காஸாவை மையமாகக் கொண்ட இஸ்ரேலிய, பலஸ்தீன ஆயுத நெருக்கடி. அதற்குத் தற்காலிகமாகவேனும் ஓய்வு கொடுக்க வேண்டும் என்பது உலக மக்களின் அபிலாஷை. சமகாலத்தின் சர்வதேச அரசியல் ஒழுங்கில் அதற்கு வாய்ப்பே இல்லை என்பது கண் முன்னே நிற்கும் கசப்பான உண்மை.
ஆயுதநெருக்கடி காட்டாற்று வெள்ளமெனில் கையில் கிடைக்கும் சிறு துரும்பேனும் காப்பாற்ற உதவுமா என்ற ஆசை எழுவது இயல்பு.
இன்றைய சூழ்நிலையில், அந்த சிறு துரும்பு சீனாவா என்ற கேள்வி எழுவது இதனால் தான்.
கடந்த வாரம் சீன ஜனாதிபதி ஸி ஜின்பிங் மௌனம் கலைத்திருந்தார். மத்திய கிழக்கில் உடனடி போர் நிறுத்தம் அவசியம் என்றிருந்தார். சீனத் தலைநகரில் எகிப்திய பிரதமருடனான சந்திப்பைத் தொடர்ந்து, ஸி ஜின்பிங் விடுத்த கோரிக்கை அது.
இரு தேசங்கள் அருகருகே இருக்கக்கூடிய தீர்வு. அதன்மூலம் சுதந்திர பலஸ்தீன இராச்சியம். இதுவே நெருக்கடியில் இருந்து வெளியே வர அடிப்படையான வழி என்றார், சீனத் தலைவர். இது வழமைக்கு மாறானதாக இருந்தது.
தேவையென்றால் பொருளாதார உதவி செய்வதாகக் கூறிக் கொண்டு, நிபந்தனைகளுடன் கடன் வழங்கும். அதன்மூலம் ஒரு நாட்டையே மண்டியிடச் செய்து வளங்களை விழுங்கி விடுவது சீனாவின் தந்திரோபாயம்.
இருந்தபோதிலும், அரசியல் நெருக்கடி என்று வருகையில், எந்தவொரு தேசத்தின் உள்விவகாரங்களிலும் தலையிடுவதில்லை என்ற நிலைப்பாட்டை உரத்துக் கூறி, இதுவே வெளிவிவகாரக் கொள்கையென கடந்த காலம் முழுவதும் சீனா வலியுறுத்தி வந்தது.
சமகால மத்திய கிழக்கு நெருக்கடியைப் பொறுத்தவரையில், இரு தேச தீர்வை முன்மொழிவதுடன் சீனா நிற்கவில்லை. ஐக்கிய நாடுகள் சபையிலும் அதிருப்தியை வெளிப்படுத்தியது.
மத்திய கிழக்கில் உடனடியாக போர் நிறுத்தம் அவசியம் என்ற கோரிக்கையுடன் ரஷ்யா பிரேரணையைக் கொண்டு வந்தபோது, அமெரிக்கா வீட்டோ அதிகாரத்தைப் பயன்படுத்தி ரத்துச் செய்தது. அதற்கு சீனா வெளிப்படையாக அதிருப்தியை வெளியிட்டது.
இதன்மூலம், இராஜதந்திர ரீதியாக இரண்டு நோக்கங்களை நிறைவேற்ற சீனா விரும்புகிறது எனலாம்.
வளர்முக நாடுகளின் ஆபத்பாந்தவன் தோற்றப்பாட்டை நிலைநிறுத்துவது முதல் நோக்கம். அரசியல் ரீதியாக முனைவாக்கப்பட்ட உலகில், அமெரிக்காவுக்கு மாற்றாகத் திகழும் வல்லரசாக நிலைப்படுத்திக் கொள்வது அடுத்த நோக்கம்.
ரஷ்ய, உக்ரேனிய நெருக்கடியிலும் சீனாவின் நேரடித் தலையீட்டைக் காணக்கூடியதாக இருந்தது. இரு நாடுகளுக்கும் இடையில் அரசியல் தீர்வையும் சீனா முன்மொழிந்தது.
இப்போது, இஸ்ரேல், பலஸ்தீனம் ஆகிய இருதரப்புகளுக்கும் நட்பு நாடாக தன்னை வர்ணித்துக் கொண்டு, இராஜதந்திர முனைப்புக்களை சீனா ஆரம்பித்துள்ளது.
சீன வெளிவிவகார அமைச்சரின் அமெரிக்க விஜயத்தையும் இத்தகைய இராஜதந்திர முயற்சியின் ஓரம்சமாகவே பார்க்க வேண்டியிருக்கிறது.
மத்திய கிழக்கின் அரசியல் வரலாற்றில் சீனாவின் பங்களிப்பைப் பார்க்கலாம்.
