வன்னியில் அன்று ஆரம்பிக்கப்பட்ட ஈழத்துக்கான போராட்டம் ஜெனிவாவில் பலப்படுத்தப்பட்டு அமெரிக்காவின் ஆதரவுடன் மீண்டும் இன்று நாட்டில் மீள்உருவாக்கம் பெற்றுள்ளது. அதற்கான முழுமையான ஆதரவை இந்த அரசாங்கம் வழங்கிவருகின்றது என்று மஹிந்த ஆதரவு அணியினர் குற்றம்சாட்டினர்.
அன்று சிங்கக்கொடிகளை ஏந்தி இந்த நாட்டை எவ்வாறு பாதுகாத்தோமோ அதேபோல் மீண்டும் சிங்கக்கொடிகளை ஏந்தி சிங்கள பெளத்த நாட்டைகாப்பாற்ற அனைத்து சிங்களவர்களும் முன்வரவேண்டும்.
இந்த நாட்டை சிங்கள நாடாகவே கட்டியெழுப்பவேண்டும் எனவும் அவர்கள் தெரிவித்தனர்.
இந்தக் கூட்டத்தில் கருத்து தெரிவித்த ஐக்கிய மக்கள் சுதந்திர முன்னணியின் பாராளுமன்ற உறுப்பினர் உதய கம்மன்பில,
இலங்கையில் நடைபெற்ற யுத்தத்தில் தமிழ் மக்களை கொன்று குவித்ததாக எமது இராணுவ வீரர்கள் மீது குற்றம் சுமத்தியே எம்மை சர்வதேச நீதிமன்றுக்கு கொண்டுசெல்ல முன்னர் முயற்சித்தனர்.
அந்த முயற்சியை நாம் எமது அரசாங்கத்தில் தோற்கடித்தோம். ஆனால் இந்த அரசாங்கம் சர்வதேச விசாரணைக்கு ஆதரவு தெரிவித்து எமது இராணுவமே குற்றவாளிகள் என்பதை உறுதிப்படுத்திவிட்டது.
அதேபோல் இலங்கை தொடர்பில் ஐ.நா. மனித உரிமை ஆணைக்குழு முன்வைத்துள்ள பிரேரணை எமது நாட்டுக்கு மிகவும் மோசமானதொரு தீர்மானமாகும்.
இப்போது நாட்டுக்கு எதிராக எழுந்துள்ள சர்வதேச அழுத்தங்களை புதிய அரசாங்கம் எவ்வாறு கையாள்கின்றது என்பதில் பாரிய சிக்கல் நிலைமைகள் எழுந்துள்ளது.
ஐக்கிய நாடுகள் மனித உரிமைகள் ஆணைக்குழுவில் அமெரிக்கா முன்வைத்த தீர்மான வரைபை இலங்கை ஏற்றுக்கொண்டதில் இருந்தே இந்த அரசாங்கத்தின் எதிர்பார்ப்புகள் என்னவென்பது தெளிவாகியுள்ளது.
ஆனால் இந்த தீர்மானத்தின் மூலமாக மேற்கொள்ளவுள்ள விசாரணை முறைமையை உள்ளக பொறிமுறை என அரசாங்கம் தெரிவிக்கின்றது.
எனினும் இந்த விசாரணை முழுமையான சர்வதேச விசாரணை என தமிழ்த் தேசியக் கூட்டமைப்பு தெரிவிக்கின்றது.
ஆகவே இப்போது இலங்கை மீது மேற்கொள்ளவுள்ள விசாரணை முறைமை எவ்வாறானது என்பதை அரசாங்கம் தெரிவிக்க வேண்டும்.
இலங்கையில் ஒரு விசாரணை நடக்குமாயின் அது உள்ளக விசாரணை என குறிப்பிட முடியும். அதேபோல் சர்வதேச தலையீட்டில் நடக்குமாயின் அதை சர்வதேச விசாரணை என குறிப்பிட முடியும்.
ஆனால் இப்பொது நடக்கவிருப்பது இந்த இரண்டு விசாரணைகளின் கலவையாகும். இந்த விசாரணையானது சர்வதேசத்தை சார்ந்த வகையிலேயே அமைந்துள்ளது.
இந்த முறைமை மூலமாக எமது இராணுவ வீரர்களை தண்டிக்கும் வகையில் பலமான ஒரு விசாரணையை இந்த அரசாங்கம் மேற்கொள்ளவுள்ளது.
இராணுவத்தைக் காட்டிக்கொடுத்து விட்டது
அதேபோல் அரசாங்கம் தமது ஆட்சியை தக்கவைக்கும் நோக்கத்தில் எமது இராணுவத்தை காட்டிக்கொடுத்துவிட்டது.
இராணுவத்தை காட்டிக்கொடுத்தும் மக்களிடம் பொய்களைக் கூறியும் ஆட்சியை முன்னெடுத்து வருகின்றனர். ஆகவே தொடர்ந்தும் பொய்களைக் கூறி தப்பிக்க முடியாது. வெகு விரைவில் உண்மைகள் வெளிவரும் என அவர் குறிப்பிட்டார்.
