யுத்தம் நடைபெற்றுக் கொண்டிருந்த இறுதி காலப்பகுதியில் இடம் பெற்ற கடத்தல்களும் காணாமல் போதல் சம்பவங்களும் ஏராளம்.
அவை படைத்தரப்பால் செய்யப்பட்டதா அல்லது புலிகள் உள்ளிட்ட ஆயுதக் குழுக்களின் நடவடிக்கையா என்பது தொடர்பில் விவாதங்களே இன்னும் தொடரும் நிலையில் தலைநகரில் இடம்பெற்ற பாரிய கடத்தல்கள் தொடர்பில் தற்போது பல இரகசியங்கள் வெளிப்படுத்தப்பட்டுள்ளன.
பொலிஸ் மா அதிபர் என்.கே.இலங்ககோனின் நேரடி கட்டுப்பாட்டில் குற்றப் புலனாய்வுப் பிரிவுக்கு பொறுப்பான சிரேஷ்ட பிரதி பொலிஸ்மா அதிபர் ரவி செனவிரட்னவின் ஆலோசனைக்கு அமைய புலனாய்வுப் பிரிவின் பணிப்பாளர் சிரேஷ்ட பொலிஸ் அத்தியட்சர் நாகஹமுல்லவின் வழிகாட்டலின் கீழ் புலனாய்வு பிரிவின் கூட்டுக் கொள்ளை தொடர்பிலான விசாரனைப் பிரிவின் பொறுப்பதிகாரி பொலிஸ் பரிசோதகர் நிஸாந்த டீ சில்வா தலைமையில் முன்னெடுக்கப்படும் இருவேறு விசாரணைகளிலேயே இந்த பிரதான கடத்தல்கள் தொடர்பில் தகவல்கள் வெளிப்படுத்தப்பட்டுள்ளன.
கொழும்பு, கொட்டாஞ்சேனை, தெஹிவளை, வத்தளை மற்றும் கட்டுநாயக்க உள்ளிட்ட பல பிரதேசங்களில் பல்வேறு உத்திகளை கையாண்டு இந்த கடத்தல்கள் அரங்கேற்றப்பட்டுள்ளமை உறுதியாகியுள்ளது.
குறிப்பாக தெஹிவளையில் 2008.09.17 அன்று பெர்னாண்டோ மாவத்தையில் உள்ள அலி ஹாஜியார் அன்வரது வீட்டில் வைத்து அவரும் ரஜீவ நாகநாதன், பிரதீப் விஸ்வநாதன், திலகேஸ்வரன் ராமலிங்கம், மொஹம்மட் திலான், மொஹம்மட் சாஜித் ஆகிய ஐந்து மாணவர்களும் கடத்தப்பட்டிருந்தனர்.
இதனைவிட தலைநகரின் பல்வேறு பிரதேசங்களில் வைத்தும் கடத்தப்பட்டவர்களின் எண்ணிக்கை தற்போதைய விசாரணைகளுக்கு அமைய 11 ஆகும்.
கொட்டாஞ்சேனையைச் சேர்ந்த கஸ்தூரி ஆரச்சிலாகே ஜோன் ரீட், மன்னார் அரிப்பு – கிழக்கு அரிப்பு பிரதேசத்தைச் சேர்ந்த அமலன் லியோன் மற்றும் ரொஷான் லியோன், கொட்டாஞ்சேனையை சேர்ந்த அன்டனி கஸ்தூரி ஆரச்சி, திருகோணமலையை சேர்ந்த கனகராஜா கஜன் ஆகியோரே கடத்தப்பட்டுள்ள ஏனையவர்களாவர்.
இந் நிலையில் இந்த 11 பேர் தொடர்பிலும் கொழும்பை அண்மித்த பல்வேறு பொலிஸ் நிலையங்களிலும் காணாமல் போனமை தொடர்பில் முறைப்பாடுகள் உள்ள நிலையில் அவை அனைத்தும் தற்போது குற்றப் புலனாய்வு பிரிவினாலேயே விசாரணைக்கு உட்படுத்தப்பட்டு வருகிறது.