1949ஆம் ஆண்டு காலப் பகுதியில் இஸ்ரேலுடன் இராஜதந்திர உறவுகளை ஏற்படுத்த சீனா முயன்றதென்னவோ உண்மையே.
எனினும், 1960களில் அப்போதைய தலைவர் மாவோ சே துங் பலஸ்தீன விடுதலைப் போராளிகளுக்கு ஆயுதம் வழங்கி உதவி செய்தார். பலஸ்தீனர்களுக்கும், அரேபிய நாடுகளுக்கும் சீனா வெளிப்படையாகவே ஆதரவை வெளிப்படுத்தியது.
மாவோ மறைந்து, வெளியுலகத் தொடர்புகளை ஏற்படுத்தத் தொடங்கியதை அடுத்து, சீனாவின் கொள்கைகளும் மாறின.
1992இல் இஸ்ரேலுடன் இராஜதந்திர உறவை ஏற்படுத்தியது. இஸ்ரேல், பலஸ்தீனர்கள் ஆகிய இரு தரப்புககளுடனான உறவுகளில் சமநிலையைப் பேண முனைந்தது.
வேறு நாடுகளில் பிரச்சினைகளைத் தீர்க்க, சீனா இராஜதந்திரிகள் தீர்வு யோசனைகளை வரைவார்கள். ஆனால், இன்னொரு நாட்டின் உள்விவகாரங்களில் தலையிடாமை என்ற கொள்கை காரணமாக தீர்வு முயற்சிகள் தேக்க நிலையை அடைவது வழக்கம்.
அரபு நாடுகளைத் தம்பக்கம் ஈர்த்துக் கொண்டு, இஸ்ரேலியர்களும், பலஸ்தீனர்களுக்கும் இடையிலான நெருக்கடியில் மத்தியஸ்தம் செய்யவும் சீனா முன்வந்தது.
கடந்த ஜூன் மாதம் பலஸ்தீன அதிகார சபையின் தலைவர் மஹ்மூத் அப்பாஸுடன் சீன ஜனாதிபதி உடன்படிக்கையொன்றை ஏற்படுத்தினார். உதவிக்காக கையேந்தி நின்ற மஹ்மூத் அப்பாஸ், சீனாவுக்கு அதீத விசுவாசத்தைக் காண்பிக்க முனைந்த விதம் வேடிக்கையானது.
சீனா உய்கூர் முஸ்லிம்களைக் கட்டுப்படுத்துவதில் தவறில்லை. அது கடும்போக்குவாதம் சம்பந்தப்பட்டதாகும். அதில் மனித உரிமைகள் பற்றியெல்லாம் பேச முடியாதென அப்பாஸ் துதி பாடினார்.
கடந்த மூன்று வார காலமாக மத்திய கிழக்கில் நிகழும் ஆயுதமோதல்கள் தொடர்பிலும் சீனா கவனமாகவே நடந்து கொள்கிறது.
மேலைத்தேய நாடுகள் ஹமாஸ் இயக்கத்தை மிகவும் கடுமையான கண்டித்தபோதிலும், சீன அதிகாரிகள் ஹமாஸ் என்ற சொல்லையே தவிர்த்து வந்திருக்கிறார்கள்.
அமெரிக்காவும், பிரிட்டனும் காஸாவாசிகள், மேற்குக் கரைவாசிகள் என்று பிரித்தாளும் இராஜதந்திரத்தை அனுசரித்து காஸாவில் உள்ளவர்களை பயங்கரவாதத்துக்கு உடந்தையாக நிற்பவர்கள் என்ற சித்திரத்தை ஏற்படுத்த முனைகையில், சீனாவோ இஸ்ரேலிய- – – பலஸ்தீன நெருக்கடி என்றே கூறுகிறது.
சீன வெளிவிவகார அமைச்சர் இஸ்ரேலை நேரடியாக கண்டிக்கிறார். சுயபாதுகாப்பு என்ற தேவையைத் தாண்டிச் செல்வதாக இஸ்ரேல் மீது விரல் நீட்டிவிட்டு, காஸா மக்கள் மீதான கூட்டுத்தண்டனையை நிறுத்துங்கள் என்று கோரிக்கை விடுகிறார்.
பாதிக்கப்பட்டவர்களுக்காக குரல் கொடுத்தல் என்ற தார்மீகத்தைத் தாண்டிய ராஜதந்திரம் அவரது கோரிக்கையில் இருக்கிறது. இஸ்ரேலுடன் கூட்டு சேர்ந்து மத்திய கிழக்கில் அமெரிக்கா நிலைநாட்டியுள்ள ஏகாதிபத்தியத்தி;ற்கு எதிராக குரல் எழுப்பவது அவரது சாணக்கியம்.
