‘டிட்வா’ புயலின் தாக்கத்தால் இலங்கை எதிர்கொண்டுள்ள மிக மோசமான பேரழிவுச் சூழலில், பாதிக்கப்பட்ட மக்களுக்காகப் பல்வேறு வெளிநாடுகளிடமிருந்து உணவுப் பொருட்கள் உட்பட நிவாரண உதவிகள் பெறப்பட்டு வருகின்றன. இந்நிலையில், பாகிஸ்தானில் இருந்து இலங்கைக்கு அனுப்பி வைக்கப்பட்டுள்ள நிவாரணப் பொருட்கள் தொடர்பாகச் சமூக வலைதளங்களில் கடுமையான குற்றச்சாட்டுகள் முன்வைக்கப்பட்டு வருகின்றன.
-
சர்ச்சையின் ஆதாரம்: பாகிஸ்தான் விமானப்படை ஆதரவுடன் பாகிஸ்தான் இராணுவத்தின் மீட்புக் குழுவினர் C-130 ரக விமானம் மூலம் நிவாரணப் பொருட்களுடன் இலங்கைக்குப் புறப்படத் தயாராக இருந்தனர். இவ்வாறு கொண்டு வரப்பட்ட நிவாரணப் பொருட்களில், காலாவதித் திகதியாக (Expiry Date) 2024ஆம் ஆண்டு அச்சிடப்பட்டிருப்பதான புகைப்படங்கள் சமூக வலைதளங்களில் பரவி வருகின்றன.
-
புகைப்பட உறுதிப்பாடு: குறித்த புகைப்படங்கள், இலங்கைக்கான பாகிஸ்தான் உயர்ஸ்தானிகராலயத்தின் உத்தியோகபூர்வ எக்ஸ் தளத்தில் (X – Twitter) இடப்பட்ட பதிவுடனும் பகிரப்பட்டு வருவதாகத் தெரிவிக்கப்படுகிறது.
எழுந்துள்ள கண்டனங்கள்:
இந்தச் சம்பவம், உண்மையில் அதிர்ச்சியையும் அதிருப்தியையும் ஏற்படுத்தியுள்ள அதேவேளை, பாதிக்கப்பட்ட மக்களுக்கு வழங்குவது தொடர்பில் அச்சத்தையும் ஏற்படுத்தியுள்ளது.
-
அவமரியாதை: “இலங்கை மக்கள் மோசமான வெள்ளத்தால் பாதிக்கப்பட்டுள்ள நிலையில், காலாவதியான நிவாரணப் பொருட்கள் அனுப்பப்பட்டிருப்பது ஏற்றுக்கொள்ள முடியாதது மற்றும் மிகவும் அவமரியாதைக்குரியது” எனப் பலரும் எதிர்ப்பு தெரிவித்து வருகின்றனர்.
-
அலட்சியம்: “மனிதாபிமான உதவி என்பது உயிர்களைப் பாதுகாப்பதற்காகவே தவிர, அவர்களை ஆபத்தில் ஆழ்த்துவதற்காக அல்ல. இலங்கையர்கள் உண்மையான நட்பைப் பாராட்டுகிறார்கள், ஆனால் காலாவதியான பொருட்களை அனுப்புவது நட்பு அல்ல, அது அலட்சியம்” எனவும் பலர் கண்டனம் தெரிவித்து வருகின்றனர்.