கொழும்பு பிரதான நீதிவான் நீதிமன்றில் 5 மாணவர்கள் தொடர்பான ஆட் கொணர்வு மனுவும் கோட்டை பிரதான நீதிவான் முன்னிலையில் கடற்படையின் முன்னாள் தளபதி அட்மிரல் வசந்த கரன்னாகொட கொடுத்த முறைப்பாடொன்றினூடாக அம்பலமான (5 மாணவர்கள் உட்பட) 11 பேரின் தொடர்பிலும் வெவ்வேறு வழக்குகள் நிலுவையில் உள்ளன.
இது தொடர்பில் விசாரணைகளை மேற்கொண்டுவரும் குற்றப் புலனாய்வு பிரிவின் கூட்டுக் கொள்கைகள் தொடர்பிலான விசாரணை பிரிவின் பொறுப்பதிகாரி நிஸாந்த டீ சில்வா இந்த காணாமல் போதல் அல்லது கடத்தல் தொடர்பில் பல்வேறு அதிர்ச்சித் தகவல்களை வெளிப்படுத்திக் கொண்டுள்ளார்.
கே.வி.தவராசா
பிரதானமாக ஐந்து மாணவர்கள் உள்ளிட்ட பாதிக்கப்பட்ட 11 பேரின் உறவினர்கள் சார்பிலும் இடம் பெறும் ஆட் கொணர்வு மனுவில் சிரேஷ்ட சட்டத்தரணிகளான கே.வி.தவராசா மற்றும் ஜே.சீ.வெல அமுன ஆகியோரும் கோட்டை நீதி மன்றில் இடம்பெறும் வழக்கில் சட்டத்தரணி அச்சலா செனவிரட்னவும் ஆஜராகி தொடர்ச்சியாக இந்த கடத்தல்கள் தொடர்பில் நீதிக்காக போராடி வருகின்றனர்.
ஏற்கனவே இந்த கடத்தல்களுடன் கடற்படையின் பிரதான குழுவொன்று தொடர்புபட்டுள்ளமை தொடர்பில் கடந்த நாட்களில் “கடற்படையின் கப்பக் குழு” என்ற தலைப்பில் விரிவாக எழுதியிருந்தோம்.
இந்த நிலையில் இம்முறை அந்த கடத்தல் தொடர்பான சாட்சியங்களையும் சில இரகசிய தடுப்பு முகாம்கள் தொடர்பிலும் நாம் வெளிப்படுத்தவுள்ளோம்.
5 மாணவர்கள் உள்ளிட்ட தலைநகரில் கடத்தப்பட்ட11 பேர் தொடர்பிலும் கடற்படையைச் சேர்ந்த லெப்டினன் கொமண்டர் தர அதிகாரிகளான ரணசிங்க சுமித் ரணசிங்க, ஹெட்டி ஆராச்சி பிரசாத், தேவி சம்பத் என அறியப்படும் சம்பத் முனசிங்க ஆகியோர் புலனாய்வுப் பிரிவின் கூட்டு கொள்ளைகள் தொடர்பிலான விசாரணை பிரிவினரால் கைது செய்யப்பட்டு சந்தேக நபர்களாக பெயரிடப்பட்டுள்ளனர்.
இவர்களில் சம்பத் முனசிங்க என்ற லெப்டினன் கொமாண்டர் முன்னாள் கடற்படைத் தளபதி கரன்னாகொடவின் பாதுகாப்பு பிரிவில் கடமையாற்றியுள்ளதுடன் ஏனைய இருவரும் கடற்படையின் முன்னாள் ஊடகப் பேச்சாளர் தஸநாயக்கவின் கட்டுப்பாட்டிலிருந்த விஷேட புலனாய்வுப் பிரிவில் கடமையாற்றியவர்களாவர்.
புலனாய்வுப் பிரிவினரின் தகவல்களின் படி 2008 ஆகஸ்ட் மாதம் முதல் 2009 ஏப்ரல் மாதம் வரையிலான காலப்பகுதிக்குள் இந்த 11 பேரும் கடற்படையினரால் கொழும்பு வைத்திய வீதியில் உள்ள கடற்படை பராகிரம நிறுவனத்தில் உள்ள ‘பிட்டு பம்பு’ எனும் பெயரால் அழைக்கப்படும் தடுப்பு அறையில் தடுத்து வைக்கப்பட்டிருந்ததாக வெளிப்படுத்தப்பட்டுள்ளது.
