உடல் வியர்த்து மூச்சுத் திணறவைக்கும் காற்றோட்ட வசதியில்லாத, காலை நீட்டிப் படுப்பதற்கு கூட போதிய இடமில்லாத, தொண்டை கிழியக் கூச்சலிட்டும் எவரும் பதில் குரல் கொடுக்காத தனிமையான சிறிய அறையொன்றில் ஒரு சில மணித்தியாலங்களைக் கழிப்பது பற்றி கற்பனை செய்து பார்த்தாலே பலருக்கும் விழிகள் பிதுங்கும்.
ஆனால் தென் ஆபிரிக்காவின் கேப் நகரின் வடக்கே 11 கிலோ மீற்றர் தொலைவில் 5.18 சதுர கிலோமீற்றர் மட்டுமே பரப்பளவைக் கொண்ட தனிமையான ரொப்பன் தீவில் மேற்படி சூழ்நிலையை அச்சொட்டாக பிரதிபலிக்கும் சிறைக்கூடமொன்றில் ஒரு சில நாட்கள் அல்லது மாதங்களையல்லாது
18 வருடங்களை கழித்து உயிருடன் மீண்டு தனக்கே உரிய துடிப்பும் தைரியமும் கம்பீரமும் குறையாது அதே ஆத்ம சக்தியுடன் உலகையே வியப்பில் விழி உயர்த்த வைத்த ஒருவராக மறைந்த தென் ஆபிரிக்க முன்னாள் ஜனாதிபதி நெல்சன் மண்டேலா விளங்குகிறார்.
இலங்கையின் யாழ்ப்பாண தீபகற்பத்துடன் ஒப்பிடுகையில், சுமார் நான்கில் ஒரு மடங்கு சிறிதானதும் நயினாதீவுடன் ஒப்பிடுகையில், 1.18 சதுர கிலோமீற்றர் மட்டுமே பெரிதானது
ஆரோக்கியமில்லாத உணவை மென்று விழுங்கி, கல் அகழ்வுத் தளங்களில் தகிக்கும் வெயிலில் சுத்தியலால் பாறைகளைத் தகர்த்து கடூழிய பணி செய்து தனது 27 வருட சிறைவாசத்தில் 18 வருடங்களை கழித்த தென் ஆபிரிக்காவின் இரும்பு மனிதனாக விமர்சிக்கப்படும் நெல்சன் மண்டேலாவின் நெஞ்சுரத்துக்கும் மன தைரியத்துக்கும் ஈடு இணையாக எவரையும் எதனையும் ஒப்பிட முடியாது.
கைதிகளின் ஆக்ரோஷத்தை ஒட்டுமொத்தமாக அடக்கிக் கொல்லும் தனிமையில் சர்வமும் ஒடுங்கச்செய்து, அவர்களை தமது வழிக்கு கொண்டுவரும் வெள்ளையின ஆதிக்கவாதிகளின் தந்திரோபாயங்கள் நெல்சன் மண்டேலாவைப் பொறுத்தவரை பிசுபிசுத்துப்போனதே யதார்த்தமானது.
1810ஆம் ஆண்டளவில் கேப் மாகாணத்தின் பகுதியாக முன்பிருந்த தெம்பு இராஜ்ஜியத்தின் மன்னராக விளங்கிய நகுபென்குகாவின் வம்ச வாரிசுகளில் ஒருவராக 1918ஆம் ஆண்டு ஜூலை 18ஆம் திகதி கிழக்கு கேப் பிராந்தியத்திலுள்ள மவெஸோ கிராமத்தில் பிறந்த நெல்சன் மண்டேலாவின் இயற்பெயர் ரோலிஹ்லாஹ்லா மண்டேலா என்பதாகும்.
பிரித்தானிய காலனித்துவ ஆட்சிக் காலத்தில் தென் ஆபிரிக்க பாடசாலைகளில் கல்வி கற்கும் சிறுவர்களுக்கு கிறிஸ்தவ பெயர் வைக்கப்படும் நடைமுறை பின்பற்றப்பட்டதால் ரோலிஹ்லாஹ்லா மண்டேலாவின் ஆசிரியைகளில் ஒருவரான மிடின்கனி அவரது பெயருடன் நெல்சன் என்ற பெயரை இணைத்து அவரை நெல்சன் மண்டேலாவாக்கினார்.
