பொதுபல சேனாவின் திடீர் வளர்ச்சி எல்லோராலும் ஆச்சரியமாகவே பார்க்கப்பட்டாலும், அது அரசாங்கத்துக்குக் கூட ஆபத்தானது என்பதை இப்போது ஓரளவுக்கேனும் உணரத்தக்கதாக உள்ளது. ஏனென்றால், இப்போது அமைச்சர்கள் மீது நேரடியாகவே மோதுகின்ற நிலைக்கு வந்திருக்கிறது பொதுபல சேனா.
அது மட்டுமன்றி, துள்ளிக் குதிக்கும் அமைச்சர்களை ஜனாதிபதி மஹிந்த ராஜபக் ஷ அடக்காது விட்டால், நாமே அடக்க வேண்டி வருமென்று, எச்சரிக்கை விடுத்திருக்கிறது பொதுபல சேனா.
இது எதனை உணர்த்துகிறது என்றால், ஒரு கட்டத்துக்கு மேல் அரசாங்கத்தினால் கூட அடக்க முடியாத- ஒரு அசுர வளர்ச்சி பெற்ற அமைப்பாக பொதுபல சேனா மாறி வருகிறது என்பதையே ஆகும்.
ராவண பலய, சிஹல ராவய போன்ற வேறும் சில சிங்கள பௌத்த அடிப்படைவாத அமைப்புகள் அண்மைக்காலத் தில் முளைத்திருந்தாலும், பொது பல சேனாவின் வளர்ச்சி தான் அபரிமிதமானது, ஆச்சரியத்துக்குரியது.
குறுகிய காலத்துக்குள், இலங்கை முழுவதும் பிரபலம் பெற்ற அமைப்பாக மாறிவிட்டது பொதுபல சேனா. இன்று பொதுபல சேனாவையோ அதன் பொதுச்செயலர் கலகொடஅத்தே ஞானசார தேரரையோ அறியாதவர்கள் யாரும் இலங்கையில் இருப்பார்கள் என்று தோன்றவில்லை.
சில ஆண்டுகளுக்குள், உலகளாவிய ரீதியாக பொதுபல சேனா பிரபலம் பெற்றிருக்கிறது, என்றால், அதற்கு அதன் நடவடிக்கைகள் தான் காரணம்.
ஓர் அரசியல் கட்சியாக இல்லாமல், இதனைச் சாதித்துள்ளது அந்த அமைப்பு.
பெரிய பெரிய அரசியல் கட்சிகள் கூடத் தம்மை மக்கள் மத்தியில் கொண்டு செல்வதற்கு, தம்மைப் பற்றிய செய்தி கள் ஊடகங்களில் வெளியாவதற்கு வழி தெரியாமல் திணறிக் கொண்டிருக்கின்றன. ஆனால், பொதுபல சேனா என்ற அமைப்பு, மிக இலகுவாக மக்களைச் சென்றடைந்து விட்டது.
முன்னர் ஊடகங்களைத் தேடுகின்ற நிலை பொதுபல சேனாவுக்கு இருந்தா லும் இப்போது, ஊடகங்களே அதனைத் தேடுகின்ற அளவுக்கு நிலைமை மாறியி ருக்கிறது.
இப்போது இலங்கையில் இருந்து வெளியாகின்ற ஊடகங்களில், ஆளும் ஐக்கிய மக்கள் சுதந்திர முன்னணி பற்றிய செய்தி வருகிறதோ இல்லையோ பொதுபல சேனாவின் செய்தி வந்துவிடுகிறது.
முன்னர், விடுதலைப் புலிகள் அல்லது எல்.ரீ.ரீ.ஈ. என்ற சொல் ஊடகங்களில் எப்படி தினமும் இடம்பிடித்ததோ, அதுபோல, இப்போது பொதுபல சேனா என்ற சொல் ஊடகங்களில் தினமும் இடம்பிடிக்கிறது.
மிகப் பெரிய ஆளணி வளம் கொண்ட ஓர் அமைப்பாக இல்லாவிட்டாலும், இதன் வளர்ச்சியை, இலகுவாக எடுத்துக் கொள்ளவோ- குறைத்து மதிப்பிட்டு விடவோ முடியாது.
இவ்வாறு திடீரென உப்பிப் பெருத்த பொதுபல சேனா அமைப்புக்கு அரசாங்கத்தின் பின்புல ஆசீர்வாதம் இருப்பதாக பொதுவான சந்தேகங்கள் உள்ளன.
பல சமயங்களில், அரசாங்கத்தின் தேவைகளை இலகுவாக நிறைவேற்றிக் கொள்வதற்கான ஒரு கருவியாக பொதுபல சேனா பயன்பட்டுள்ளதே, இந்தக் குற்றச்சாட்டுகளுக்குக் காரணம்.
எனினும், அண்மையில் அளுத்கம, பேருவளை பகுதிகளில் முஸ்லிம்களு க்கு எதிரான வன்முறைகளின் பின்னணியில் பொதுபல சேனா இருந்ததான குற்றச்சாட்டு, அரச தரப்பு அமைச்சர்கள் சிலருக்கும், பொதுபல சேனாவுக்கும் இடையில் நேரடியான முரண்பாடுக ளைத் தோற்று வித்துள்ளது.