அத்துடன் இக்காலப்பகுதியில் கஸ்தூரி ஆராச்சிலாகே அண்டனீ, கஸ்தூரி ஆராச்சிலாகே ஜோன் ரீட், ரஜீவ் நாகநாதன், பிரதீப் விஸ்வநாதன் , திலகேஷ்வரம் ராமலிங்கம் உள்ளிட்டவர்களின் உறவினர்களிடம் ஒரு கோடி ரூபாவுக்கும் மேல் கப்பம் கோரப்பட்டுள்ளது.
இதில் கொட்டாஞ்சேனையைச் சேர்ந்த ஜோன் ரீட் தொடர்பில் சம்அன் திஹார என்பவரிடமிருந்து , தாரம்மலை, கடஹபொல பிரதேசத்தில் வைத்து 5 இலட்சம் ரூபா கப்பம் பெறப்பட்டுள்ளமையும் மாணவர் கடத்தல் தொடர்பில் கோரப்பட்ட ஒரு கோடி ரூபா கப்பம் தொகையை தெஹிவளையைச் சேர்ந்த அலி அன்வர் ஊடாக கொடுக்க நடவடிக்கை எடுக்கப்பட்டு பின் அவருக்கு காணாமல் போயுள்ளமை குறித்து தற்போதும் புலனாய்வுப் பிரிவு தமது விசாரணைகளில் அவதானம் செலுத்துகின்றது.
இந்நிலையில் இவ்வாறு கடத்தப்பட்ட 11பேரும் லெப்டினன் கொமாண்டர்களான தற்போது கைதியாகியுள்ள சம்பத் முனசிங்க மற்றும் ஹெட்டி ஆராச்சி ஆகியோரின் உத்தரவுகளுக்கு அமைய வைத்திய வீதியின் ‘பிட்டு பம்பு’ தடுப்பு அறை முகாமில் வைக்கப்பட்டதாக சாதாரண கடற்படை சிப்பாய்களான அளுத்கெதர உபுல்பண்டார, லக்ஷ்மன் உதய குமார, இம்புலான லியனகே, உபுல் சமிந்த, கே.பி.என்.பி.விக்ரமசூரிய ஆகியோர் குற்றப் புலனாய்வுப் பிரிவுக்கு வாக்கு மூலமளித்துள்ளனர்.
இந் நிலையில் இவ்வாறு ‘பிட்டு பம்பு’ தடுப்பறையில் இருந்தவர்கள் பின்னர் திருகோணமலை கடற்படைத் தளத்தில் உள்ள சமுத்திரவியல் விஞ்ஞான பீட வளாகத்தில் உள்ள ‘கன்சைட்’ என்ற இரகசிய தடுப்பு முகாமுக்கு மாற்றப்பட்டுள்ளனர்.
‘கன்சைட்’ தடுப்பு முகாம் திருகோணமலை கடற்படை தளத்தில் நிலத்துக்கு கீழ் அமைக்கப்பட்டிருந்த இரகசிய தடுப்பு சிறையாகும்.
இந்த ‘கன்சைட்’ தடுப்பு முகாமானது அப்போது திருகோணமலை கடற்படைத்தளத்தின் கட்டளை தளபதியான கஸ்ஸப கோத்தபாய போலின் கட்டுப்பாட்டு பிரதேசத்துக்குள்ளேயே இருந்துள்ளது.
அத்துடன் இந்த கன்சைட் இரகசிய சிறை லெப்டினன் கொமாண்டரான ரணசிங்கவின் நேரடி கட்டுபாட்டிலிருந்துள்ளது.
லெப்டின் கொமாண்டர் ரணசிங்க கடற்படையின் புலனாய்வு பிரிவில் மிக முக்கியமானவராக அப்போது திருக்கோணமலை கடற்படை தளத்தில் கருத்தப்பட்டுள்ளார்.
இந் நிலையில் கடத்தப்பட்ட11 பேரும் 2009 ஏப்ரல் மாதம் முதல் ஜூன் மாதம் வரை இந்த கன்ஸைட் முகாமில் தடுத்து வைக்கப்பட்டிருந்தமைக்கான சாட்சியங்கள் குற்றப் புலனாய்வுப் பிரிவுக்கு கிடைத்துள்ளன.
இவ்வாறான பின்னணியிலே லெட்டினன் கொமாண்டர்களான முனசிக, எட்டி ஆராச்சி மற்றும் கன்சைட் தடுப்பு முகாமின் பொறுப்பாளர் ரணசிங்க ஆகியோர் கைது செய்யப்பட்டுள்ளனர்.