இந்தக் கூட்டத்தில் கருத்து தெரிவித்த ஐக்கிய மக்கள் சுதந்திர முன்னணியின் பாராளுமன்ற உறுப்பினர் தினேஷ் குணவர்தன கூறுகையில்,
ஐக்கிய நாடுகள் சபையின் பரிந்துரைக்கு அமைய இலங்கையில் நடைபெறவிருப்பது உள்ளக விசாரணைகள் அல்ல. மாறாக சர்வதேச விசாரணையேயாகும்.
ஐக்கிய நாடுகள் சபையின் பரிந்துரையில் கலப்பு நீதிமன்ற முறையில் விசாரணைகளை நடத்துவதென்பது இறுதியில் முழுமையான சர்வதேச விசாரணையாகவே அமையும்.
இந்த செயற்பாடுகளின் மூலமாக அமெரிக்க, பிரித்தானிய ஆகிய நாடுகளின் ஆக்கிரமிப்பில் இலங்கையில் உள்ள வளங்களையும், பொருளாதார தன்மைகளையும் சூறையாடும் முயற்சியும் உள்ளது.
இந்த நாட்டில் ஏதேனும் விசாரணைகளை முன்னெடுப்பதாயின் அதை இலங்கையின் அமைப்புக்கள் மூலமாகவும் இலங்கையின் அதிகாரத்தற்கு உட்பட்ட வகையிலுமே மேற்கொள்ள வேண்டும்.
இந்த நாட்டை காப்பாற்றவேண்டிய பொறுப்பு நாட்டில் வாழும் அனைவருக்கும் உள்ளது. இதில் மத, மொழி, இன பேதம் இருத்தலாகாது. ஆனால் இந்நாட்டை காப்பாற்ற வேண்டும் என்பதற்காக மேற்குலக வாதிகளின் காலில் விழவேண்டிய அவசியம் இல்லை.
ஆனால் இந்த அரசாங்கம் தம்மை காப்பாற்றிக்கொள்ள சர்வதேச நாடுகளின் காலில் விழுகின்றது. இலங்கையில் அவர்களின் செயற்பாடுகளை மேற்கொள்ள இடமளித்துவிட்டு தமது தலைகளை இவர்கள் பாதுகாத்துக் கொள்கின்றனர்.
இந்த செயற்பாடுகளினால் நாட்டு மக்களும் இந்த நாட்டின் பாதுகாப்பு படையினருமே பாதிக்கப்படுவார்கள் எனக் குறிப்பிட்டார்.
இந்த கூட்டத்தில் கருத்து தெரிவித்த முன்னாள் பாராளுமன்ற உறுப்பினரும் லங்கா சமசமாஜக் கட்சியின் தலைவருமான திஸ்ஸ விதாரண தெரிவிக்கையில்,
ஆட்சி மாற்றத்தின் பின்னர் அமையப்பெற்றுள்ள தேசிய அரசாங்கம் நாட்டின் தேசிய பிரச்சினைக்கு தீர்வை பெற்றுத்தரும் என ஜனாதிபதி மைத்திரிபால சிறிசேனவும் பிரதமர் ரணில் விக்கிரமசிங்கவும் தெரிவித்துள்ளனர்.
இரண்டு வருடங்களில் நாட்டில் இனப்பிரச்சினைக்கு தீர்வு காண்பதாக இவர்கள் தெரிவித்தனர். ஆனால் இன்றுவரை நாட்டின் தேசியப் பிரச்சினைக்கு தீர்வு காணும் வகையிலோ அல்லது நாட்டில் சுயாதீன செயற்பாடுகளை பலப்படுத்தும் வகையிலோ செயற்படவில்லை.
மாறாக மேற்கத்தேய நாடுகளின் கொள்கையை பரப்பும் வகையிலும் மேற்கு வாதிகளின் அடிமைகளாக இந்த நாட்டையும் நாட்டு மக்களையும் மாற்றியமைக்கும் செயற்பாடுகளையே இந்த அரசாங்கம் மேற்கொள்கிறது.
மேலும் ஐக்கிய நாடுகள் மனித உரிமைகள் சபையின் தீர்மானம் வெளிவந்துள்ளது. இதில் ஐக்கிய நாடுகள் சபையின் பரிந்துரையிலான விசாரணை குழுவை நியமிக்க வேண்டும் என்று அவர்கள் எமக்கு அழுத்தம் கொடுத்துள்ளனர். இதை ஒருபோதும் ஏற்றுக்கொள்ள முடியாது.
இலங்கையில் குற்றங்கள் நடந்துள்ளன என சந்தேகம் இருக்குமாயின் அதை உள்ளக விசாரணைகள் மூலம் தீர்க்க வேண்டும்.
இலங்கையில் புகழ்வாய்ந்த நிபுணத்துவம் மிக்க சிறந்த நீதிபதிகள் உள்ளனர். சிறந்த சட்டத்தரணிகள் உள்ளனர். ஆய்வாளர்கள் உள்ளனர். இவர்கள் இன்று சர்வதேச மட்டத்தில் புகழ்பெற்று விளங்குகின்றனர்.