போர்ட் ஹேர் பல்கலைக்கழக கல்லூரியில் கலை இளமாணிப் பட்டப்படிப்பை தொடர்ந்த நெல்சன் மண்டேலா பிரித்தானிய காலனித்துவ ஆட்சியாளர்களுக்கு எதிரான மாணவர் போராட்டங்களில் கலந்துகொண்டமைக்காக பல்கலைக்கழகத்திலிருந்து வெளியேற்றப்பட்டமை காரணமாக பட்டப்படிப்பை பூர்த்தி செய்ய முடியாத நிலை ஏற்பட்டது.
எனினும் அவர் 1941ஆம் ஆண்டில் ஜொஹன்னஸ்பேர்க் நகரிலுள்ள தென் ஆபிரிக்க பல்கலைக்கழகத்தில் கலை இளமாணிப் பட்டத்தை பூர்த்தி செய்து பட்டம் பெற்றார்.
பின்னர் அவர் அந்நகரிலுள்ள விட்வோட்டர்ஸ்ரன்ட் பல்கலைக்கழகத்தில் சட்டக் கல்வியை ஆரம்பித்தபோதும் அதனைக் கைவிட நேர்ந்தது. அவர் பின்னர் லண்டன் பல்கலைக்கழகத்தில் சட்டக் கல்வியை தொடர முயற்சித்தபோதும் அதுவும் தோல்வியில் முடிவடைந்தது.
தென் ஆபிரிக்க பிரஜைகள் தமது சொந்த நாட்டுக்குள்ளே அடிமைகளாக நடத்தப்பட்டு நாட்டுக்குள் ஓரிடத்திலிருந்து இன்னோர்
இடத்துக்கு பயணிக்க கடவுச்சீட்டு பெற வேண்டிய கட்டாயத்துக்குள் தள்ளப்பட்டு அடிப்படை உரிமைகள் மறுக்கப்பட்டு சொல்லொண்ணா துன்பங்களை அனுபவித்து வரும் நிலையானது நெல்சன் மண்டேலாவின் சிறு வயது முதல் அவரது மனதை பாதித்த ஒன்றாக இருந்துவந்தது.
இந்நிலையில் அரசியலில் ஈடுபாடு காட்டிய அவர் 1944ஆம் ஆண்டு ஆபிரிக்க தேசிய காங்கிரஸ் கட்சியில் இணைந்து அந்தக் கட்சியின் இளைஞர்களுக்கான பிரிவை ஸ்தாபிக்க உதவினார்.
இந்த நிறுவனமானது தென் ஆபிரிக்காவின் கறுப்பினத்தவரால் செயற்படுத்தப்பட்ட முதலாவது சட்ட நிறுவனம் என்ற பெருமையைப் பெற்றது. எனினும், அவரது சட்ட நிறுவனத்துக்கு 1952ஆம் ஆண்டில் தடை விதிக்கப்பட்டது. இது காலனித்துவ ஆட்சியாளர்களுக்கு எதிரான நெல்சன் மண்டேலாவின் எதிர்ப்பு நடவடிக்கைகளை தீவிரப்படுத்தியது.
1956ஆம் ஆண்டு டிசம்பர் 5ஆம் திகதி பொலிஸாரால் நாடளாவிய ரீதியில் மேற்கொள்ளப்பட்ட தேடுதல் நடவடிக்கையின்போது நெல்சன் மண்டேலா கைதுசெய்யப்பட்டார். இதுவே பின்னர் அவர் 1956ஆம் ஆண்டு தேசத் துரோக குற்றச்சாட்டு விசாரணைக்கு உள்ளாக வழிவகுத்தது.
1960ஆம் மார்ச் 21ஆம் திகதி புதிதாக நிறைவேற்றப்பட்ட சட்டங்களுக்கு எதிராக ஷாப்பர்வில்லே பிராந்தியத்தில் நடத்தப்பட்ட ஆர்ப்பாட்டத்தின்போது பொலிஸாரால் நிராயுதபாணிகளான 69 பொதுமக்கள் கொல்லப்பட்டமை அமைதிவழிப் போராட்டம் குறித்து அவநம்பிக்கையை நெல்சன் மண்டேலாவுக்கு தோற்றுவித்திருந்தது.
இந்நிலையில் வெள்ளையின ஆட்சியாளர்கள் நாடளாவிய ரீதியில் அவசரகால நிலைமையை பிரகடனப்படுத்தி ஆபிரிக்க தேசிய காங்கிரஸுக்கு தடை விதித்தனர்.