திருகோணமலை கடற்படை தளத்தின் அப்போதைய கட்டளைத் தளபதியான கொமாண்டர் கஸ்ஸப் கோத்தபாய போல் உள்ளிட்ட 22 காட்சிகள் ஊடாகவே 11பேரின் கடத்தல் மற்றும் “பிட்டு பம்பு” ‘கன்சைட்’ ஆகிய இரகசிய தடுப்பு முகாம்கள் தொடர்பான தகவல்களையும் புலனாய்வுப் பிரிவினர் வெளிப்படுத்திக் கொண்டுள்ளனர்.
குற்றப்புலனாய்வுப் பிரிவின் கூட்டுக் கொள்ளை தொடர்பிலான விசாரணைப் பிரிவின் பொறுப்பதிகாரி, பொலிஸ் பரிசோதகர் திஸாந்த டீ சில்வா, பொலிஸ் பரிசோதகர் இலங்கசிங்க, பொலிஸ் சார்ஜன்களான 17456 கருணாரத்ன, 14209 மென்டிஸ், குற்றப்பதிவுப் பிரிவின் சார்ஜன் 29458 உதேனி பண்டார, பொலிஸ் காண்ஸ்டபில்களான 35021 கன்னங்கர, 40039 குமார, 37611 ராஜபக் ஷ ஆகியோர் அடங்கிய குழுவே இந்த விசாரணைகளை முன்னெடுக்கின்றது.
இந்நிலையில் கோட்டை நீதிவானிடம் பெற்றுக் கொண்ட விஷேட சோதனை அனுமதிகள் ஊடாக பொலிஸ் பரிசோதகர் நிஸாந்த டீ சில்வா தலைமையிலான குழுவினர் கொழும்பு வைத்திய வீதியில் தடுப்பு முகாமாக பயன்படுத்தப்பட்டுள்ள பிட்டு பம்பு மற்றும் திருகோணமலை கடற்படை தளத்தில் உள்ள கன்சைட் நிலத்தடி இரகசிய தடுப்பு முகாமையும் சென்று சோதனை செய்துள்ளனர். அது தொடர்பிலான முழுமையான அறிக்கை ஒன்று நீதிமன்றுக்கும் சமர்ப்பிக்கப்பட்டுள்ளது.
அதன்படி குறித்த 11 பேரும் கடத்தப்பட்டுள்ளதாகவும் அவர்கள் திருகோணமலை கன்சைட் இரகசிய முகாமில் இறுதியாக தடுத்து வைக்கப்பட்டிருந்துள்ளமைக்கான ஆதாரங்கள் உள்ளதாகவும் குறிப்பிடும் பொலிஸார் எந்தவொரு சந்தர்ப்பத்திலும் அவர்கள் பொலிஸ் நிலையம் ஒன்றுக்கோ நீதிமன்றம் முன்னிலையிலோ ஆஜர்படுத்தப்பட்டிருக்கவில்லை என்கின்றனர்.
நிலத்துக்குகிழ் சித்திரவதை கூடம்
கடந்த ஏப்ரல் மாதம் 20 ஆம் திகதி முதல் 23ஆம் திகதிவரை செல்லுபடியாகும் வரையில் நீதிமன்ற ஊடாக பெற்றுக் கொண்ட விஷேட சோதனை அனுமதியை வைத்துக் கொண்டு 2015.04.21 முதல் 2015.04.28 வரை இந்த இரகசிய முகாம்கள் தொடர்பிலான விசாரணைகள் புலனாய்வுப் பிரிவினரால் முன்னெடுக்கப்பட்டுள்ளதுடன் தற்போது கன்சைட் முகாம் சீல் வைக்கப்பட்டுள்ளது.
கடற்படையின் தலைமைகளை இது தொடர்பில் புலனாய்வுப் பிரிவினர் தெளிவுபடுத்திய பின்னர் திருகோணமலை கடற்படை தளத்தின் புலனாய்வு அதிகாரியான லெப்டினன் கொமாண்டர், ஏ.பீ.ஐ.கே கருணாரத்னவின் உதவியும் இந்த சோதனைகளின் போது பெற்றுக் கொள்ளப்பட்டுள்ளது.
