சென்னை: நடிகர் சங்க தலைமை பதவிகளை தமிழர்களே வகிக்க வேண்டும் என சொல்லும் இயக்குநர் பாரதிராஜா, ஏன் தனது படங்களில் தமிழ் நடிகைகளை அறிமுகப்படுத்தவில்லை என இணையத்தில் கேள்வி கணைகள் உலா வருகின்றன.
நடிகர் சங்கத் தேர்தல் தொடர்பாக இயக்குனர் பாரதிராஜா நேற்றிரவு அறிக்கை ஒன்றை வெளியிட்டார். அதில், “நடிகர்கள் சங்கம் மட்டுமில்லாமல், ஏனைய திரைப்பட சங்கங்களில் பிற மொழியினர் உறுப்பினராக இருப்பதில் தவறில்லை.
ஆனால், தலைமைக்கும், நிர்வாக பதவிகளுக்கு தேர்ந்தெடுப்பதில் எனக்கு உடன்பாடில்லை. இது வந்தாரை வாழவைக்கும் தமிழ்நாடு. உங்களை வரவேற்கிறோம், உபசரிக்கிறோம்.
ஒருவருக்கொருவர் சகோதரத்தோடு கலாசார வேறுபாடின்றி இருக்கிறோம். நீங்கள் தொழில் செய்யலாம். சமுதாய கடமையாற்றலாம்.
எந்தத் துறையாக இருந்தாலும் தலைமை பதவிகளுக்கு மட்டும் தமிழன்தான் வரவேண்டும். மண்ணின் மைந்தன் வரவேண்டும் என்கிற தார்மீகம் உங்களுக்குப் புரியாததல்ல” என்று கூறியிருந்தார்.
பாரதிராஜாவின் இந்த அறிக்கைக்கு ஆதரவாகவும் எதிராகவும் இணையத்தில் பல்வேறு கேள்விகள் உலா வருகிறது.
இது தொடர்பாக பாரதிராஜா அறிமுகப்படுத்திய நடிகைகளின் பட்டியலை வெளியிட்டு, காரசாரமான கருத்துமோதல்கள் தற்போது இணையத்தில் வெளியாகி பரபரப்பை ஏற்படுத்தியுள்ளது.
அதன் விவரம்: ஸ்ரீதேவி (தெலுங்கு), ரதி (இந்தி), விஜயசாந்தி (தெலுங்கு), ராதா (மலையாளம்), மாதவி (தெலுங்கு), ரேவதி (மலையாளம்), ரேகா (மலையாளம்), அமலா (பெங்காலி), ரஞ்சிதா (தெலுங்கு), ரியாசென் (பெங்காலி), சிந்து மேனன் (மலையாளம்), காஜல் அகர்வால் (இந்தி), கார்த்திகா (மலையாளம்).
”இப்படி பிற மாநிலங்களைச் சேர்ந்த நடிகைகளை அறிமுகப்படுத்திய பாரதிஜாராவின் மருமகளும் மலையாளிதான் என்பதை மறைத்துவிட்டு வசதியாக அவ்வப்போது தமிழ், தமிழன் என்று பேசுகிறார்” என்று கடுமையான விமர்சனங்கள் முன்வைக்கப்பட்டுள்ளன.
அதேசமயத்தில், ”பாரதிராஜா ஒரு கலைஞர். தனது படத்துக்குத் தேவையென்றால் எந்த மாநிலத்தைச் சேர்ந்தவராக இருந்தாலும் பயன்படுத்துவார்.
அது கலை. இது அதிகாரம். அதிகாரத்துக்கு வர அடுத்த மாநிலத்தவருக்கு உரிமை கிடையாது” என்று பாரதிராஜாவுக்கு ஆதரவாகவும் கருத்துக்கள் பதிவிடப்பட்டுள்ளன.
15-10-2015
சரத்குமார் நடிகர் சங்கத் தலைவராக பொறுப்பேற்ற உடனே என் வேண்டுகோளுக்கிணங்க நடிகர் சங்க பொதுக்குழுவில் அனைத்து உறுப்பினர்களின் ஆதரவோடு ஒரு மனதாக தமிழ்நாடு திரைப்பட நடிகர்கள் சங்கம் என பெயர் மாற்றம் செய்ய தீர்மானம் கொண்டுவரப்பட்டது. மிக்க மகிழ்ச்சி அடைந்தோம்.
