வியத்புற வீட்டுத் திட்டம் தொடர்பாக அரசாங்கம் உண்மைக்கு மாறான தகவல்களை வெளியிட்டு வருவதாகவும், இது ஒரு அரசியல் பழிவாங்கல் நடவடிக்கை எனவும் முன்னாள் பாராளுமன்ற உறுப்பினர் பிரேம்நாத் சி தொலவத்த குற்றம் சாட்டியுள்ளார். திங்கட்கிழமை (15) இடம்பெற்ற ஊடகவியலாளர் சந்திப்பில் கருத்து வெளியிட்ட அவர், இந்த விடயம் குறித்து தான் சட்ட நடவடிக்கை எடுக்கவுள்ளதாகத் தெரிவித்தார்.
மக்களின் கடும் எதிர்ப்பு காரணமாக விவாதிக்கப்பட்ட வியத்புற வீட்டுத் திட்டம், அரசாங்கத்தின் அரசியல் நாடகமாக மாறியுள்ளதாக அவர் குறிப்பிட்டார். இந்த வீடுகள் இலவசமாகவோ அல்லது மிகக் குறைந்த விலையிலோ பெறப்பட்டதாக அரசாங்கம் தவறான பிரசாரங்களை மேற்கொண்டு வருவதாகவும் அவர் சுட்டிக்காட்டினார்.
‘வீட்டுக்காக நான் 1.4 மில்லியன் ரூபாவை காசோலையாக செலுத்தியுள்ளேன். வீட்டின் மொத்த பெறுமதியான 20.2 மில்லியன் ரூபாவை நான் முழுமையாக செலுத்தியுள்ளேன். இதன் பெறுமதி இறுதியாக 30.7 மில்லியன் ரூபாவாக அதிகரித்தது’ என ஆவணங்களைக் காண்பித்து அவர் தெரிவித்தார். முதலில் பணத்தை ஏற்றுக்கொண்ட அரசாங்கம், இப்போது வீடுகளின் விற்பனை மோசடியானது எனக் கூறுவதாகவும் அவர் விமர்சித்தார்.
அரசாங்கத்தின் இந்தச் செயற்பாடுகள் வெறுமனே அரசியல் வஞ்சகம் மற்றும் காழ்ப்புணர்ச்சி காரணமாகவே மேற்கொள்ளப்படுவதாகக் கூறிய அவர், இது போன்ற செயல்கள் நேர்மையானவர்கள் அரசியலுக்கு வருவதைத் தடுக்கும் என்றும் தெரிவித்தார். ‘வியத்புற வீட்டுத் திட்டம்’ ஏழை மக்களுக்கானது அல்ல, நடுத்தர வர்க்கத்தினருக்கானது என்றும் அவர் குறிப்பிட்டார்.
மேலும், முன்னாள் ஜனாதிபதிகளின் சலுகைகளை அரசாங்கம் பறித்திருப்பது குறித்து தனது அதிருப்தியை வெளியிட்ட பிரேம்நாத் சி தொலவத்த, இது கடந்த கால தலைவர்கள் மீது காட்டும் மரியாதையின்மை எனவும், எதிர்கால தலைவர்களுக்கு இது ஒரு தவறான முன்னுதாரணமாக அமையும் எனவும் எச்சரித்தார். போரை முடிவுக்குக் கொண்டுவந்தது, நாட்டின் பொருளாதாரத்தை அபிவிருத்தி செய்தது போன்ற சேவைகளுக்காக கடந்த கால தலைவர்கள் மதிக்கப்பட வேண்டும் என அவர் வலியுறுத்தினார்.
தன்னிடம் தேவையான அனைத்து சட்ட ஆவணங்களும் இருப்பதாகவும், தனது நேர்மையை நிரூபிக்க சட்ட நடவடிக்கை எடுக்கத் தயாராக இருப்பதாகவும் அவர் தெரிவித்தார். அரசியல் பிரசாரங்களுக்கு பொதுமக்கள் ஏமாறாமல் உண்மையை அறிந்துகொள்ள வேண்டும் என்றும் அவர் கேட்டுக்கொண்டார்.
அரசாங்கம் ஆட்சிக்கு வந்த பின்னரே தான் வீட்டின் ஆரம்ப கட்டணமான 25 சதவீத தொகையைச் செலுத்தியதாகவும், அதன் பின்னர் மாதாந்த தவணைகளை தொடர்ந்து செலுத்தி வருவதாகவும் அவர் தெரிவித்தார். இந்த பரிவர்த்தனையில் ஏதேனும் சிக்கல் இருந்தால், அரசாங்கம் பணம் வாங்கியிருக்கக்கூடாது அல்லது அதனை திருப்பி அளித்திருக்க வேண்டும் என்றும், அதற்குப் பதிலாக பொய்யான குற்றச்சாட்டுகளை சுமத்துவது நியாயமற்றது என்றும் அவர் மேலும் தெரிவித்தார்.