தொடர்ந்து 1961ஆம் ஆண்டு ஜூன் மாதம் ஆயுதப் போராட்டமொன்றை முன்னெடுக்க தனது ஆதரவாளர்களுக்கு அழைப்பு விடுத்த நெல்சன் மண்டேலா, 1961ஆம் ஆண்டு டிசம்பர் 16ஆம் திகதி ‘தேசத்தின் ஈட்டி’ என அழைக்கப்படும் போராட்டக் குழுவை ஸ்தாபித்தார்.
இந்நிலையில், அவர் தென் ஆபிரிக்காவை விட்டு இரகசியமாக வெளியேறி இங்கிலாந்தில் ஆதரவைத் தேடுவதற்கு முயற்சித்ததுடன் மொரோக்கோ மற்றும் எதியோப்பியாவில் இராணுவப் பயிற்சி பெற்றார்.
தொடர்ந்து அவர் 1962ஆம் ஆண்டு ஆகஸ்ட் மாதம் 5ஆம் திகதி நாடு திரும்பிய நிலையில் அதற்கடுத்த மாதம் கைதுசெய்யப்பட்டார்.
இதுவே அவர் பின்தங்கிய ரொப்பன் தீவில் சிறைவாசத்தை அனுபவிப்பதற்கு காரணமானது. ஆரம்பத்தில் 5 வருட சிறைத்தண்டனை விதிக்கப்பட்டு ரொப்பன் தீவு சிறைச்சாலைக்கு அனுபப்பட்ட அவர் 6 மாத காலம் மட்டும் அங்கு தடுத்துவைக்கப்பட்ட நிலையில் பின்னர் தென் ஆபிரிக்காவின் பிரெடோரியா சிறைச்சாலைக்கு மாற்றப்பட்டார்.
தொடர்ந்து 1964ஆம் ஆண்டு ஜூன் மாதம் மண்டேலாவுக்கும் அவரது சகாக்கள் 7 பேருக்கும் ஆயுள் தண்டனை விதிக்கப்பட்டு ரொப்பன் தீவு சிறைச்சாலைக்கு அனுப்பப்பட்டனர்.
மேற்படி சிறைச்சாலையில் இடம்பெற்று வந்த உடலியல் ரீதியான துஷ்பிரயோகங்களுக்கு எதிர்ப்பு தெரிவித்து 1966ஆம் ஆண்டு கைதிகள் உண்ணாவிரத போராட்டத்தில் ஈடுபட்டனர்.
ரொப்பன் தீவு சிறைச்சாலையிலான சுகாதாரமற்ற நிலைமைகள் நெல்சன் மண்டேலாவுக்கு காசநோயை ஏற்படுத்தி அவரது உடல் நிலையை மோசமாக பாதித்தது.
அவரது உடல் நலப் பாதிப்பு காரணமாக அவர் 1982ஆம் ஆண்டு மார்ச் மாத இறுதியில் ரொப்பன் தீவு சிறைச்சாலையிலிருந்து போல்ஸ்மூர் சிறைச்சாலைக்கு மாற்றப்பட்டார். இதன்போது அவர் மருத்துவமனையில் பல நாட்கள் தங்கியிருந்து சிகிச்சை பெற நேர்ந்தது.
ரொப்பன் தீவு அனுபவம் குறித்து 1994ஆம் ஆண்டில் நெல்சன் மண்டேலா குறிப்பிடுகையில், “மருத்துவர் ஒருவரால் குணப்படுத்தக் கூடிய வெளிப்படையாகத் தெரியும் காயங்களை விடவும் பார்க்க முடியாத ஊமைக் காயங்கள் மிகவும் வேதனைமிக்கவை.
எனது தாயாரின் மரணமே எனது வாழ்வில் நான் சிறைச்சாலையில் அனுபவித்த மிகவும் துன்பமான தருணங்களில் ஒன்றாகும். அத்துடன் எனது மூத்த மகன் கார் விபத்தில் இறந்த சம்பவமும் அவ்வாறானதாகும். எனக்கு அந்த மரணச்சடங்குகளில் பங்கேற்க கூட அனுமதியளிக்கப்படவில்லை” என தெரிவித்தார்.
நெல்சன் மண்டேலா ரொப்பன் சிறைச்சாலைக்கு ஆயுள் சிறைத்தண்டனை விதிக்கப்பட்டு அனுப்பப்பட்டபோது அவரது வாழ்வு அங்கேயே முடியப்போகிறது என்றே அவரது நண்பர்கள் உட்பட பலரும் எதிர்வுகூறியிருந்தனர்.