ஆனால், இன்று வரை அந்தத் தீர்மானம் எந்த காரணத்தினாலோ நடைமுறைக்கு வரவில்லை. மீண்டும் மீண்டும் வலியுறுத்தினோம். ஆனால், இன்று வரை நடிகர் சங்கத்தில் பொறுப்பில் உள்ளவர்கள் அதற்கு செவி சாய்க்கவில்லை.
இதற்கு காரணம் சங்கப் பொறுப்பில் உள்ளவர்கள் பெரும்பாலும் பிறமொழியை சேர்ந்தவர்களாக இருப்பதினால்தானோ என சந்தேகிக்கத் தோன்றுகிறது.
தமிழக திரைப்பட வரலாற்றில், ஒரு காலகட்டத்திற்குப் பிறகு அண்டை மாநிலத்தைச் சார்ந்தவர்கள் சங்கத்தைப் பிரித்துக்கொண்டு, அவரவர் மாநிலத்திலேயே புதிய சங்கங்களை உருவாக்கிக் கொண்டார்கள்.
அதற்கு பிறகு தான் நமது படைப்பாளிகள் எல்லாம் ஒன்று கூடி தமிழ்நாடு இயக்குனர்கள் சங்கம் மற்றும் தமிழ்நாடு திரைப்பட தயாரிப்பாளர்கள் சங்கம் என பெயர் மாற்றப்பெற்று மகுடம் சூட்டப்பட்டது.
ஆனால், இதுநாள் வரை தென்னிந்திய நடிகர்கள் சங்கம், தென்னிந்திய திரைப்பட வர்த்தக சபை மற்றும் தென்னிந்திய திரைப்பட தொழிலாளர்கள் சம்மேளனம் ஆகிய அமைப்புகள் பெயர் மாற்றம் செய்ய மறுத்து வருகின்றன.
தமிழக அரசியல் மற்றும் திரைத்துறையிலும் தமிழர்கள் அல்லாதவர்களே ஆதிக்கம் செலுத்தி வருகிறார்கள். அதிகாரமிக்க பதவிகளுக்கு தமிழர்கள் அல்லாதவர்களையே ஆசனத்தில் அமரவைத்து அழகு பார்க்கிறார்கள்.
இதனால் தமிழர்களின் உரிமைகள் மறுக்கப்படுகின்றன. ஆனால், பிற மாநிலத்தில் தமிழன் ஒருவன் ஒரு வார்டு உறுப்பினராக பதவி வகிப்பதற்குக் கூட தகுதியற்றவனாகக் கருதப்படுகிறான்.
நடிகர்கள் சங்கம் மட்டுமில்லாமல், ஏனைய திரைப்பட சங்கங்களில் பிற மொழியினர் உறுப்பினராக இருப்பதில் தவறில்லை. ஆனால், தலைமைக்கும், நிர்வாக பதவிகளுக்கு தேர்ந்தெடுப்பதில் எனக்கு உடன்பாடில்லை.
இது வந்தாரை வாழவைக்கும் தமிழ்நாடு. உங்களை வரவேற்கிறோம், உபசரிக்கிறோம். ஒருவருக்கொருவர் சகோதரத்தோடு கலாச்சார வேறுபாடின்றி இருக்கிறோம். நீங்கள் தொழில் செய்யலாம். சமுதாய கடமையாற்றலாம்.
எந்த துறையாக இருந்தாலும் தலைமை பதவிகளுக்கு மட்டும் தமிழன் தான் வரவேண்டும். மண்ணின் மைந்தன் வரவேண்டும் என்கிற தார்மீகம் உங்களுக்குப் புரியாததல்ல. ஆகையால், தென்னிந்திய திரைப்பட நடிகர்கள் சங்கப் பொறுப்பிற்கு போட்டியிடும் நடிகர்கள், தமிழ்நாடு திரைப்பட நடிகர்கள் சங்கம் எனப் பெயர் மாற்றம் செய்து தமிழர்களின் தன்மானத்தையும், உரிமையையும் காப்பாற்ற முன்வருமாறு வேண்டுகிறேன்.
நடிகர் சங்கத்தில் தமிழகத்தைச் சார்ந்த நாடக நடிகர்கள் மட்டுமே உறுப்பினர்களாக இருக்கும் பட்சத்தில், பின்பு ஏன் தென்னிந்திய திரைப்பட நடிகர் சங்கம் என பெயர் உள்ளது?
