கி விழுந்து உயிரிழந்த சம்பவம் அதிர்ச்சியை ஏற்படுத்தியுள்ளது. மாத்தளை கலுதேவள பகுதியைச் சேர்ந்த திருமணமாகாத இவர், இந்திய நாடாளுமன்றத்தை சித்தரிக்கும் காட்சிக்காக தயாராகிக் கொண்டிருந்தபோது இந்த துரதிர்ஷ்ட சம்பவம் இடம்பெற்றதாக தெரிவிக்கப்படுகிறது.
பொலிஸார் தெரிவித்ததாவது, நேற்று பிற்பகல் சுமார் 2.30 மணியளவில் நடைபெற்ற படப்பிடிப்பில், அவர் கழிவறைக்குச் செல்லும் வழியில் திடீரென மயங்கி விழுந்துள்ளார். உடனடியாக அங்கிருந்தவர்கள் அவரை கொழும்பு தேசிய மருத்துவமனைக்கு கொண்டு சென்றுள்ளனர். ஆனால் மருத்துவமனையில் மேற்கொள்ளப்பட்ட சிகிச்சை முயற்சிகளுக்கு பின்னரும் அவர் உயிரிழந்ததாக தெரிவிக்கப்பட்டுள்ளது.
இந்த படப்பிடிப்பில் இந்திய திரைப்பட உலகின் பிரபல நடிகர்கள் மற்றும் குழுவினர் பங்கேற்றிருந்ததாகவும் தெரிவிக்கப்படுகிறது. சம்பவம் குறித்து குருந்துவத்த பொலிஸார் முதற்கட்ட விசாரணைகளை ஆரம்பித்துள்ளதுடன், மரணத்திற்கான சரியான காரணம் இதுவரை உறுதியாக வெளியாகவில்லை எனவும் கூறப்படுகிறது.