மத்திய கிழக்குப் பிராந்தியத்தில் இழுபட்டு நீடிக்கும் நெருக்கடிகளில் இருந்து சீனா எப்போதும் தூர விலகியே நின்றது. எனினும், சமீபகாலமாக சீனாவில் போக்கு மாறியிருக்கிறது.
இங்கு பொருளாதார ரீதியாக காலூன்றினால் மாத்திரம் போதாது, அரசியல் ரீதியாக ஆதிக்கம் செலுத்தக்கூடிய சக்தி இருக்க வேண்டுமென சீனத் தலைவர்கள் நினைப்பதாக இருக்கக்கூடும்.
உலக ஒழுங்கை தனக்குச் சார்பானதாக மாற்றிக் கொள்ளும் வகையில் அரேபிய நாடுகளின் ஆதரவை வென்றெடுப்பதும் இன்னொரு நோக்கமாக இருக்கலாம்.
இன்று ஐக்கிய நாடுகள் சபையின் ஊடாக காஸா மக்களுக்கு உணவு, மருந்து முதலான பொருட்களை வழங்கப் போவதாக சீனா உறுதியளித்துள்ளது.
இஸ்ரேலியர்களைப் பொறுத்தவரையில், சீனாவுடன் உறவைப் பேண விரும்பினாலும் அவர்கள் சீனாவை நடுநிலையான சமாதான தரகராக பார்ப்பது கிடையாது.
கடந்த ஏழாம் திகதி ஹமாஸ் இயக்கம் இஸ்ரேலியர்களைத் தாக்கியதைத் தொடர்ந்து, சீனாவுக்கான இஸ்ரேலியத் தூதுவர் சற்றுக் கடுமையான தொனியில் பேசினார்.
ஆட்கள் வீதிகளில் கொல்லப்படும்போது, இரு தேசத் தீர்வுகள் பற்றி பேசலாமா என்று அவர் கேள்வி எழுப்பியிருந்தார்.
வரலாற்று ரீதியான சார்பு காரணமாகவோ என்னவோ, சீனர்களின் தலையீட்டை பலஸ்தீனர்கள் விரும்புகிறார்கள். பலஸ்தீன அதிகாரசபையின் பிரதிநிதிகள், சீனாவின் மீது பலஸ்தீனர்களுக்கு உள்ள நம்பிக்கை வெளிப்படையாகவே விபரித்துள்ளார்கள்.
இத்தகைய பின்புலத்தில், தற்போது காஸாவில் தொடரும் அவலத்தை நிறுத்தும் ஆற்றல் சீனாவிற்கு இருக்குமா என்பது கேள்விக்குரிய விடயமே.
வரலாறு நெடுகிலும் பகையாளிகளாகத் திகழ்ந்த சவூதி அரேபியாவையும், ஈரானையும் இணங்கச் செய்து, இருநாடுகளுக்கும் இடையிலான இராஜதந்திர உறவுகளைக் கட்டியெழுப்புவதில் சீனா வெற்றி பெற்றதென்னவோ உண்மையே.
ஆனால், ரஷ்ய – உக்ரேனிய ஆயுதமோதலை நிறுத்துவதில் சீனாவிற்கு எதனையும் சாதிக்க முடியவில்லை. உக்ரேனிய மக்கள் சீனாவை நம்பவில்லை என்பது காரணமாக இருக்கலாம்.
இந்தக் கட்டுரையை எழுதிக் கொண்டிருக்கும் சமயத்தில், சீன வெளிவிவகார அமைச்சர் வாங் யி அமெரிக்கா சென்றிருக்கிறார்.
இஸ்ரேல் – பலஸ்தீன பிரச்சனைக்கு தீர்வு காண சர்வதேச சமாதான மாநாட்டை நடத்த வேண்டும் என்ற விடயத்தை அவர் எடுத்துச் சென்றிருப்பதாகத் தெரிகிறது.
இன்று காஸா மனிதப் பேரவலங்களில் உயிர்கள் பலியாகும் பெரும் மயான பூமியாகிக் கொண்டிருக்கிறதாயின், இஸ்ரேலிய – பலஸ்தீன நெருக்கடியின் எல்லா கட்டடங்களிலும் அமெரிக்கா விட்ட தவறு தான் முக்கிய காரணம் என்பதை உலக மக்கள் அறியத் தலைப்பட்டுள்ளனர். அதை வெளிப்படையாகக் கூறியும் வருகிறார்கள்.
இன்று வல்லரசு போட்டிகளை ஒருபுறம் தள்ளி வைத்து விட்டு, இதயசுத்தியுடன் சீனாவின் திட்டத்தை ஆதரித்தால், அது காஸாவில் வாழும் மக்களுக்கு மாத்திரமன்றி, ஒட்டுமொத்த உலகிற்கும் நன்மை பயக்கும்.
-சதீஷ் கிருஷ்ணபிள்ளை–
