அமெரிக்க பொப்பிசை நட்சத்திரமான மைக்கல் ஜக்ஸன், தனது பாலியல் துஷ்பிரயோக நடவடிக்கைகளால் பாதிக்கப்பட்டவர்களை மௌனித்திருக்கச் செய்வதற்காக 200 மில்லியன் டொலர்களை (சுமார் 258 கோடி ரூபா) செலவிட்டிருந்தார் என சட்டத்தரணிகள் சிலர் தெரிவித்துள்ளனர்.
அவர் மறைந்து சுமார் 6 வருடங்களாகின்ற போதிலும் அவர் மீதான குற்றச்சாட்டுகளும் அவருக்கு எதிரான சட்ட நடவடிக்கைகளும் இன்னும் ஓயவில்லை.
தாம் சிறுவர்களாக இருந்த காலத்தில், மைக்கல் ஜக்ஸனுடன் இணைந்து செயற்பட்ட வாட் ரொப்ஸன், ஜேம்ஸ் சேவ்சக் ஆகிய இருவர், மைக்கல் ஜக்ஸன் தம்மை பாலியல் துஷ்பிரயோகத்துக்கு உட்படுத்தியதாக குற்றம் சுமத்தியுள்ளனர்.
இதனால், தமக்கு நஷ்ட ஈடு வழங்க வேண்டும் என மைக்கல் ஜக்ஸனுக்கு சொந்தமாகவிருந்த 150 கோடி டொலர் பெறுமதியான ஜக்ஸன் எஸ்டேட்டின் நிர்வாகிகளிடம் மேற்படி இருவரும் கோருகின்றனர்.
தான் 9 வயது சிறுவனாக இருந்தபோது மைக்கல் ஜக்ஸன் தன்னை பாலியல் துஷ்பிரயோகத்துக்கு உட்படுத்தியதாகவும் தனது தந்தைக்கு 10 லட்சம் டொலர்களை ஜக்ஸன் வழங்கியதாகவும் ஜேம்ஸ் சேவ்சக் (36) தெரிவித்துள்ளார்.
இவர் மைக்கல் ஜக்ஸனுடன் விளம்பரமொன்றில் இணைந்து தோன்றியிருந்தமை குறிப்பிடத்தக்கது.
1987 ஆம் ஆண்டு 8 வயது சிறுவனாக தான் இருந்தபோது முதன்முதலில் மைக்கல் ஜக்ஸனை சந்தித்ததாக ஜேம்ஸ் சேவ்சக் கூறுகிறார்.
அதேவேளை தான் 9 வயது சிறுவனாக இருந்தபோது தன்னை மணமகளாக சித்தரித்து போலி திருமண வைபவமொன்றையும் மைக்கல் ஜகஸன் நடத்தினார் என நீதிமன்றிடம் சேவ்சக் தெரிவித்துள்ளார்.
ஜேம்ஸ் சேவ்சக்கை 100 தடவைகளுக்கு மேல் மைக்கல் ஜக்ஸன் துஷ்பிரயோகப்படுத்தியதாக சேவ்சக்கின் சட்டத்தரணி தெரிவித்துள்ளார்.
தற்போது 32 வயதான வாட் ரொப்ஸன், பிரபல இசைத்துறை நட்சத்திரங்களான பிரிட்னி ஸ்பியர்ஸ், பாடகர் ஜஸ்டின் டிம்பர்லக் ஆகியோருடனும் இணைந்து பணியாற்றியவர் என்பது குறிப்பிடத்தக்கது.
இவர் சிறுவயதில் ஜக்ஸன் மீதான பாலியல் குற்றச்சாட்டை நிராகரித்து வாக்கு மூலம் அளித்திருந்தார்.
ஆனால், சுமார் ஒரு வருடகாலமாக ஜக்ஸன் தன்னை பாலியல் துஷ்பிரயோகத்துக்கு உட்படுத்தியதாக பின்னர் குற்றம் சுமத்தினார்.
’22 வருட காலமாக நான் இதை நிராகரித்து மௌனமாக வாழ்ந்தேன்’ என ரொப்ஸன் கூறினார்.
மைக்கல் ஜக்ஸன் தன் மீதான பாலியல் குற்றச்சாட்டுகளை நிராகரித்து வந்தார்.
எனினும், அவரால் பாதிக்கப்பட்டதாக கூறப்பட்ட ஜோர்டான் சான்ட்லர் எனும் சிறுவனின் குடும்பத்திற்கு 4 கோடி டொலர்களை வழங்கியிருந்தார்.
