இலங்கைக்கு விஜயம் செய்யாமலேயே போர்க் குற்றச்சாட்டுக்கள் தொடர்பான ஆக்கபூர்வமான விசாரணைகளை மேற்கொள்ள முடியும். விசாரணை அறிக்கையானது முறையான தரங்களுக்கு அமைய நம்பகமானதாக இருக்கும் என ஐக்கிய நாடுகள் சபையின் மனித உரிமைகள் ஆணையாளர் நவநீதம்பிள்ளை தெரிவித்துள்ளார்.
நிரந்தர சமாதானம் மற்றும் நல்லிணக்கத்தை ஏற்படுத்த ஒரு வழியை உருவாக்கிக் கொடுக்க இந்த விசாரணையானது உதவும் என்பதுடன் இது சகல இலங்கையர்களுக்கு நன்மையாக அமையும் என்பதை உணர்ந்து கொள்ள வேண்டும் என்றும் நவநீதம் பிள்ளை குறிப்பிட்டுள்ளார்.
இந்தியா மற்றும் தாய்லாந்து ஆகிய நாடுகளுககு வீசா விண்ணப்பங்கள் நிராகரிக்கப்பட்டதாக ஊடகங்களில் வெளியான செய்திகளில் உண்மையில்லை. இலங்கையிடமோ அல்லது வேறு நாடுகளிடமோ வீசா கோரி எவரும் விண்ணப்பிக்கவில்லை என்றும் அவர் கூறினார்.
தொம்சன் ராய்ட்டர் சேவைக்கு வழங்கியுள்ள விசேட செவ்வியிலேயே ஐக்கிய நாடுகள் சபையின் மனித உரிமை ஆணையாளர் நவநீதம்பிள்ளை மேற்கண்ட விடயங்களை குறிப்பிட்டுள்ளார்.
அதில் அவர் மேலும் தெரிவித்துள்ளதாவது
ஐக்கிய நாடுகள் மனித உரிமைப் பேரவையின் விசாரணை செயற்பாடுகள் தொடர்பில் இலங்கையிடமோ அல்லது வேறு நாடுகளிடமோ வீசா கோரி எவரும் விண்ணப்பிக்கவில்லை. . இந்தியாவிடம் வீசாவுக்கு விண்ணப்பித்து நிராகரிக்கப்பட்டுள்ளதாக தெரிவிக்கப்படுவதை மறுக்கின்றோம்.
ஐக்கிய நாடுகள் மனித உரிமைப் பேரவையின் விசாரணைக் குழுவினர் நாட்டுக்கு அனுமதிக்கப்பட்டாலும் அனுமதிக்கப்படாவிட்டாலும் ஆதாரங்களை உறுதிப்படுத்துவது சரியான தரத்தை பிரதிபலிக்கும் வகையில் அமைந்திருக்கும்.
இலங்கைக்கு விஜயம் செய்யாமலேயே போர்க்குற்றச்சாட்டுக்கள் தொடர்பான ஆக்கபூர்வமான விசாரணைகளை மேற்கொள்ள முடியும். இலங்கைக்கு வெளியில் தகவல்களை பெறக் கூடிய சிறந்த வாய்ப்புகள் உள்ளன.
வடகொரிய மற்றும் சிரியா ஆகிய நாடுகள் தொடர்பில் மேற்கொள்ளப்பட்ட விசாரணைகள் இதற்கு சிறந்த உதாரணமாகும். இந்த இரண்டு நாடுகளிலும் அனுமதி வழங்கப்படவில்லை. எனினும் விசாரணை செயற்பாடுகள் முன்னெடுக்கப்பட்டன.
இந்த இரு நாடுகள் தொடர்பான விசாரணைக்கும் இலங்கை சம்பந்தமான விசாரணைக்கும் வித்தியாசங்கள் இருப்பதாக நான் காணவில்லை.
இந்தியா மற்றும் தாய்லாந்து ஆகிய நாடுகளுக்கான வீசா விண்ணப்பங்கள் நிராகரிக்கப்பட்டதாக ஊடகங்களில் வெளியாக செய்திகளில் உண்மையில்லை. இலங்கையிடமோ அல்லது வேறு நாடுகளிடமோ வீசா கோரி எவரும் விண்ணப்பிக்கவில்லை. ஆனால் கவலைக்கிடமான முறையில் தவறான தகவல்களும் திரிபுபடுத்தப்பட்ட தகவல்களும் வெளியிடப்பட்டுள்ளன.
விசாரணைக்குழுவினர் மற்றும் ஆலோசனை குழு உறுப்பினர்கள் தொடர்பாக சில இலங்கை ஊடகங்களில் திரிவுபடுத்தப்பட்ட தவறான தனிப்பட்ட தாக்குதல்கள் நடத்தப்பட்டு வருகின்றன.
12 பேர் கொண்ட விசாரணைக்குழு ஜெனிவாவை தளமாக கொண்டு இயங்கும். தேவை ஏற்பட்டால் வேறு நாடுகளுக்கு விஜயம் செய்யும். விசாரணைக்குழுவினர் சாட்சியங்கள் பெறுவதுடன் தகவல்களை சேகரிக்கின்றனர்.
மேலும் அட்டூழிய குற்றச்சாட்டுக்களை சரிபார்க்கும் பணியில் அவர்கள் ஈடுபட்டுள்ளனர். விசாரணைகளில் அவர்கள் கண்டறியும் விடயங்களை எதிர்வரும் மார்ச் மாதம் ஐ.நா மனித உரிமை பேரவையில் சமர்பிப்பார்கள்.
குற்றச் செயல்களுக்கு யார் பொறுப்புக் கூறவேண்டும் என்பதை கண்டறியவே விசாரணைக்குழு அமைக்கப்பட்டது. அந்த விடயமே இதன் தேவையாக இருந்தது.
இந்த விசாரணையானது சகல இலங்கையர்களுக்கு நன்மையாக அமையும் என்பதை உணர்ந்து கொள்ள வேண்டும். அத்துடன் நிரந்தரமான சமாதானம் மற்றும் நல்லிணக்கத்தை ஏற்படுத்த ஒரு வழியை உருவாக்கி கொடுக்க இது உதவும்.
