பொதுவாக மழைப்பாங்கான காலநிலையில் இருமல், தடிமன், சிறுகாய்ச்சல் என்பது சதாரணமானது என்பது பலருடைய பொதுப்படையான அபிப்பிராயம். இதற்காக ஒருசிலரே வைத்தியசாலைக்குச் சென்று சிகிச்சை பெறுவர். பலர் தன்னம்பிக்கையுடன் ‘கை வைத்தியத்துடன்’ மீண்டு விடுவர்.
அண்மைய நாட்களில் மழையுடனான தீவிரமான காலநிலை வடக்கில் நீடித்திருந்த நிலையில் அங்கு ஓரிருவருக்கு காய்ச்சல் ஏற்பட்டிருக்கின்றது. ஆரம்பத்தில் நிலைமை மோசமாக இல்லாது விட்டாலும் சிலமணி நேரத்துக்குப் பின்னர் அவர்களுக்கு மிகப்பலவீனமான நிலைமையே ஏற்பட்டுள்ளது.
அதையடுத்து, உடனடியாகவே யாழ். போதனா வைத்தியசாலையில் அவர்கள் அனுமதிக்கப்பட்டனர். எனினும், சிகிச்சைகள் பலனின்றி சிலர் உயிரிழந்தனர். திடீர் காய்ச்சல், மர்மமான மரணங்கள் ஓரிரு நாட்களிலேயே தீவிரமான நிலையை அடைந்தன.
அதன் ஆபத்துக்களை உணர்ந்த வைத்தியசாலை நிர்வாகம், காய்ச்சலால் பீடிக்கப்பட்டவர்களிடமிருந்து பெறப்பட்ட மாதிரிகளைப் பெற்று பேராதனைக்கும், கொழும்புக்கும் ஆய்வுகளுக்காக உடனடியாகவே அனுப்பி விடுகின்றது.
அங்கு மேற்கொள்ளப்பட்ட ஆய்வுகளில் வடக்கில் தீவிரமாக பரவிவருவது, ‘லெப்டோஸ்பைரோஸிஸ்’ எனப்படுகின்ற ‘எலிக்காய்ச்சல்’ என்பது உறுதி செய்யப்பட்டது.
நாட்டில் அண்மையில் ஏற்பட்ட சீரற்ற காலநிலையுடன் வெள்ளம் ஏற்பட்ட பகுதிகளில் எலிக்காய்ச்சல் பரவும் அபாயம் ஏற்பட்டுள்ளதாக சுகாதார அமைச்சின் தொற்றுநோய்ப்பிரிவு இம்மாத முற்பகதியில் எச்சரிக்கை விடுத்திருந்தது
அந்த எச்சரிக்கை அறிவிப்பில் இரத்தினபுரி, காலி, களுத்துறை, அம்பாறை, குருநாகல், கேகாலை மற்றும் மாத்தறை ஆகிய மாவட்டங்கள் அதிக ஆபத்துள்ள பிரதேசங்களாக இனங்காணப்பட்டுள்ளதாக தொற்றுநோயியல் பிரிவு சுட்டிக்காட்டியுள்ளது.
ஆனால், இம்மாவட்டங்களை விடவும் தற்போது வடக்கு மாகாணத்தின் ஐந்து மாவட்டங்கள் தான் அதிகம் நெருக்கடிகளை எதிர்கொள்ளும் நிலைக்குத் தள்ளப்பட்டுள்ளதை அவதானிக்க முடிகின்றது.
யாழ். பிராந்திய சுகாதார சேவைகள் பணிப்பாளர் வைத்திய கலாநிதி ஆ.கேதீஸ்வரன் ‘தற்போது பரவி வரும் காய்ச்சலால் யாழ். மாவட்டத்தில் இதுவரையில் 7 இறப்புக்கள் பதிவாகியுள்ளதோடு 58 பேர் பாதிக்கப்பட்டுள்ளனர்’ என்று குறிப்பிட்டுள்ளார்.
இதேநேரம், வட மாகாணத்தில் காய்ச்சல் காரணமாக உயிரிழந்த 7 பேரில் 2 பேர் எலிக்காய்ச்சல் காரணமாக உயிரிழந்துள்ளமை உறுதி செய்யப்பட்டுள்ளதாக சுகாதார அமைச்சின் விசேட வைத்திய நிபுணர் துஷானி தாபரே அறிவித்துள்ளார். குறிப்பாக, யாழ்ப்பாணத்தில் உயிரிழந்தவர்களிடமிருந்து பெறப்பட்டு அனுப்பப்பட்ட மாதிரிகளில் 3 பேருக்கு எலிக்காய்ச்சல் நோய் இருப்பதாக கொழும்பு மருத்துவ ஆராய்ச்சி நிறுவனத்தினால் உறுதிப்படுத்தப்பட்டுள்ளது என்றும் அவர் குறிப்பிட்டுள்ளார்.