பிரதானமாக 22 சாட்சியாளர்களும் நேரடியாக “பிட்டு பம்பு” மற்றும் கன்சைட் இரகசிய முகாம்கள் தொடர்பில் சாட்சியம் அளித்துள்ள நிலையில் சோதனைகளின் போதும் அதன் பின்னரும் சாட்சியாளர்களால் புலனாய்வுப் பிரிவினருக்கு வழங்கப்பட்டுள்ள வாக்கு மூலங்களும் மன்றுக்கு அறிக்கையிடப்பட்டுள்ளன. அதன் சாராம்சத்தையும் நாம் இங்கு தருகிறோம்.
1. கொமாண்டர் கஸ்ஸப கோத்தபாய போல் மேலுள்ள பெயர் மற்றும் பதவியைக் கொண்டவர் இலங்கைக் கடற்படையின் தலைமையகத்தில் தற்போது விநியோகப் பிரிவு பணிப்பாளராகவுள்ளார். அப்போது இ/கை கடற்படையின் இறங்குதுறையான “ டொக் யார்ட்” நிறுவனத்தின் கட்டளை அதிகாரியாக இவர் சேவையாற்றியுள்ளார்.
அந்தக் காலப்பகுதியில் தனக்குக் கீழ் லெப்டினன் கொமாண்டர் ரணசிங்க எனும் அதிகாரி இருந்ததாகவும் அந்த அதிகாரி விஷேட உளவுப் பிரிவை மேற்பார்வை செய்ததாகவும் குறிப்பிட்டுள்ளார்.
கடல் மற்றும் சமுத்திரவியல் விஞ்ஞான பீட வளாகத்தில் “கன்ஸைட்” எனும் பெயரால் அடையாளப்படுத்தப்படும் இடத்தில் நிலத்துக்கு கீழ் சிறைக்கூடங்களை நடத்திச் செல்வதாகவும் அந்தப் பிரதேசத்திற்கு அனுமதியளிக்கப்பட்டவர்களுக்கு மட்டுமே செல்ல முடியுமாகவிருந்ததாகவும் கடற்படை அல்லாத நபர்கள் இருவர் அந்த இடத்தில் இருப்பதை தான் அவதானித்துள்ளதாகவும் அவர்கள் 25 – 30 வயதுகளுக்கிடைப்பட்டவர்கள் எனவும் குறிப்பிடுவதுடன் அந்த “கன்ஸைட்” நிலத்தடி சிறைக் கூடம் அமைந்துள்ள பிரதேசத்தையும் அடையாளம் காட்டுகிறார்.
2. ரணதுங்க முதியன்சலாகே புன்சிபண்டா ரணதுங்க
இந்த சாட்சியாளர் 1998.01.21 அன்று இலங்கை கடற்படையில் சேர்ந்ததுடன் 2006.07.30 அன்று கடற்படையின் உளவுப் பிரிவில் சேர்க்கப்பட்டுள்ளார்.
2008.08.30 அன்றிலிருந்து 2009 ஆம் ஆண்டின் நடுப்பகுதி வரை இலங்கை கடற்படையின் இறங்குதுறை நிறுவனத்தின் கிழக்கு உளவுப் பிரிவின் கீழ் சேவை ஆற்றியுள்ளார்.
இவர் குற்றப்புலனாய்வுப் பிரிவினருக்கு வழங்கியுள்ள வாக்கு மூலத்திற்கமைய முகாமில் “கன்ஸைட்” எனும் பெயரில் அடையாளப்படுத்தப்படும் இடத்தில் நிலத்தடி சிறைக் கூடங்கள் இருந்த பிரதேசத்தை அடையாளம் காட்டினார் “கன்ஸைட்” என்ற இடத்திற்கு உள்நுழையும் பிரதேசத்தில் 14 அடி வரையில் நீண்ட தகரத்திலான கதவு ஒன்று இருந்த இடத்தையும் அவர் காட்டினார் எனினும் அதனை தற்போது காண முடியவில்லை.
அதற்கு வலது புறத்தில் அமைக்கப்பட்டிருந்த இரு அறைகளையும் அவர் காட்டினார். அதற்கு இரும்புக் கம்பிகளைக் கொண்டு கதவுகள் போடப்பட்டிருந்தன.
அந்த அறைகள் கடற்படை வீரர்களால் “டெங்ஜன” என அடையாளப்படுத்தப்படுவதாகவும் அதில் ஒரு அறையில் இருவர் தடுத்து வைக்கப்பட்டிருந்ததாகவும் குறிப்பிட்டார்.