பல நாடுகளின் சட்டரீதியான செயற்பாடுகளில் இலங்கையில் சட்ட வல்லுனர்களின் உதவிகளை நாடுகின்றன.
அவ்வாறான நிலையில் போர்க்குற்றச் சாட்டுகளில் இலங்கை இராணுவத்தின் மீது சுமத்தப்பட்டிருக்கும் குற்றச்சாட்டுகளை இலங்கையின் நீதிமன்றங்களின் மூலமாக கண்டறிய வேண்டும்.
எக்காரணத்தை கொண்டும் இலங்கையின் பிரச்சினைகளை சர்வதேசம் கையாள இடமளிக்கக் கூடாது. சர்வதேசத்தின் தலையீடு உள்ளதெனின் உடனடியாக அதை தடுக்க வேண்டியது அரசாங்கத்தின் கடமையாகும்.
ஆனால் அதை அரசாங்கம் செய்யாது மேற்குலக சர்வாதிகாரிகளின் தலையீட்டில் இலங்கையில் தீர்வு காணவே இவர்கள் முயற்சிக்கின்றனர் என அவர் குறிப்பிட்டார்.
கூட்டத்தில் உரையாற்றிய ஐக்கிய மக்கள் சுதந்திர முன்னணியின் பாராளுமன்ற உறுப்பினரும் தேசிய சுதந்திர முன்னணியின் தலைவருமான விமல் வீரவன்ச கூறுகையில்,
இலங்கையில் மூன்று தசாப்த காலமாக நடைபெற்ற யுத்தத்தில் புலிகளினால் கொல்லப்பட்ட தமிழ் மக்கள், விரட்டியடிக்கப்பட முஸ்லிம் மக்கள், படுகொலை செய்யப்பட்ட சிங்கள மக்களின் இறப்புகளுக்கு காரணம் கேட்க்காத சர்வதேச சமூகம் புலிகளின் இறப்பிற்கு மாத்திரம் காரணம் கேட்கின்றது.
அமெரிக்கா, இந்தியா போன்ற நாடுகள் புலி ஆதரவாளர்களுக்காகவே இன்று யுத்த குற்றச்சாட்டுகள் தொடர்பில் விசாரணைகள் முன்னெடுக்க முயல்கின்றன.
அதேபோல் நாட்டை காப்பாற்றிய இராணுவத்தை சிறைகளில் அடைத்து புலிகளை விடுதலை செய்யும் தீர்மானத்துக்கு இந்த அரசாங்கம் வந்துள்ளது.
கைது செய்யப்பட புலிகளை தண்டிக்காத வகையில் பயங்கரவாத தடைச் சட்டத்தையும் நீக்க அரசாங்கம் முயற்சிக்கின்றது.
அதேபோல் யுத்த குற்றச்சாட்டுகள் என்ற பெயரில் இவர்கள் முயற்சிப்பது வெறுமனே விசாரணைகளை செய்வது அல்ல.
அதையும் தாண்டி நாட்டில் பிரிவினையை உருவாக்கவே இவர்கள் முயற்சிக்கின்றனர். வடக்கிற்கு தேவையான அனைத்தையும் பெற்றுக்கொண்டுத்து வடக்குக் கிழக்கை ஒன்றிணைந்த மாகாணமாக மாற்றி அவர்களுக்கான பொலிஸ், காணி அதிகாரங்களை கொடுப்பதன் மூலமும்,
வடமாகாண சபையின் கீழான அதிகாரங்களை பலப்படுத்தி விடுதலை செய்யப்போகும் புலிகளை வடக்கின் பொலிஸாக மாற்றி இறுதியில் புலிகளின் பாதுகாப்பின் கீழான தனி ஈழத்தினையே அமைக்க முயற்சிக்கின்றனர்.
அன்று வன்னியில் ஆரம்பித்த போராட்டம் ஜெனிவாவில் பலப்படுத்தப்பட்டு அமெரிக்காவின் ஆதரவுடன் மீண்டும் நாட்டில் பலமடையும் வேலையே இப்போது நடைபெற்றுள்ளது. இதற்கான முழுமையான ஆதரவை இந்த அரசாங்கம் வழங்கிவருகின்றது.
ஆகவே இப்போதும் சிங்கள பௌத்த மக்கள் அமைதியாக இருந்தால் இந்த நாட்டை கட்டிக்காப்பற்ற முடியாது. ஆகவே அன்று யுத்தம் முடிவடைந்தவுடன் சிங்கள மக்கள் சிங்கக்கொடிகளை ஏந்தி இந்த நாட்டை எவ்வாறு பாதுகாத்தனரோ அதேபோல் மீண்டும் சிங்கக்கொடிகளை ஏந்தி சிங்கள பெளத்த நாட்டை காப்பாற்ற அனைத்து சிங்களவர்களும் முன்வரவேண்டும்.
இந்த நாட்டை சிங்கள நாடாகவே பாதுகாத்து எமது இராணுவ வீரர்களையும் எமது மக்களையும் பாதுகாக்க வேண்டும் . சிங்கள நாட்டை உருவாக்க நாம் அனைவரும் ஒன்றுபடவேண்டும் என்றார்.
