பேராதனை போதனா வைத்தியசாலையில் சிகிச்சைக்காக அனுமதிக்கப்பட்ட யுவதி ஒருவர் தடுப்பூசி ஏற்றப்பட்டதன் பின்னர் உயிரிழந்த சம்பவம் தொடர்பில் விசாரணைகள் ஆரம்பிக்கப்பட்டுள்ளன.
கண்டி, பொத்தபிட்டிய பிரதேசத்தில் வசிக்கும் 21 வயதுடைய குறித்த யுவதி வயிற்றில் ஏற்பட்ட கோளாறு காரணமாக வைத்தியசாலையில் அனுமதிக்கப்பட்ட நிலையிலேயே உயிரிழந்துள்ளார்.
இந்நிலையில் மரணம் தொடர்பில் யுவதியின் குடும்பம் பேராதனை பொலிஸில் முறைப்பாடு செய்துள்ளது.
21 வயதான சமோதி சங்கதீபனீ எனும் யுவதி கடந்த திங்கட்கிழமை வயிற்றுப்போக்கு காரணமாக கெடப்பிடடிய பிரதேச வைத்தியசாலையில் அனுமதிக்கப்பட்டிருந்தார். இருப்பினும் அன்றையதினம் சிகிச்சை பெற்ற அவர் செவ்வாய்க்கிழமை பேராதனை வைத்தியசாலைக்கு மாற்றப்பட்டுள்ளார்.
உயிரிழந்த யுவதியின் தாய் கூறுகையில் மூன்றரை மணியளவில் மகளுக்கு சேலைன் மருந்து மற்றும் இரண்டு மேலதிக மருந்துகளை ஏற்றினார்கள். மருந்து ஏற்றும் போது மகளின் கண்ணில் மாற்றம் ஏற்பட்டது. பின்னர் உடல் நீல நிறமாக மாறி கீழே விழுந்துவிட்டார்.
சிகிச்சையளிக்கப்பட்ட போது யுவதி உயிரிழந்துள்ளதாகவும் இதற்கான காரணம் இதுவரையில் கண்டறியப்படவில்லை எனவும் வைத்தியசாலையின் பணிப்பாளர் டாக்டர் அர்ஜூன திலக்கரட்ன தெரிவித்தார்.
இதற்கு முன்னர் சிக்கல்களுக்குள்ளான மருந்துகள் வழங்கப்படவில்லை. அவருக்கு வழங்கப்பட்ட மருந்து ஏனைய நோயாளர்களுக்கும் வழங்கப்பட்டதாக அவர் மேலும் தெரிவித்தார்.
இதற்கு முன்னர் பேராதனை வைத்தியசாலையில் வழங்கப்பட்ட மயக்க மருந்து காரணமாக இரண்டு பெண்கள் உயிரிழந்ததுடன் அந்த மருந்து தொகுதியில் ஒரு வகை பதார்த்தம் குறைவடைந்தமையே மரணத்துக்கு காரணம் என கண்டறியப்பட்டது என்பதும் குறிப்பிடத்தக்கதாகும்.
அரசு சரியான மருத்துவ உபகரணங்களை வழங்காதது பேராதனை வைத்தியசாலையில் யுவதிஉயிரிழந்தமைக்கான காரணமாக இருக்கலாம் என அகில இலங்கை தாதியர் சங்கத்தின் பொதுச் செயலாளர் எச். எம். பி. எஸ். மடிவத்த இன்று (13) தெரிவித்தார்.
யுவதிக்கு செலுத்தப்பட்ட மருந்தை 10 மில்லி சிரிஞ்சில் கரைத்து செலுத்த வேண்டும் என்றாலும், பேராதனை வைத்தியசாலையில் மட்டுமன்றி கொழும்பு தேசிய வைத்தியசாலையிலும் 10 மில்லி சிரிஞ்ச்கள் இல்லை.இதனால் தாதி இரண்டு 5 மில்லி சிரிஞ்ச்களில் இரண்டு முறை ஊசி போட்டிருக்க கூடும் .
குறித்த 5 மில்லி சிரிஞ்சில் நீர்த்திருந்தால், அது அதிக செறிவூட்டலில் பெற்றிருக்கலாம் என்றும், அரசு மருத்துவமனைகளுக்கு அத்தியாவசிய மருந்துகள் மற்றும் உபகரணங்களை வழங்காததே இதற்குக் காரணம் என்றும் அவர் மேலும் கூறினார்.
ஊசி மூலம் செலுத்தப்பட்டுள்ள மருந்து, நாடு முழுவதும் உள்ள மருத்துவமனைகளில் பயன்படுத்தப்படும் மருந்து என்றும், செவிலியர் மீது எந்த தவறும் இல்லை என்றும், சரியான முறையில் தடுப்பூசி போடப்பட்டதாகவும் அவர் தெரிவித்துள்ளார்.
சமீபகாலமாக, தரம் குறைந்த மருந்து கமிஷன் அல்லது வேறு காரணங்களுக்காக பெறப்பட்டதா என்ற சந்தேகம் எழுந்துள்ளது.
செவிலியர்களாகிய தாங்கள் நோயாளர்களுக்கு அரசாங்கம் வழங்கும் மருந்துகளையே வழங்க வேண்டியுள்ளது என தெரிவித்த அவர், மருந்தின் தரத்தை கையாளும் திறன் செவிலியர்களுக்கு இல்லை எனவும் குறிப்பிட்டுள்ளார்.