ஆனால், நெல்சன் மண்டேலா தனது சிறை வாழ்க்கையை தன்னை மேலும் பண்படுத்திக்கொள்ள பயன்படுத்திக்கொண்டார்.
அவர் சிறை சூழ்நிலையால் ஏற்படும் மன அழுத்தத்தைத் தவிர்க்க உடற்பயிற்சிகளை மேற்கொள்வதில் ஈடுபட்டார். நல்லிணக்கம் மற்றும் பேச்சுவார்த்தைகளில் அவர் கொண்டிருந்த நம்பிக்கை வெற்றியளித்தது என்றே கூற வேண்டும்.
வெள்ளையின ஆட்சியாளர்கள் 1990ஆம் ஆண்டு பெப்ரவரி 11ஆம் திகதி அவரை விடுதலை செய்ததுடன், அவரது கட்சிக்கு விதிக்கப்பட்டிருந்த தடையையும் நீக்கினர். 1991ஆம் ஆண்டு ஆபிரிக்க தேசிய காங்கிரஸ் கட்சியின் தலைவராக அவர் தெரிவு செய்யப்பட்டார்.
தனது நாட்டு மக்களின் சுதந்திரத்துக்காகவும் எதிர்கால சுபீட்சத்துக்காகவும் தனது வாழ்வை அர்ப்பணித்து போராடிய அவர்,
1993ஆம் ஆண்டு சமாதானத்துக்கான நோபல் பரிசு வழங்கி கௌரவிக்கப்பட்டதுடன் 1994ஆம் ஆண்டு ஏப்ரல் 27ஆம் திகதி வாழ்க்கையில் முதல் தடவையாக தனது வாக்களிக்கும் உரிமையை பயன்படுத்தும் வாய்ப்பை பெற்றார்.
தொடர்ந்து 1994ஆம் ஆண்டு மே 10ஆம் திகதி தென் ஆபிரிக்காவின் ஜனநாயக ரீதியில் தெரிவு செய்யப்பட்ட முதலாவது ஜனாதிபதியாக பதவியேற்று வரலாறு படைத்தார்.
நெல்சன் மண்டேலாவின் வாழ்நாளின் கணிசமான பகுதியை கபளீகரம் செய்த ரொப்பன் தீவு சிறைச்சாலையையொத்த மோசமான சிறைச்சாலைகள் காரணமாக உலகமெங்கும் கைதிகள் பல்வேறு இன்னல்களை அனுபவித்து வருகின்றனர்.
இலங்கையைப் பொறுத்தவரையில், மனித உரிமைகள் ஆணையகத்தால் மேற்கொள்ளப்பட்டு வெளியிடப்பட்ட சிறைச்சாலைகள் தொடர்பான அறிக்கையானது கைதிகள் பலர் வறுமை காரணமாக சட்ட உதவியைப் பெற முடியாது, தமது தரப்பு நியாயத்துக்காகப் போராட முடியாத நிலையில் உள்ளதாகவும் அவர்கள் சிறையில் தாக்கப்படுவதும் சித்திரவதைக்குள்ளாவது தொடர்வதாகவும் கைதிகள் தமது வசிப்பிடத்துக்கு தூர இடத்திலுள்ள சிறைச்சாலைகளுக்கு அனுப்பப்படுவதால் உறவினர்களுடனான தொடர்புகள் துண்டிக்கப்பட்டு கடும் மன அழுத்தத்துக்குள்ளாக நேரிடுவதாகவும் கூறுகிறது.
அத்துடன் பல சிறைக்கூடங்களில் போதிய காற்றோட்டம் இல்லாதுள்ளதுடன் திறந்த மலசலகூடங்களால் கைதிகள் அசௌகரியத்துக்கு உள்ளாவதாகவும் குறிப்பாக மலசலகூட வசதி இல்லாத சிறைக்கூடங்களிலுள்ள கைதிகள் இரவு நேரங்களில் பிளாஸ்டிக் வாளிகளிலும் பொலித்தீன் பைகளிலும் இயற்கைக் கடன்களைக் கழிக்க நேரிடுவதாகவும் அந்த அறிக்கையில் சுட்டிக்காட்டப்பட்டுள்ளது.