அண்மைய நாட்களில் வடக்கில் எலிக்காய்ச்சலின் தாக்கம் அதிகமாக இருக்கிறது. எனினும், நாடாளவிய ரீதியில் கணிசமான அளவுக்கு அக்காய்ச்சல் ஆதிக்கம் செலுத்துகின்றது என்பதை மறுப்பதற்கில்லை.
இதனை உறுதிப்படுத்தும் வகையில் தொற்று நோய் பிரிவின் விசேட வைத்திய நிபுணர் குமுது வீரகோன், ‘இந்த ஆண்டின் இதுவரையிலான காலத்தில் 10ஆயிரத்துக்கும் அதிகமானவர்கள் எலிக்காய்ச்சலால் பாதிக்கப்பட்டுள்ளனர்’ என்று கூறியுள்ளார்.
அத்துடன், நாடளாவிய ரீதியில் கடந்த வருடம் மாத்திரம் எலிக்காய்ச்சலால் பாதிப்புற்ற 9ஆயிரம் பேர் அடையாளம் காணப்பட்டுள்ளதுடன் 200 பேர் உயிரிழந்துள்ளனர். இரத்தினபுரி, குருநாகல், காலி, மாத்தறை, கொழும்பு ஆகிய மாவட்டங்களிலேயே அதிக நோயாளர்கள் கண்டறியப்பட்டுள்ளனர் என்றும் அவர் குறிப்பிட்டுள்ளார்.
பத்துத் தொடக்கம் 12 மாவட்டங்கள் அதியுயர் அபாயம் மிக்க பகுதிகளாக அடையாளப்படுத்தப்பட்டுள்ளன என்றும், எலிக்காய்ச்சலின் தீவிரத்தன்மையை உணர்ந்து நடவடிக்கைகளை முன்னெடுத்துள்ளதாகவும் விசேட வைத்திய நிபுணர் குமுது வீரகோன், தெரிவித்துள்ளார்.
நிலைமைகள் இவ்வாறிருக்கையில், எலிக்காய்ச்சல் என்றால் என்ன என்பதும், அதன் தாக்கம் எவ்வாறானது என்பதும், அதனால் அதிகம் ஆபத்துக்குள்ளாகக் கூடியவர்கள் யார் என்பதையும் கவனத்தில் கொள்ள வேண்டியது தற்போதைய சூழலில் இன்றியமையாததாகவுள்ளது.
இந்தக் காய்ச்சலானது, மனிதனில் இருந்து மனிதனுக்கு பரப்பப்படுவதில்லை. மாறாக, Leptospira interrogans எனப்படுகின்ற ஒரு வகை பக்டீரியாவால் ஏற்படுகிறது. இந்த நோய்க் கிருமி பொதுவாக எலி போன்ற மிருகங்களின் சிறுநீருடன் வெளியேற்றப்படுகிறது. இவ்வாறு வெளியேற்றப்பட்ட நோய்க்கிருமி நீர்த்தேக்கங்களில் இருந்து மனிதனின் தோலில் உள்ள சிறு புண்கள் ஊடாகவோ அல்லது தோலின் மென்மையான பகுதிகள் ஊடாகவோ மனித உடலின் குருதிச் சுற்றோட்டத்தைச் சென்றடைகின்றது. சில சந்தர்ப்பங்களில் இந்த நோய்க் கிருமி உள்ள நீரைப் பருகுவதாலும் மனித உடலைச் சென்றடைகின்றது.
அவ்வாறு மனித உடலுக்குள் கிருமி சென்றடைந்தவுடன் ஏழு முதல் பன்னிரெண்டு நாட்கள் கழித்தே எலிக்காய்ச்சல் நோயின் அறிகுறிகள் தென்படும். முதல் வாரத்தில் குளிர்க்காய்ச்சல், நடுக்கம், தலைவலி, உடல் வலி, உடல் தளர்வு, கண்கள் சிவந்துபோதல், கண் கூச்சம், வயிற்று வலி, வாந்தி, உடலில் தடிப்புகள் போன்றவை ஏற்படும்.
அதன்பிறகு, சுமார் ஒரு வாரம் முதல் பத்து நாட்கள் வரை காய்ச்சல் இல்லாமல் இருக்கும். இரண்டாவது கட்டத்தில், கிருமிகள் பல்வேறு திசுக்களையும் உடல் உறுப்புகளையும் தாக்குவதால் பாதிப்பு ஏற்படும். கல்லீரல், சிறுநீரகம் அதிகமாக பாதிக்கப்படும்.
