நயன்தாராவின் திருமண ஆவணப்படத்தில் தனுஷ் சொன்னது பற்றி ராதிகா சரத்குமார் பேசிய வீடியோ இருக்கிறது. அதை பார்த்தவர்களோ, அந்த அறிக்கைக்கு பிறகு இந்த வீடியோவை சத்தியமாக எதிர்பார்க்கவில்லை என்கிறார்கள்.
நயன்தாரா, விக்னேஷ் சிவனின் திருமண ஆவணப்படமான Nayanthara: Beyondthefairytale இன்று நெட்ஃப்ளிக்ஸில் வெளியிடப்பட்டுள்ளது.
தனுஷ் வக்கீல் நோட்டீஸ் அனுப்பியது தொடர்பாக நயன்தாரா மூன்று பக்க அறிக்கை வெளியிட்டதை அடுத்து அந்த திருமண ஆவணப்படத்தில் அப்படி என்ன தான் இருக்கிறது என்பதை தெரிந்து கொள்ள பலரும் பார்க்கிறார்கள்.
தனுஷ் தயாரிப்பில் உருவான நானும் ரௌடி தான் படத்தில் நடித்தபோது தான் இயக்குநர் விக்னேஷ் சிவனுக்கும், நயன்தாராவுக்கும் இடையே காதல் ஏற்பட்டது.
விக்னேஷ் சிவன் இயக்கிய நானும் ரௌடி தான் படத்தில் ஹீரோ விஜய் சேதுபதிக்கு அம்மாவாக நடித்திருந்தார் ராதிகா சரத்குமார்.
படப்பிடிப்பு தளத்தில் இருந்தும் கூட நயன்தாராவும், விக்னேஷ் சிவனும் காதலித்தது அவருக்கு தெரியாமல் இருந்திருக்கிறது. இந்நிலையில் தனுஷ் தான் போன் செய்து அந்த காதல் விவகாரத்தை தன்னிடம் கூறியதாக ராதிகா முன்பு தெரிவித்தார்.
அவர் பேசிய வீடியோ அப்பொழுது வைரலானது. இந்நிலையில் அந்த வீடியோவை தங்களின் ஆவணப்படத்தில் வைத்திருக்கிறார்கள் நயன்தாராவும், விக்னேஷ் சிவனும். அந்த வீடியோவில் ராதிகா சரத்குமார் கூறியிருப்பதாவது,
தனுஷ் எனக்கு போன் செய்தார். அக்கா, ஷூட்டிங் எப்படி நடந்தது என கேட்டார். நல்லா நடந்தது என்றேன். உங்களுக்கு ஒரு விஷயம் தெரியுமாக்கானு கேட்டார். என்ன தனுஷ் என்றேன். நயனும், விக்கியும் கல்யாணம் பண்ணிக்கப் போறாங்க. அது உங்களுக்கு தெரியுமா என கேட்டார்.
சும்மா சொல்லாத நான் தானே ஷூட்டிங்கில் இருந்தேன், கதைவிடாத என்றேன். உங்களுக்கு வெட்கமா இல்லையா?. இவ்வளவு வருஷம் நடிக்கிறீங்களே?. வெட்கம் இருக்கணும் உங்களுக்கு. பெரிய நடிகைனு பெயரா?. வெட்கமே இல்லக்கா உங்களுக்கு?. உங்க கண்ணு முன்னாடியே இவ்வளவு நடந்திருக்கு என்றார். ஏய் என்னடா சொல்ற. எனக்கு தெரியாது என்றேன் என்றார்.
தனுஷ் விஷயம் பூதாகரமாகியிருக்கும் இந்த நேரத்தில் அவர் சொன்ன தகவல் நயன்தாராவின் ஆவணப்படத்தில் வந்திருப்பது பலரையும் வியக்க வைத்திருக்கிறது. இதற்கிடையே நயன்தாரா ரசிகர்கள் தனுஷை சமூக வலைதளங்களில் விளாசி வருகிறார்கள்.
பதிலுக்கு தனுஷ் ரசிகர்கள் நயன்தாராவை விளாசிக் கொண்டிருக்கிறார்கள். மேலும் நயன்தாரா, தனுஷ் விவகாரத்தை வைத்து ஏகப்பட்ட மீம்ஸ் போட்டுக் கொண்டிருக்கிறார்கள் சமூக வலைதளவாசிகள்.