அதற்கு முன்னால் குளியலறையையும் மலசல கூடத்தையும் சுட்டிக் காட்டிய நிலையில் அவை தடுப்புக் கைதிகளின் குளியல் மலசல கூட தேவைகளுக்காகப் பயன்படுத்தப்பட்டதாகக் குறிப்பிட்டார்.
அதற்கு முன்னாள் இருந்த ஆலமரத்தின் கீழ் கைதிகளின் பாதுகாப்பிற்காக இருந்த கடற்படை சிப்பாய்களுக்கு தங்கியிருக்க பச்சைநிற கூடாரமொன்று அமைக்கப்பட்டிருந்ததாகக் குறிப்பிட்டு அந்த இடத்தையும் சுட்டிக் காட்டினார்.
நுழைவாயிலிலிருந்து அந்த ஆலமரம் வரையில் வெளியே தெரியாதவாறு தகரத்தால் மறைக்கப்பட்டிருந்ததாகக் குறிப்பிட்டு அப்பிரதேசத்தையும் சுட்டிக்காட்டி நின்றார்.
எனினும் அந்த வேலியை தற்போது காணமுடியவில்லை. அவ்வாறு மறைக்கப் பட்டிருந்த பிரதேசத்தில் ஆலமரத்திற்கு கீழ் அமைக்கப்பட்டிருந்த படிகளைக் கொண்ட நிலத்தடி சிறைக் கூடங்கள் இரண்டையும் அவர் அடையாளம் காட்டினார்.
அதில் வலது பக்கமுள்ள அறையில் ரஜீவ் நாகநாதன், ஜோன் ரீட், அலி அன்வர் ஆகிய மூவர் தடுத்து வைக்கப்பட்டிருந்ததாகவும் குறிப்பிட்டிருந்தார்.
3. விமலரத்ன சிறி செனவிரத்ன
இந்த சாட்சியாளர் குற்றப்புலனாய்வுப் பிரிவினருக்கு வழங்கிய வாக்கு மூலத்தின் பிரகாரம் 2008.03.27 அன்றிலிருந்து 2009.04.25 அன்று வரையில் இலங்கை கடற்படையின் இறங்குதுறையில் கிழக்கு உளவுப் பிரிவுக்குட்பட்டு சேவை செய்த காலப்பகுதியில் “கன்ஸைட்” நிலத்தடி சிறைக்கூடம் அமைந்திருந்த பிரதேசம் அப்போது தகரத்தினால் மறைக்கப்பட்டி ருந்த இடத்தை அடையாளம் காட்டி னார்.
அதனுள் அமைந்திருந்த நிலத்தடி சிறைக் கூடத்தைக் காட்டினார். தான் ஒரு நாள் லெப்டினன் கொமாண்டர் சி.கே.வெலகெதரவுடன் அந்த இடத்துக்குச் சென்ற போது 25 – 30 வயதுக்கிடைப்பட்ட 2 சிவிலியன்கள் அந்த இடத்தில் இருந்ததாகவும் அதில் ஒருவரின் தலையில் காயமொன்று இருந்ததாகவும் அந்த இடத்தையும் குறிப்பிட்டு காட்டினார்.
4. ஜெய்னுலாப்தீன் ஸரீப்தீன் பிரதான நிருவாக சிற்றூழியர்
இந்த சாட்சியாளர் 2005 ஆம் ஆண்டிலிருந்து 2012 ஜனவரி மாதம் வரை இலங்கை கடற்படை இறங்குதுறை அல்லது டொக் யார்ட் நிறுவனத்தின் கிழக்கு உளவுப் பிரிவுக்குட்பட்டு சேவையாற்றியுள்ளார் இவர் “கன்ஸைட்” என அடையாளப்படுத்தப்படும் இடத்தை அடையாளம் காட்டினார். தான் அந்த இடத்தின் நுழைவாயிலில் கடமையில் ஈடுபடுத்தப்பட்டிருந்த ஆயுதத்துடன் கூடிய
கடற்படையினரை சோதனை செய்ய 4 மணி நேரத்துக்கு ஒருமுறை அவ்விடத்துக்கு வந்ததாகக் குறிப்பிட்டு கடற்படைவீரர்கள் கடமையில் ஈடுபடுத்தப்பட்டிருந்த இடத்தையும் அடையாளம் காட்டினார்.
(தொடரும்)
– எம்.எப்.எம்.பஸீர்