குறிப்பாக, அமைச்சர் ராஜித சேனாரத்ன, பொதுபல சேனா மீது குற்றச்சாட்டுகளைச் சுமத்த, பதிலுக்கு பொதுபல சேனாவும் குற்றச்சாட்டுகளைச் சுமத்த இந்த மோதல் விரிவடைந்துள்ளது.
இதன் எதிரொலியாகத் தான் துள்ளிக் குதிக்கும் அமைச்சர்களை அடக்காது போனால், நாமே அடக்குவோம் என்று பொதுபல சேனாவின் பொதுச்செயலர் ஞானசார தேரர், ஜனாதிபதி மஹிந்த ராஜபக் ஷவுக்கே எச்சரிக்கை விடுத்திருக்கிறார்.
மஹிந்த ராஜபக் ஷ தலைமையிலான ஐக்கிய மக்கள் சுதந்திர முன்னணி பல முகங்களைக் கொண்ட ஓர் அரசாங்கமாகும். அதில், கடும் போக்காளர்களும் இருக்கிறார்கள். மென்போக்காளர்களும் இருக்கிறார்கள் – இரண்டுக்கும் இடைப்பட்டவர்களும் இருக்கிறார்கள்.
பொதுபல சேனாவின் செயற்பாடுகள், அரசதரப்பில் உள்ள இடதுசாரிப் போக்குடைய – மென்போக்கு அரசியல்வாதிகள், அமைச்சர்களிடையே, கடுமையான விசனத்தை ஏற்படுத்தியிருக்கிறது.
அதேவேளை, கடும்போக்கு அமைச்சர்களும், அரசியல்வாதிகளும், இதனைத் தமது அரசியலுக்குச் சாதகமாகப் பயன்படுத்த எண்ணுகின்றனர்.
ஆரம்பத்தில் இது பெரியளவில் பிரச்சினையாக உருவாகாது போனாலும், அண்மைக்காலமாக, பொதுபல சேனாவின் விமர்சனங்களும், கண்டனங்களும், தாக்குதல்களும், அரசாங்கத்துக்குள்ளேயே விமர்சனங்களை ஏற்படுத்தத் தொடங்கி விட்டன.
அதற்கும் அப்பால், பொதுபல சேனாவின் இப்போதைய எச்சரிக்கைகளும், மிரட்டல்களும், அரசாங்கத்தை யும் கலக்கம் கொள்ள வைத்திருக்கலாம்.
ஏனென்றால், பொதுபல சேனா இப்போது சாதாரணமானதொரு அமைப்பு அல்ல. அதற்கு சிங்கள,பௌத்த மக்கள் மத்தியில் கணிசமான செல்வாக்கு உள்ளது. அதன் தீவிர மதவாதமும், இனவாதமும், சிங்கள, பௌத்த மக்களிடையே கடுமையான தாக்கங்களை உருவாக்கி விட்டுள்ளது.
2009ஆம் ஆண்டு மே மாதம் போர் முடிவுக்கு வந்த பின்னர், சிங்கள, பௌத்த தேசியவாதத்தின் தலைமைத்துவம் தானே என்று ஜனாதிபதி மஹிந்த ராஜபக் ஷவும் அவரது குடும்பத்தினரும் உருவகப்படுத்தியிருந்தனர்.
ஆனால், பொதுபல சேனாவின் வளர்ச்சி அதற்குச் சவாலாக மாறி வருகிறது.
இளைய தலைமுறையிடம், சிங்கள, பௌத்த பேரினவாத எழுச்சியை உருவாக்குவதில் பொதுபல சேனா கணிசமான பங்கை ஆற்றியிருக்கிறது.
தொடர்ந்தும் அதற்கான முயற்சிகளில் ஈடுபட்டு வருகிறது.
இதனால், சிங்கள பௌத்த பேரினவாதத்தின் தலைமைத்துவத்தை பொதுபல சேனா தட்டிப் பறித்துச் சென்று விடும் நிலை உருவாகியுள்ளது.
இதனை, அரசாங்கம் ஒருபோதும் விரும்பவோ, நெடுங்காலத்துக்குச் சகித்துக் கொண்டிருக்கவோ போவதில்லை.
அவ்வாறு பொதுபல சேனாவின் வளர்ச்சியை அரசாங்கம் சகித்துக் கொள்ளும் நிலை ஒன்று இருக்குமேயானால், அது அரசாங்கத்தின் பலவீனமாகவே கருதப்படும்.
ஏனென்றால், பொதுபல சேனா பெற்று வரும் அசுர வளர்ச்சி, ஒரு கட்டத்தில் அரசாங்கத்தையே விழுங்கும் நிலையை ஏற்படுத்தும்.
அதற்கு முன்னதாக, அரசாங்கம் விழித்துக் கொள்ளாவிடின், வளர்த்த கடா மார்பில் பாய்ந்த கதையாகத் தான் முடியும்.
