கொழும்பு: இலங்கையில் 2 முறை அதிபராக இருந்த ராஜபக்சே, கடந்த 8-ந் தேதி நடந்த தேர்தலில் 3-வது முறையாக போட்டியிட்டு தோல்வியுற்றார். எதிர்க்கட்சிகளின் பொது வேட்பாளராக களமிறங்கிய சிறிசேனா, இலங்கையின் புதிய அதிபராக வெற்றி பெற்று பதவியேற்று உள்ளார்.
தேர்தலில் தோல்வியடைவது உறுதி என அறிந்ததும், ராணுவத்தின் மூலம் மீண்டும் ஆட்சியை கைப்பற்ற எண்ணியதாக ராஜபக்சே மீது குற்றச்சாட்டு எழுந்து உள்ளது. இது தொடர்பாக புதிய அரசு விசாரணை நடத்த முடிவு செய்து உள்ளது.
இந்த நிலையில் அலரி மாளிகை எனப்படும் அதிபர் மாளிகையில் ரகசிய அறை ஒன்றில் இருந்த ரூ.1,500 கோடி பணத்தை அதிகாரிகள் கைப்பற்றி உள்ளனர். இதில் இலங்கை ரூபாய் நோட்டுகளும், பல்வேறு வெளிநாட்டு கரன்சிகளும் இருந்தன.
இதன்மூலம் ராஜபக்சே ஆட்சியில் இருந்த போது, அதிகாரத்தை பயன்படுத்தி கோடிக்கணக்கான பணத்தை கொள்ளையடித்திருப்பது தற்போது வெளிச்சத்துக்கு வந்து உள்ளது. இந்த பணத்தை ராஜபக்சே குடும்பத்தினர் மறந்து வைத்துவிட்டு சென்றிருக்கலாம் என தெரிகிறது.
இவ்வாறு அவர்கள் விட்டுச்சென்ற பணமே இவ்வளவு என்றால், எவ்வளவு அதிகமான தொகையை எடுத்துச்சென்றிருக்கக்கூடும்? என அதிபர் மாளிகை அதிகாரி ஒருவர் கேள்வி எழுப்பி உள்ளார். இது குறித்து விசாரணை நடத்தப்படும் என்றும் அவர் கூறினார்.
இதற்கிடையே ராஜபக்சே குடும்பத்தினர் அரசின் பாதுகாப்பு நிதியத்தில் இருந்து பெருமளவு பணத்தை எடுத்துள்ளதும் கண்டுபிடிக்கப்பட்டு உள்ளது. பாதுகாப்பு நிதியத்தின் தெப்ரபேன் கிளையில் இருந்த ரூ.20 ஆயிரம் கோடி பணத்தில், தற்போது வெறும் ரூ.7 ஆயிரம் கோடி மட்டுமே இருப்பதாக தெரிய வந்து உள்ளது.
இதன் மூலம் ராஜபக்சே குடும்பத்தினர் சுமார் ரூ.13 ஆயிரம் கோடியை அபகரித்து இருப்பது தெரிய வந்து உள்ளது என்றும், இலங்கையின் பாதுகாப்பு மற்றும் நிதித்துறை மந்திரியாக இருந்த ராஜபக்சே எவ்வித ஆவணமும் இன்றி இந்த பணத்தை எடுத்துள்ளதாகவும் அதிகாரிகள் தெரிவித்தனர்.
இந்த நிதி மோசடி குறித்து விரிவான விசாரணை நடத்தப்படும் என தெரிகிறது.
இலங்கை முன்னாள் அதிபர் ராஜபக்சே வீட்டில் அதிரடி சோதனை
20-01-2014
ஆட்சி மாறியதும் இலங்கையில் காட்சிகளும் மாற தொடங்கி விட்டன. ராஜபக்சே அதிபராக இருந்த போது அவரும், குடும்பத்தினரும் பல்வேறு ஊழல் குற்றச்சாட்டுகளில் ஈடுபட்டதாக குற்றம் சாட்டப்பட்டுள்ளது.
ராஜபக்சே குடும்பத்தினர் ஆடம்பர வாழ்க்கை வசதி குறித்த செய்திகளை இலங்கை டெலிவிஷன் ஒளிபரப்பி வருகின்றன. ஏர்கண்டிசன் (குளிர்சாதனம்) வசதியுடன் கூடிய கழிவறைகள், அரசின் அதிகார பூர்வ இல்லத்தில் டிஜிட்டல் வீடியோவுடன் கூடிய திரையரங்கு போன்றவற்றை படம் பிடித்து காட்டினர்.
தேர்தல் பிரசாரத்தின் போது ராஜபக்சேவின் மகன்களுக்கு சொந்தமான ஹெலிகாப்டர்கள், இங்கிலாந்தில் இருந்து இறக்குமதி செய்யப்பட்ட விலை உயர்ந்த குதிரைகள், பந்தய கார்கள் இருப்பதாகவும் எதிர்க் கட்சிகள் புகார் தெரிவித்தனர்.
இந்த நிலையில், ராஜபக்சே அவரது சொந்த கிராமத்தில் உள்ள வீட்டில் கடல் விமானம் மற்றும் லாம்போர்கினி பந்தய காரை பதுங்கி மறைத்து வைத்திருப்பதாக போலீசுக்கு புகார்கள் வந்தன.
அதை தொடர்ந்து கோர்ட்டு வாரண்டு உத்தரவு படி நேற்று தெற்கு மாகாணத்தில் ராஜபக்சேவின் சொந்த ஊரான தங்காலே என்ற இடத்தில் உள்ள அவரது வீட்டில் போலீசார் அதிரடி சோதனை நடத்தினார்கள்.
ஆனால், புகாரில் தெரிவித்தபடி அங்கு எதுவும் கிடைக்கவில்லை. இந்த தகவலை போலீஸ் செய்தி தொடர்பாளர் அஜித் ரோஹனா தெரிவித்தார். இது குறித்து ராஜபக்சேவின் மகனும் எம்.பி.யுமான நமல் ராஜபக்சே கூறியதாவது:–
‘‘ ‘லம்பார்கினி’ பந்தய கார் இருப்பதாக கூறப்பட்ட பொய் புகாரின் அடிப்படையில் தங்காலேவில் உள்ள எங்களது வீட்டில் போலீசார் சோதனை நடத்தினார்கள். எங்களை துன்புறுத்த வேண்டும் என்ற நோக்கத்துடன் இச்சோதனை நடத்தப்பட்டது.
எங்கள் வீடுகளில் மட்டுமின்றி நண்பர்களின் வீடுகளிலும் சோதனை நடத்தப்படுகிறது. இதனால் உதவியாளர்கள் வீடுகளுக்கும் செல்ல முடிய வில்லை. ஏனெனில் அங்கும் சோதனை நடக்கிறது. சோதனையின் போது பந்தய கார் மற்றும் கடல் விமானம் எதுவும் போலீசாருக்கு கிடைக்க வில்லை.
சிறுவயது பள்ளிக் குழந்தைகள் பயன்படுத்தும் ஒரு கால்மிதி படகு மட்டுமே இருந்ததை போலீசார் கண்டுபிடித்தனர்’’ என்றார்.