இந்த நிலையில் ஒருபோதும் எந்த ஒரு சிகிச்சையினையும் பெறாமல் இருந்தால், இருதயம், மூளை, பாதிப்படைவதோடு சிறுநீருடன் இரத்தம் கலந்து வெளியேறுதல், சிறுநீர் வெளியேறுவது குறைதல் ஆகிய நிலைமைகள் உருவெடுக்கும். அதிலிருந்து மீள முடியாத நிலைமையில் உயிரிழப்பு ஏற்படும்.
வயல்களில் வேலை செய்யும் விவசாயிகள், சேற்று நிலங்களில் பயிர்ச்செய்கைகளில் ஈடுபடுபவர்கள், ஆறுகள் அல்லது வயல் வெளிகளில் செங்கல் தயாரித்தல் அல்லது மணல் அள்ளுதல் போன்ற செயற்பாடுகளில் ஈடுபடுபவர்கள், இரத்தினக்கல் சுரங்கத் தொழிலாளர்கள், சேற்று நிலம் அல்லது நீர் தேங்கிய இடங்களில் விளையாட்டு அல்லது செயற்பாடுகளில் ஈடுபவர்கள் இந்த நோய்த் தாக்கத்துக்கு இலகுவாக உள்ளாகக் கூடியவர்களாக உள்ளனர்.
இவ்வாறான நிலையில், குறித்த நோய்நிலைமையில் இருந்து எவ்வாறு பாதுகாப்பைப் பெற்றுக்கொள்ள முடியுமென்றும் மேற்கொள்ள வேண்டிய முன்னெச்சரிக்கைகள் குறித்தும் யாழ். போதனா வைத்தியசாலை பொது வைத்தியநிபுணர் வைத்தியர் த.பேரானந்தராஜா விளக்கமளித்துள்ளார்.
தேவையில்லாமல் நீர் தேங்கியிருக்கும் இடங்களுக்கோ அல்லது சேற்று நிலங்களுக்கோ போவதை தவிர்ப்பதோடு அவ்வாறான இடங்களில் குளிப்பதையோ அல்லது கழுவுவதையோ தவிர்க்க வேண்டும்.
வயல்கள் மற்றும் வாழிங்களுக்கு அருகில் உள்ள பகுதிகளை சுத்தமாக வைத்திருப்பதும் நீர் தேங்கி நிற்காதவாறு பார்த்துக்கொள்வதும் அவசியமாகும்.
பொதுஇடங்களில் கிடைக்கின்ற நீரைப்பருகுவதை தவிர்ப்பதோடு கொதித்து ஆறிய நீரைப் பருகுவது மிகப்பொருத்தமானதொரு பாதுகாப்பு முறையாகும்.
நீர்நிலைகள், சதுப்பு நிலங்கள், கழிவு வாய்க்கால்கள் போன்ற பகுதிகளில் அதிகம் பிரசன்னம் உடையவர்கள் அருகில் உள்ள சுகாதாரப் பணிமனைக்கோ அல்லது வைத்தியசாலைகளுக்கோ நேரடியாகச் சென்று முற்பாதுகாப்பு மாத்திரைகளைப் பெற்றுக்கொள்ள முடியும்.
அதேநேரம், நோய்த்தொற்று அறிகுறிகளைக் கொண்டவர்கள் உடனடியாக, அருகில் உள்ள வைத்தியசாலைகளுக்குச் சென்று வைத்திய அதிகாரியைச் சந்திப்பதும் உரிய சிகிச்சைகளை பின்பற்றுவதும் மிகவும் முக்கியமானதாகும்.
பொது வைத்திய நிபுணர் வைத்தியர் த.பேரானந்தராஜாவின் ஆலோசனைகள் இவ்வாறிருக்கையில், வடக்கில் இம்முறை ஏற்பட்ட அதிக மழையின் காரணத்தால் ஏற்பட்டுள்ள வெள்ளம் வடிந்தோட முடியாமலிருக்கும் சூழல் தான் எலிக்காய்ச்சலுக்கான அடிப்படையாக இருக்கின்றது.
ஆக, வடக்கின் வடிகாலமைப்பு முறைமையை மீளாய்வு செய்தலாலே எலிக்காய்ச்சலின் கணிசமான தாக்கத்தில் இருந்து மீட்சி பெற்றுக்கொள்ளக்கூடிய இயலுமையை இலகுவாகப் பெற்றுக்கொள்ள முடியும்.
ஆர்.ராம்-Virakesari