மேலும் சிறைச்சாலைக்கு புதிதாக வரும் கைதிகள் இட நெருக்கடி காரணமாக இரவு முழுவதும் படுக்க முடியாமல் விழித்திருக்க வேண்டிய நிலை உள்ளதுடன் கைதிகளுக்கு மலசலகூடத்துக்கு அருகில் அல்லது மலசலகூடத்தில் உறங்கவேண்டிய நிர்ப்பந்தமும் ஏற்படுவதாக அந்த அறிக்கை தெரிவிக்கிறது.
அத்துடன் பல தசாப்த காலத்துக்கு முன்னர் நிர்மாணிக்கப்பட்ட சிறைக்கூடங்களின் சுவர்கள் மற்றும் கூரைகள் என்பன இயற்கை அனர்த்தங்களுக்கு தாக்குப் பிடிக்காது இடிந்து விழும் அபாய நிலையில் உள்ளதாகவும் கைதிகளுக்கான உணவு மற்றும் மருத்துவ வசதி என்பவற்றிலும் குறைபாடுகள் காணப்படுவதாகவும் அந்த அறிக்கையில் தெரிவிக்கப்பட்டுள்ளது.
ஐக்கிய நாடுகள் சபையானது சிறைச்சாலைகளில் காணப்படும் மிக மோசமான நிலைமைகள் காரணமாக நெல்சன் மண்டேலா அனுபவித்த துன்பங்களை கருத்திற்கொண்டு 2015ஆம் ஆண்டு டிசம்பர் 17ஆம் திகதி ‘நெல்சன் மண்டேலா விதிகள்’ என்ற தலைப்பில் கைதிகளை எவ்வாறு கையாள்வது என்பது தொடர்பான நியமத்தராதரங்களை உள்ளடக்கிய 70/175 தீர்மானத்தை நிறைவேற்றியது.
நெல்சன் மண்டேலா விதிகளானது கைதிகள் அனைவரும் மனிதர்கள் என்ற வகையில் அவர்கள் கொண்டுள்ள உள்ளார்ந்த கண்ணியம், மனித விழுமியங்களுக்கு மதிப்பளிக்கவும் அவர்களுக்கு மருத்துவ மற்றும் சுகாதார சேவைகள் கிடைக்கவும் தடுப்புக் காவலில் இடம்பெறும் அனைத்து மரணங்கள் சித்திர வதைகள் குறித்து விசாரணைகளை மேற்கொள்ளவும் பாதிக்கப்படக்கூடிய நிலைமையிலுள்ள மற்றும் விசேட தேவையுள்ள கைதிகளை பாதுகாக்கவும், அவர்களது முறைப்பாடுகளை செவிமடுத்து நடவடிக்கை எடுக்கவும் அவர்களுக்கு போதுமான காற்றோட்டம், ஒளி, கழிப்பிட வசதி, சுகாதார கவனிப்புகள் என்பவற்றை ஏற்படுத்திக் கொடுக்கவும் வலியுறுத்துகிறது.
மேலும், ஐக்கிய நாடுகள் சபை நெல்சன் மண்டேலாவை கௌரவப்படுத்தும் வகையில் நெல்சன் மண்டேலா தினத்தை வருடந்தோறும் ஜூலை 18ஆம் திகதி அனுஷ்டிப்பதற்கான பிரகடனத்தைச் செய்துள்ளது. அந்த வகையில் இன்றைய தினம் வியாழக்கிழமை அனுஷ்டிக்கப்படவுள்ள இந்த வருடத்துக்கான நெல்சன் மண்டேலா தினத்தின் தொனிப் பொருள் ‘வறுமைக்கும் சமத்துவமின்மைக்குமான போராட்டம் எமது கைகளிலேயே உள்ளது’ என்பதாகும்.
ஒருவர் தான் எத்தகைய மோசமான சூழ்நிலையை எதிர்கொண்டாலும் அதனையும் விஞ்சி வெற்றியை நோக்கி அர்ப்பணிப்புடன் முயற்சித்தால் முடியாதது என்பது எதுவுமே இல்லை என்பதே நெல்சன் மண்டேலாவின் தாரக மந்திரமாகும்.
இது அனைவருக்கும் பொருந்தும் பொன் எழுத்துகளில் பொறிக்கப்பட வேண்டிய வார்த்தைகள் என்பதில் சந்கேமில்லை.
(ஆர். ஹஸ்தனி)
-வீரகேசரி-
