சேலம் மாவட்டம் மேட்டூர் திருநகர் ஆஸ்பிட்டல் காலனியைச் சேர்ந்த சேவியர்ராஜ் என்பவரின் மகன் பிலிக்ஸ் ஆன்டனி (வயது 40). இவருடைய மனைவி ஸ்டெல்லா ஜெயந்தி (32). இவர்களின் மகள்கள் ஜார்ஜியா (16), கிளிடாஸ் பெனட் (13). பிலிக்ஸ் ஆன்டனி தனது உறவினர்களுடன் காரில் வேளாங்கண்ணி ஆலயத்துக்கு செல்ல திட்டமிட்டார்.
இதற்காக அவர், தனது சகோதரர் வர்க்கீஸ் (47) மற்றும் உறவினர்களான அருள்ராஜின் மனைவி எமல்டா ஜூலியட் (35), அருள்ராஜின் மகள்கள் இன்டிப்பென்டினா வர்ஜின் (12), ஜோஸ்பின் ஆல்பினா (10) மற்றும் ரெஜினாஜோன் ஆர்ப் (46) ஆகியோரை அழைத்திருந்தார்.
நேற்று அதிகாலை திருச்சி மாவட்டம் சமயபுரம் அடுத்த மண்ணச்சநல்லூர் மான்பிடிமங்கலம் பகுதியில் சேலம்-திருச்சி தேசிய நெடுஞ்சாலையில் வந்த போது, திடீரென கார் டிரைவரின் கட்டுப்பாட்டை இழந்து, சாலையோர தடுப்பு கம்பியில் மோதி, பள்ளத்தில் இறங்கி விபத்துக்குள்ளானது. இதில் கார் முற்றிலும் உருக்குலைந்தது.
காரில் பயணம் செய்தவர்கள் இடிபாடுகளுக்குள் சிக்கி படுகாயம் அடைந்தனர். இதனால் அவர்கள் ‘காப்பாற்றுங்கள், காப்பாற்றுங்கள்’ என்று அபயக்குரல் எழுப்பினர்.
இதில் பிலிக்ஸ் ஆன்டனியின் மனைவி ஸ்டெல்லா ஜெயந்தியும், அருள்ராஜின் மனைவி எம்ல்டா ஜூலியட்டும் சம்பவ இடத்திலேயே பரிதாபமாக உயிரிழந்தனர்.
விபத்து பற்றி தகவலறிந்த திருச்சி மாவட்ட போலீஸ் சூப்பிரண்டு ஜியாஉல்ஹக், ஜீயபுரம் துணை போலீஸ் சூப்பிரண்டு ராதாகிருஷ்ணன், மண்ணச்சநல்லூர் போலீஸ் இன்ஸ்பெக்டர் இம்மானுவேல் ராயப்பன் மற்றும் போலீசார் சம்பவ இடத்திற்கு விரைந்து சென்று விசாரணை நடத்தினார்கள்.
விபத்தில் பலியான எம்ல்டா ஜூலியட், ஸ்டெல்லா ஜெயந்தி ஆகியோர் மேட்டூரில் உள்ள புனித மரியன்னை தொடக்கப்பள்ளியில் ஆசிரியைகளாக வேலை பார்த்து வந்தது குறிப்பிடத்தக்கது.
